Yığmanın Kosovo ilə oyunu Qurban Qurbanov üçün xüsusi əhəmiyyət daşıyır. Belə ki, təcrübəli mütəxəssis ilk dəfə millini rəsmi qarşılaşmaya çıxaracaq. Əsas komanda daha öncə Qurbanovun rəhbərliyi altında 6 oyun keçirib. Maraqlıdı ki, bu qarşılaşmalarda qeydə alınan nəticələr say baxımından bərabərdi: 2 qələbə, 2 heç-heçə, 2 məğlubiyyət. Xatırladaq ki, yığma həmin yoxlama matçlarında Qırğızıstan (3:0) və Latviyanı (3:1) üstələyib, Moldova (0:0) və Makedoniya (1:1) ilə “sülh”ə razılaşıb, Belarus (0:1) və Qazaxıstana (0:3) məğlub olub. Yoldaşlıq matçlarındakı nəticələrin o qədər də önəm daşımadığını bilirik. Odu ki, bütün diqqətlər rəsmi görüşlərə yönəlib. Bu mənada Millətlər Liqasındakı ilk matçdan çox şey asılıdı. Adı çəkilən turnirdə iddiamız böyükdüsə, marafona qələbəylə start verməliyik.
Elə Qurban Qurbanov da UEFA-nın rəsmi saytına açıqlamasında Millətlər Liqasının önəmindən danışıb: "Deyə bilərik ki, Avropa çempionatının final mərhələsinə çıxmaq üçün əla şansımız var. Amma nəzərə alaq ki, turnirdə iştirak edən digər yığmalar da bizim kimi düşünür. Belə olan halda isə məsuliyyət daha da artır. Hamı komandadan nəticə gözləyir. Ona görə də təzyiq həmişə olur. İndi hamı düşünür ki, Avropa çempionatına çıxmaq məhz Millətlər Liqasındakı matçlardan asılı olacaq. Baş məşqçi kimi isə mən turnirin bizim üçün ağır olacağını başa düşürəm. Üstəlik hamının sizdən qələbə gözləməsi istər-istəməz həyəcan və məsuliyyəti artırır".
Yeri gəlmişkən, Kosovonun baş məşqçisi Bernar Şalland da Bakıya səfər ərəfəsində keçirdiyi mətbuat konfransında maraqlı fikirlər səsləndirib: "Bu komandada yalnız Millətlər Liqası üçün yox, gələcək üçün də çalışıram. Kosovonu 2 yaşlı körpə də adlandırmaq olar. Amma o, daim böyüyəcək və yaxşı gələcəyi olacaq. Əsas narahat olduğum məqam müdafiəçilərimizin öz klublarında oynamamasıdı. Ona görə də təlim-məşq toplanışında hər bir futbolçunu diqqətlə izləyib, əsas heyətə layiq olanı meydana buraxmaq istəyirəm. Həmçinin yoldaşlıq görüşlərində qeydə alınan nəticələrə aldanmaq olmaz. Bu, bizim üçün təhlükəli ola bilər. O ki qaldı ilk rəqibimizə, Azərbaycan güclü və aqressiv komandadı. Hesab edirəm ki, bu qrupda birinci yeri tuta bilərlər. Ona görə də ehtiyatlı olmalıyıq. Mərhəmət hissindən söhbət gedə bilməz. Bakıda mümkün olan hər şeyi edəcəyik".
FARİZ