“Vytis”in heyətində 7 braziliyalı çıxış edir”
Xəbər verdiyimiz kimi, oktyabrın 3-dən 6-dək ölkə çempionu “Araz” futzal üzrə Çempionlar Liqasında iştirak edəcək. Artıq təmsilçimizin bütün rəqibləri müəyyənləşib. Bu həftənin əvvəlində ÇL-in ilkin təsnifat mərhələsinə yekun vuruldu ki, belədə Naxçıvan təmsilçisinin daha iki rəqibinin adı bəlli oldu. Beləliklə, əsas mərhələdə 8-ci qrupda mübarizə aparacaq “Araz” “Luçeneç” (Slovakiya), “Vytis” (Litva) və “Valletta” (Malta) komandaları ilə münasibətləri aydınlaşdıracaq. Qarşılaşmalar oktyabrın 2-dən 7-dək Slovakiyada təşkil olunacaq. İlk iki oyunda (uyğun olaraq, “Vytis” və “Valletta”) ilkin mərhələdən vəsiqə qazanan komandalarla qarşılaşacaq təmsilçimiz son matçını meydan sahiblərinə qarşı keçirəcək.
Ötən ay təlim-məşq toplanışına start verən və hazırlığını gündə bir məşqlə Bakı İdman Sarayında davam etdirən “Araz”ın baş məşqçisi Joze Alesio da Silva qrupla bağlı federasiyanın rəsmi saytına açıqlama verib: “Qrupumuzda hansı komandaların yer aldığını bilirik. Hər biri ölkəsinin çempionudu. Bu gün futzalda “zəif klub” anlayışı yoxdu. Buna görə də oyunların hamısının çətin keçəcəyi danılmazdı və buna hazır olmalıyıq. Qarşılaşmalar Slovakiyada keçiriləcək və bu, meydan sahibi “Luçenec” komandası üçün əlavə üstünlük olacaq. Digər iki rəqibimiz mübarizəyə ilkin mərhələdən başlasa da, iddialıdılar. Litva çempionu “Vytis” heyətini braziliyalı futzalçılarla gücləndirib. “Valletta” də sıradan rəqib deyil. Çünki həm “Vytis”, həm də “Valletta” ilkin mərhələni məğlubiyyətsiz başa vurub və mübarizəni davam etdirmək hüququ qazanıb”.
Şanslar barədə danışan baş məşqçi qrupda aşkar favoritin olmadığını vurğulayıb: “Düzdü, reytinqinə görə “Araz” qrupun top-komandası sayılır. Ancaq şanslar komandalar üçün bərabərdi. Əlbəttə, şansımız var və bu, 50-nin 50-yədi”.
Alesio heyətdəki dəyişikliklərə də toxunub: “Məşqlərimizi hər gün davam etdiririk. Xüsusilə də birinci oyuna diqqət yetirəcəyik. “Vytis”in heyətində 7 braziliyalı çıxış edir. Bizim heyətdə də dəyişikliklər olub. Yerli futzalçılarla güclənməyə çalışdıq. Əlbəttə, rəqibin braziliyalılarını zərərsizləşdirmək üçün məşqlərdə bir neçə taktiki çalışmalar yerinə yetiririk. Həm də ilk oyunlar digərləri ilə müqayisədə ağır olur. Təbii ki, hər üç qarşılaşma vacibdi. Birinci matçdan sonra diqqətimizi ikinci duelə yönəldəcəyik. Rəqiblərimizin hamısını yaxından tanıyıram”.
MİRAĞA