Dünən keçirilən oyunlarla Misli premyer-liqasında 13-cü tura start verildi.

"Football-plus.az" xəbər verir ki, “Kəpəz” – “Zirə”, “Turan Tovuz” – “Neftçi” matçlarının ardından bu gün və sabah daha 4 qarşılaşmaya şahidlik edəcəyik. Həmin görüşlər də “CBC Sport”un efirində canlı yayınlanacaq.

Misli premyer-liqası
2-ci dövrə, 13-cü tur
29 noyabr
İmişli – Sabah
“İmişli” bu rəqiblə qarşılaşmayıb.
Cəzalı: yoxdu.
“Futbol+”in proqnozu: 20-30-50.
Hakimlər: ELÇİN MƏSİYEV, Elşad Abdullayev, Pərvin Talıbov, Elvin Bayramov.
VAR hakimi: Rauf Cabbarov.
VAR hakiminin köməkçisi: Zeynal Zeynalov.
Hakim-inspektor: Anar Salmanov.
AFFA nümayəndəsi: Elgiz Abbasov.
Quba, Olimpiya İdman Kompleksinin stadionu. Saat 14.30.

Ötən həftə “Neftçi”nin meydanında əzmkar qələbə qazanan “İmişli” indi daha bir iddialı rəqibi – “Sabah”ı devirməyə çalışacaq. Burda prinsipial məqam Aran təmsilçisinin Masazır təmsilçisinə səfərdə qalib gəlməsidi. Özü də bu, “bayquşlar”ın cari “futbol ili”ndəki yeganə məğlubiyyətidi! Odu ki, bugünkü qarşılaşmanın yetərincə gərgin keçəcəyini proqnozlaşdırmaq olar. Avrokuboklar uğrunda mübarizə aparan “Sabah”a gəlincə, komanda ilk “dördlük”dəki yerini itirmək istəmir. Bu səbəbdən qonaqlar Qubaya yalnız qələbə dalınca yollanacaq. İstənilən halda, hər iki komanda çətin sınaq qarşısındadı. Bir tərəfdə debütant olsa da, güclü rəqiblərə qan udduran “İmişli”, o biri tərəfdə isə 9 oyundu uduzmayan “Sabah” var.

Komandalar arasında indiyə qədər keçirilən yeganə oyunda “İmişli” qalib gəlib – 1:0.

Qarabağ – Karvan-Yevlax
“Qarabağ” bu rəqiblə qarşılaşmayıb.
Cəzalı: Vadim Abdullayev (Karvan-Yevlax).
“Futbol+”in proqnozu: 70-20-10.
Hakimlər: KAMRANBƏY RƏHİMOV, Eyyub İbrahimov, Zöhrab Abbasov, Kamran Əliyev.
VAR hakimi: Cavid Cəlilov.
VAR hakiminin köməkçisi: Kamran Bayramov.
Hakim-inspektor: Ömər Paşayev.
AFFA nümayəndəsi: Nəriman Axundov.
Bakı, “Azərsun Arena”. Saat 17.00.

Liderlə autsayderin duelində hansısa intriqanın ön plana çıxacağını düşünmək sadəlövhlük olar. Axı aşkar səviyyə fərqi var. Neapoldan yorğun qayıdan “Qarabağ”ın “Karvan-Yevlax” önündə zəif təsir bağışlayacağına inanmaq çətindi. Düzdü, “Napoli”yə uduzan “köhlən atlar”ın düşərgəsində məyusluq var və məhz buna görə ağdamlıların premyer-liqa matçında hansısa çətinliklə üzləşə biləcəyini qeyd etmək olardı. Lakin rəqibin bərbad nəticələrlə yadda qalan Yevlax təmsilçisi olması “köhlən atlar”ın bu görüşdə liderliyini möhkəmləndirəcəyi yönündə ehtimalları artırır.

Komandalar arasında yeganə matç cari mövsümdə keçirilib. Həmin oyunda “Qarabağ” qalib gəlib – 2:0.

