21 yaşadək futbolçulardan ibarət yığmamız Avropa çempionatının seçmə mərhələsi çərçivəsində İsraillə sabahkı oyuna hazırlığı davam etdirir. Bu qarşılaşma ərəfəsində heyətlə bağlı ciddi itki baş verib. Kapitan Bəhlul Mustafazadə zədələnib. "Qəbələ"li müdafiəçinin sabah start fiti saat 21.00-da "Dalğa Arena"da səsləndiriləcək oyunda meydana çıxmayacağı dəqiqdi. Məşqdə arxa bud əzələsindən zədə alan Bəhlul 5 gün sonra Norveçlə Mərdəkanda baş tutacaq oyunda da olmayacaq. Rəşad Sadıqov artıq düşərgəyə yeni mərkəz müdafiəçisi cəlb edib. "Sabah”ın üzvü, vaxtilə "Qarabağ"da çıxış edən Eltun Turabov hazırlıq prosesinə qoşulub. Qeyd edək ki, Eltun yığmamızda debütantdı.
Bu arada U-21-də yeni məşqçi təyinatı olub. "Qarabağ"ın əvəzedici komandasının çalışdırıcısı Borçe Xristov köməkçi məşqçi vəzifəsini yerinə yetirəcək. Makeodniyalı mütəxəssis daha öncə “Bakı” və “Qarabağ”da baş məşqçinin köməkçisi vəzifəsində çalışıb. O, U-21-in baş məşqçisi Rəşad Sadıqovun "Qarabağ"ın U-19-da da köməkçisi idi. Xatırladaq ki, Aftandil Hacıyev "Səbail"in baş məşqçisi təyin olunandan sonra U-21-də köməkçi məşqçi vəzifəsi vakant idi.
MİRAĞA