“Qəbələ”nin legioneri 90 dəqiqə oynadı
“Qəbələ” şənbə günü daha bir yoxlama matçı keçirib. “Qırmızı-qaralar” “Zirə” ilə üz-üzə gəlib. 4 gün öncə birinci divizion təmsilçisi MOİK-i 4 cavabsız qolla məğlub edən Sənan Qurbanovun yetirmələri Bakıətrafı qəsəbə təmsilçisi ilə ADBTİA-nın stadionunda qarşılaşıb. Şimallılar oyuna aşağıdakı start heyəti ilə başlayıb: Dmitri Bezotosnı, İlqar Qurbanov, Elvin Camalov, Voislav Stankoviç, Abbas Ağazadə, Asif Məmmədov, Roman Hüseynov, Samir Qurbanov, Ceyms Adeniyi, Əli Sadıxov, Stiven Jozef-Monroz.
Qarşılıqlı hücumlar şəraitində keçən qarşılaşmanın ilk yarısında “qartallar” bölgə klubunu iki dəfə meydanın mərkəzinə dəvət edib. Samir Abasovun gəlişindən sonra “Zirə” ilə anlaşan Adrian Skarlatake 31-ci, Vüsal İsgəndərli 40-cı dəqiqədə fərqlənib. Fasilədə və ikinci yarının gedişində hər iki komanda oyunçu dəyişikliklərindən istifadə edib. “Qırmızı-qaralar”ın heyətində Faiq Hacıyevlə Rüstəm Nuriyev meydana çıxıb. Lakin komandaların səylərinə baxmayaraq, ikinci 45 dəqiqədə toru silkələmək mümkün olmayıb və görüş “qartallar”ın 2:0 hesablı qələbəsi ilə yekunlaşıb.
Oyundan sonra “Qəbələ”nin baş məşqçisi Sənan Qurbanov klubun rəsmi saytına açıqlama verib: “Bu yoxlama oyunu inkişaf baxımından bizim üçün çox vacib idi. Çempionatda yaranan fasilə dövrü üçün məşq prosesi, oyun, ardınca hazırlıq və 2-ci yoxlama görüşündən ibarət proqram qurmuşduq. MOİK-lə ilk sınaq matçında, demək olar, ideal futbol oynamışdıq. Həm gənclərin, həm də təcrübəli futbolçuların çıxışından razı qalmışdım. Bu dəfə ikinci hissədəki oyundan məmnun qaldım. Futbolçuların daha hərəkətli olması, pressinq etməsi, top saxlaması lazım idi ki, bunu da fasilədən sonra gördüm. Ümumilikdə yaxşı ikinci hissə izlədik. Matçdan sonra futbolçulara birgünlük istirahət verib, sonra hazırlığa davam edəcəyik”.
9 futbolçusu müxtəlif yığmaların heyətində olan “Qəbələ”nin əsas komandasına U-19-un bəzi üzvləri də cəlb olunub. Qurbanov gənc oyunçuların yoxlama matçlarındakı çıxışını da dəyərləndirib: “9 futbolçumuzun əsas yığma ilə yanaşı, müxtəlif yaş qrupu üzrə millilərdə olması bizim üçün fəxrdi. Hazırlıq prosesinə gənc oyunçuları cəlb etdik. Onları yoxlama matçlarında da sınamaq imkanımız yarandı. Çox yaxşı məlumat topladıq. MOİK-lə qarşılaşmada gənc futbolçular yaxşı təsir bağışladı. Bugünkü görüşdə də özünü yaxşı tərəfdən göstərən oyunçular oldu. Belə davam etsələr, onların bəziləri əsas heyətdə yer almağa başlayacaq”. “Qəbələ”nin futbolçusu Lalavele Atakora Toqo millisində növbəti oyununu keçirib. Yarımmüdafiəçi Afrika Millətlər Kubokunun seçmə mərhələsinin D qrupunun 2-ci turunda iştirak edib. Lalavelenin heyətində yer aldığı Toqo öz meydanında Beninlə qarşılaşıb. Görüş 0:0 hesabı ilə başa çatıb. Start heyətində yer alan Atakora 90 dəqiqə meydanda olub. Yarımmüdafiəçi matçın 43-cü dəqiqəsində sarı vərəqə alıb. İki turdan sonra hesabında 1 xal olan toqolular 4-cü pillədə qərarlaşıb. Atakoranın şərəfini qoruduğu yığma dünən “doğma divarlar” arasında Qambiya ilə üz-üzə gəlib.
RƏŞAD