30 noyabr
Şamaxı – Sumqayıt
“Şamaxı”nın bu rəqiblə ev oyunlarının balansı: 23:+13=5-6, 36:22.
2011/12 – 2:0; 2012/12 – 1:0; 2013/14 – 2:0, 2:0; 2014/15 – 5:1, 0:0; 2015/16 – 2:3, 2:2; 2016/17 – 3:1, 1:0; 2017/18 – 1:1, 1:2; 2018/19 – 1:2, 2:1; 2019/20 – 2:1, 2:1; 2020/21 – 0:1, 0:1; 2021/22 – 0:2, 1:1; 2022/23 – 4:2, 0:0; 2024/25 – 1:0, 1:0.
Cəzalı: Rayan Senhadji (Sumqayıt).
“Futbol+”in proqnozu: 30-30-40.
Hakimlər: TURAL QURBANOV, Asiman Əzizli, Tərlan Talıbzadə, Vüqar Həsənli.
VAR hakimi: Elçin Məsiyev.
VAR hakiminin köməkçisi: Şirmamed Mamedov.
Hakim-inspektor: Ramil Diniyev.
AFFA nümayəndəsi: Emin Cəfərov.
Şamaxı, şəhər stadionu. Saat 14.00.

“Sabah”dan da xal qoparmağa nail olan “Şamaxı” təhlükəli zonadan böyük ölçüdə uzaqlaşıb. “Şirlər” indi, sadəcə, mövqeyini qorumalı, ən pis halda, aşağı sıralarda olan komandalarla xal fərqinin azalmasına imkan verməməlidi, Hər halda, baş məşqçi Ayxan Abbasov bu məqamları nəzərə alır. Lakin bu matçda rəqibin avrokuboklara vəsiqə qazanmağa çalışan “Sumqayıt” olduğunu da nəzərə almaq lazımdı. Saşa İliçin rəhbərlik etdiyi komanda xüsusən son oyunlarda yaxşı təsir bağışlayır. Əlbəttə, “gənclik şəhəri”nin təmsilçisi Şamaxıda qələbə qazanmağa çalışacaq ki, turu ilk “dördlük”də başa vurmaq şansını artırsın. Meydan sahibləri isə bir xalı da qazanc sayacaq.

Komandalar indiyə qədər 48 dəfə qarşılaşıb. Bunların 21-də “Şamaxı”, 13-də “Sumqayıt” qələbə qazanıb, 14-də qalib müəyyənləşməyib. Topların nisbətində “şirlər” öndədi – 66:49.

Qəbələ - Araz-Naxçıvan
“Qəbələ”nin bu rəqiblə ev oyunlarının balansı: 2:+1=0-1, 3:4.
Cəzalı: yoxdu.
“Futbol+”in proqnozu: 20-30-50.
Hakimlər: Kamal Umudlu, Vüsal Məmmədov, Namiq Hüseynov, Əkbər Əhmədov.
VAR: Rauf Cabbarov.
AVAR: Kamran Əliyev.
Hakim-inspektor: İmanxan Sultani.
AFFA nümayəndəsi: Namiq Əliyev
Qəbələ, şəhər stadionu. Saat 16.30.

Turun sonuncu matçında meydana çıxacaq komandalar, heç şübhəsiz, qələbə uğrunda çarpışacaq. Elitada qalmaq istəyən “Qəbələ” turnir cədvəlindəki mövqeyini yaxşılaşdırmaq, avrokuboklara yollanmaq arzusunda olan “Araz-Naxçıvan” xal ehtiyatını artırmaq imkanını maksimum dəyərləndirməyə çalışacaq. İş ondadı ki, hər biri ciddi problemlərlə mübarizə aparır. Sadəcə, “qırmızı-qaralar”ın çalışdırıcısı Kaxaber Sxadadze bu yöndə səmimi danışmağa üstünlük verirsə, “qırmızı-ağlar”ın baş məşqçisi Elmar Baxşıyev çatışmazlıqları ört-basdır etməyin tərəfdarıdı. Hər halda, “Araz-Naxçıvan” son 5 matçda yalnız bir qələbə qazanıb və rəqəmləri heç kim gizlədə bilməz! “Qəbələ” isə sözün əsl mənasında yarımcandı...

Komandalar indiyə qədər 5 dəfə üz-üzə gəlib. Bu oyunların 1-də “Qəbələ”, 3-də “Araz-Naxçıvan” qələbə qazanıb. Topların nisbətində Muxtar Respublika təmsilçisi öndədi – 9:5.

Bu komandaların duelləriylə bağlı maraqlı məqamlar
// “Şamaxı” son 5 matçda qol vurub. “Sumqayıt” son 2 səfərdə uduzub.
// “Qəbələ” son 4 oyunda qol vurub. “Araz-Naxçıvan” bütün səfərlərdə qol buraxıb.

KƏNAN BAHADIR