“Hakimlik çox aşağı səviyyədə idi”
Monteneqrodan olan hakimlərin işini birmənalı qiymətləndirmək çətindi. Əslində demək olmaz ki, hansısa tərəfə simpatiya vardı. İnsafən, hakim bacardığı qədər obyektiv olmağa çalışırdı. Ancaq Nikola Dabanoviçin qərəzli olmasa da, səhv qərarları az deyildi. Hə, penaltiyə görə kimsənin ağız büzməyə haqqı yoxdu. Bədavi Hüseynov açıq-aşkar rəqibə badalaq vurdu və referi tam haqlı olaraq “nöqtə”ni göstərdi. 16-cı dəqiqədə sürətli əks-hücum zamanı Dmitri Nazarova qarşı kobudluğun olub-olmadığını müzakirəyə çıxarmaq olar. Əksər həmlələri ofsaydla kəsilən meydan sahiblərinin 38-ci dəqiqədəki hücumu zamanı isə oyundankənar vəziyyətin olması şübhəlidi. Cəmi 2 dəqiqə sonra hakim hava mübarizəsi zamanı rəqibə yüngül təmas edən Maksim Medvedevin qaydanı pozduğunu bildirdi. Bu epizodda oyunu davam etdirmək olardı. Dabanoviçin son dəqiqələrdəki səhvləri daha yaddaqalan oldu. Ramil Şeydayevin ötürməsinin qarşısını rəqib futbolçu alsa da, fit sahibi əlini korner bayrağına tuşlamadı. Digər epizodda isə Mahir Mədətovun cərimə meydançası yaxınlığındakı kobudluğu zamanı mübarizəni davam etdirdi.
Hər halda, ekspertlər detalları daha dəqiq bilər. Əvvəlcə Ceyhun Haşımovu dinləyək: “Penaltiyə şübhə ola bilməz. Yüz faiz doğru qərar idi. Nazarovun yerdə qaldığı epizodda hakim doğru qərar verdi. Rəqib topa oynamışdı. Mən hakim olsaydım, Maksimin epizoduna görə cərimə zərbəsi təyin etməzdim. Verilən sarı vərəqələr doğru idi. Şeydayevin epizodunda künc zərbəsi təyin edilməliydi. Fikrimcə, Təmkinə qarşı qayda pozuntusu zamanı rəqibə “sarı” verilməsi doğru qərar idi. Kobudluq olsa da, aqressivlik yox idi. Ümumilikdə idarəçiliyi 8,3-8,4 balla qiymətləndirirəm”.
Anar Salmanov isə idarəçilikdən razı qalmayıb: “47-ci dəqiqədə Stiv Borqa sarı vərəqə verilməliydi. Topa çatmadığından “sürüşmə” fəndi qayda pozuntusu idi. 52-ci dəqiqədə Ürfana qarşı qayda pozuntusu qeydə alınmadı. Yan xətt hakiminin yanında onu itələdilər, amma bayraq qalxmadı. Laysman müdaxilə etməliydi, etmədi. 80-ci dəqiqədə Mədətova “sarı” verilməliydi. Perspektivli hücumun qarşısını kəsmişdi. Ümumilikdə idarəçiliyi bəyənmədim. Çünki meydanda vaxtın gecikdirilməsinə qarşı mübarizə aparmadı. Oyuna əlavə olunmuş 4-cü dəqiqədə rəqib qapıçıya “sarı” verir. Kimə lazımdı o? Bundan sonra o vərəqə heç kimə lazım deyil. Halbuki o bu addımı 60-70-ci dəqiqələrdə atmalıydı. Qaydaların yozumu və tətbiqində problemlər var idi. Təmkinə qarşı kobudluğa görə qırmızı vərəqə verilməliydi. Qorunmayan hissəyə arxadan zərbəydi. Hesab edirəm ki, hakimlik çox aşağı səviyyədə idi. Maltanın futbolçuları oyun ərzində yerdə qalırdılar, vaxtı uzadırdılar. Hakim buna qarşı mübarizə aparmırdı. İdarəçiliyi 8,2 balla qiymətləndirirəm. Briqadaya gəlincə, komanda şəklində xoşuma gəlmədilər. Ancaq hakimin fiziki hazırlığı qaydasında idi. Bu oyunu hakim yola verdi, idarə etmədi. Əslində 7,9 bal 8,2-dən daha yaxşıdı. Çünki 7,9 bal alan hakim 90 dəqiqə ərzində bir kobud səhv etmiş olur. Ancaq 8,1-8,2 bal alan isə oyunboyu çoxsaylı nəticəyə təsir etməyən səhvlərə yol vermiş sayılır ki, bu da ümumən daha pisdi”.
SƏRXAN