"Keşlə" növbəti transferini həyata keçirib. Paytaxt təmsilçisi bir neçə müddətdi baxışda olan, sonuncu dəfə "Səbail"də çıxış edən Ruslan Əmircanovla münasibətləri rəsmiləşdirib. Cinah müdafiəçisi baş məşqçi Mladen Milinkoviçin müsbət rəyini ala bilib. Onunla mövsümün sonuna qədər sözləşmə imzalanıb.
Qeyd edək ki, 33 yaşlı futbolçu karyerası ərzində "Neftçi", "Karvan", "İnter" (indiki "Keşlə") və "Qəbələ" kimi iddialı komandalarda çıxış edib.
Dünən həmçinin “ASK Arena”nın mətbuat konfransı zalında “Keşlə”nin Müşahidə Şurasının sədri Zaur Axundov klubun bir qrup azarkeşi ilə görüşüb. Axundov komandaya göstərdikləri dəstəyə görə azarkeşlərə təşəkkür edib. “Keşlə”nin ötən mövsüm ölkə kubokundakı uğurunda azarkeşlərin də böyük payının olduğunu bildirən klub rəhbəri dəstəyin hər zaman göstəriləcəyinə ümidvar olduğunu bildirib. Sonra azarkeşlərə formalar hədiyyə olunub və əsas meydanda xatirə şəkli çəkdirilib.
MİRAĞA