Nə qələbə qazanmışıq, nə də qol vurmuşuq
Kosovo ölkəmizin əsas yığmasının indiyədək üz-üzə gəlmədiyi rəqiblərdəndi. Eləcə də klublar, qadın milliləri, futzal və U-17 haqda da eyni sözləri demək olar. Ancaq digər yığmalarımız daha öncə qarşılaşıb. Həm U-21, həm U-19, həm də U-16 kosovolu həmyaşıdları ilə üz-üzə gəlib. Gəlin, həmin qarşılaşmalarda hansı nəticələrin qeydə alındığını yada salaq.
Başlayaq U-21-dən. Kosovo ilə rəsmi oyunlarda məhz “gənclər yığmamız” qarşılaşıb. Hazırda davam edən Avropa çempionatının seçmə mərhələsində U-21-in rəqiblərindən biri “göy-sarılar”dı. Rəşad Sadıqovun rəhbərlik etdiyi milli bu komanda ilə həm evdə, həm də səfərdə münasibətlərini aydınlaşıdırıb. Ötən il noyabrın 14-də Bakıda reallaşan dueldə qalib müəyyənləşmədi – 0:0. Həmin vaxt U-21-in “sükanı arxasında” Samir Ələkbərov idi. Daha sonra yığma Sadıqova tapşırıldı və bu il martın 22-də milli yeni baş məşqçinin rəhbərliyi altında balkanlılarla üz-üzə gəldi. Həmin görüşdə isə Kosovo 2 cavabsız qola sevindi.
U-19 “göy-sarılar”la bu il iki yoldaşlıq oyunu keçirib. Hər iki sınaq matçı yanvarda Antalyada baş tutub və ikisi də kosovoluların eyni hesablı qələbəsi (1:0) ilə başa çatıb. U-16-ya gəlincə, ötən ilin noyabrında Türkiyədə ənənəvi “Kuşadası Beynəlxalq Turniri” keçirildi. Milli həmin yarış çərçivəsində kosovolu həmyaşıdları ilə üz-üzə gəldi və 0:2 hesabı ilə məğlub oldu.
Bir sözlə, Kosovo milliləri ilə indiyə qədər 5 oyun keçirmişik. Bu qarşılaşmalardan 4-də “göy-sarılar” qalib gəlibsə, yalnız 1-də heç-heçə qeydə alınıb. Hələ ki kosovolular üzərində qələbəmiz yoxdu. Dərd burasındadı ki, baş tutan 5 oyundan heç birində rəqib qapısına yol tapa bilməmişik. Ümid edək ki, yığma sentyabrın 7-də iki sindromu birdən qıracaq: həm Kosovonu qolla məyus edəcək, həm də ilk qələbəni qazanacağıq.
FARİZ