Yığma şənbə günü çarter reysi ilə vətəni tərk edib. Yığma Ta’Qalidə yalnız bazar günü hazırlıq keçib. Belə ki, millinin oyunöncəsi məşqi yerli vaxtla saat 20.00-da başlayıb. Qurbanovun mətbuat konfransı isə bundan yarım saat tez start götürüb. İndi də Malta ilə duel ərəfəsində maraqlı informasiyaları diqqətinizə çatdıraq.
“Cırtdan”la 7-ci duel
Sentyabrın 10-dakı qarşılaşma Malta ilə 7-ci oyunumuz olacaq. İndiyədək baş tutan 6 dueldən 3-də rəqib, 2-də isə yığmamız qalib gəlib. Maraqlıdı ki, son dueli – 2:2 hesabı ilə bitən matçı nəzərə almasaq, qalan 5 qarşılaşmada tərəflərdən yalnız biri fərqlənib. Özü də “cırtdan”ın yığmamız üzərindəki axırıncı qələbəsindən 16 ildən də çox vaxt keçir. Geridə qalan 6 dueldən üçü yoldaşlıq, biri beynəlxalq turnir, ikisi isə AÇ-nin seçmə mərhələsi çərçivəsində baş tutub. İki il öncə keçirilən qitə birinciliyinə yollanmaq uğrunda baş tutan qarşılaşmalarda yığma rəqibindən 4 xal ala bildi. Ümid edək ki, bu dəfə hər iki oyunda qələbə bizim olacaq. Yığmanın “cırtdan”la indiyəqədərki matçlarının siyahısı ilə tanış olun:
19.04.1994. Ta’Qali. YO. Malta – Azərbaycan 5:0
06.02.2000. Ta’Qali. BT. Malta – Azərbaycan 3:0
17.04.2002. Ta’Qali. YO. Malta – Azərbaycan 1:0
14.08.2013. Bakı. YO. Azərbaycan - Malta 3:0
28.03.2015. Bakı. AÇ. Azərbaycan - Malta 2:0
06.09.2015. Ta’Qali. AÇ. Malta – Azərbaycan 2:2
Klublar və başqa millilər
Malta təmsilçiləri ilə avrokuboklarda da bir neçə dəfə münasibətləri aydınlaşdırmışıq. Klublarımız 4 cəhddə “cırtdan” ölkənin komandasını yolundan kənarlaşdırmağa çalışıb. Bunlardan üçündə uğurlu olmuşuqsa, birində Malta klubu sevinib. Bu ölkənin təmsilçiləri ilə duellərdəki uğurlu seriyanı bu il “Keşlə” davam etdirə bilmədi. Paytaxt təmsilçisi gözlənilmədən “Baltsan” önündə “ağ bayraq qaldırdı”.
2013. AL. Slima Uonderers – Xəzər Lənkəran 1:1, 0:1
2014. ÇL. Valletta – Qarabağ 0:1, 0:4
2016. AL. Baltsan - Neftçi 0:2, 2:1
2018. AL. Baltsan - Keşlə 4:1, 1:2
Aşağı yaş qrupları üzrə millilərimiz yalnız yoldaşlıq görüşləri və beynəlxalq turnirlərdə maltalı həmyaşıdları ilə qarşılaşıb. 4 il əvvəl U-21 yoxlama matçında bu rəqiblə qolsuz “sülh”ə razılaşıb. U-19 isə 3 il öncə “cırtdan”la 2 sınaq matçında münasibətləri aydınlaşdırıb. Yığmamız hər iki qarşılaşmada böyükhesablı qələbə qazanıb (4:1, 3:0). 2013-cü ildə Yunanıstanda təşkil olunan beynəlxalq turnirdə U-17 maltalıları 1 cavabsız qolla məğlub edib. U-16 isə iki il öncə “qırmızı-qaralar”la oyunda darmadağın (0:3) olub. Qarşılaşma elə Maltada keçirilən beynəlxalq turnir çərçivəsində gerçəkləşib.
Qələbə görməyiblər
Malta bu il 4 yoldaşlıq oyununda qüvvəsini sınayıb. Lakin “cırtdan” bu qarşılaşmaların heç birində qələbə sevinci yaşaya bilməyib. Sınaq matçlarından ikisi martda baş tutub. Martın 22-də Ta’Qalidə Lüksemburqla qarşılaşan maltalılar minimal hesabla məğlub olub (0:1). Bu oyundan sonra hazırlığın davamı üçün Türkiyəyə yollanan “qırmızı-ağlar” martın 26-da Finlandiya ilə oyunda qüvvəsini sınayıb. Həmin görüş Malta üçün acınacaqlı hesabla bitib. Finlər “cırtdan”ın qapısından 5 cavabsız qol keçirib. FİFA-nın mayın sonu – iyunun əvvəlinə təsadüf edən “pəncərəsi” zamanı isə yığmanın rəqibi iki yoldaşlıq oyununda gücünü sınayıb. Həmin vaxt Malta Avstriyada təlim-məşq toplanışında olub. Mayın 29-da Ermənistanla gerçəkləşən qarşılaşmada qalib müəyyənləşməyib (1:1). İyunun 1-də isə “qırmızı-ağlar” Gürcüstanla münasibətləri aydınlaşdırıb. Bu oyun qonşularımızın minimal hesablı (1:0) qələbəsi ilə yekunlaşıb.
FARİZ