Kosovo ilə qarşılaşmanın stadionu bəlli oldu
Yığma Millətlər Liqasının ikinci turu çərçivəsində səfərdə Malta ilə qarşılaşçacaq. Sentyabrın 10-da keçiriləcək həmin oyunun biletləri satışa çıxarılıb. Biletlərin qiyməti 2 avrodan başlayır, 5 və 10 avroya isə daha yaxşı yerlərə bilet almaq mümkündü. Qeyd edək ki, Malta – Azərbaycan qarşılaşması Bakı vaxtı ilə saat 22.45-də başlayacaq.
Bu arada Maltanın baş məşqçisi Ray Farruciya Millətlər Liqasında Farer adaları və yığmamızla keçirəcəkləri oyunlardan danışıb. Çalışdırıcı millimizə qarşı ev matçındakı nəticənin onlar üçün daha vacib olduğunu bildirib: “Bu turnirə yaxşı fürsət kimi baxıram. Toplanışdan sonra hər şey pozitivdi. Avstriyada Ermənistan və Gürcüstana qarşı oyunlarımız oldu. Orda özümüzü göstərə bildik. İndi Farer adaları və Azərbaycanla qarşılaşmaya tam hazırıq. Bu turnirə başlamaq üçün çox istəkliyik. Futbolçularım tam gücdə oynaya biləcəklər. Azərbaycanla matç bizim üçün daha vacibdi. Çünki bu qarşılaşmanı evdə keçirəcəyik”.
Yeri gəlmişkən, Millətlər Liqasında yığmanın Kosovo ilə səfər matçının stadionu da müəyyənləşib. Qarşılaşma Priştina şəhərindəki “Fadil Vokkri” arenasında keçiriləcək. UEFA əsaslı təmir işlərindən sonra lazımi meyarlara cavab verən stadiona Millətlər Liqasının oyunlarını keçirmək üçün lisenziya verildiyini açıqlayıb. Kosovo – Azərbaycan matçının noyabrın 20-də baş tutacağını da bildirək. Kosovolular bu arenada ilk oyunu isə sentyabrın 10-da Farer adalarına qarşı keçirəcək.
FARİZ