Avropa çempionatının seçmə oyunu
B qrupu, 3-cü tur
Çexiya - Azərbaycan 5:0 (1:0)
Çexiya: 1. Yan Kunti, 2. Tomas Yelinek, 22. Yan Paluska, 4. Erik Hunal, 3. Adam Şevinski, 13. Albert Labik, 18. Lukas Ambros (21. Aleksandr Buzek, 76), 8. Andrey Kriçfaluşi (5. Matey Zitnu, 81), 10. Matey Şin (k) (20. David Planka, 67), 9. Matias Voyta (6. Matey Mikulenka, 67), 11. Lukaş Maşek (19. Tom Slonçik, 76).
Ehtiyat oyunçular: 16. Viktor Bayer, 12. Tomaş Kral, 14. Yan Xitru, 17. Marek Havran.
Baş məşqçi: Miçel Bilek.
Azərbaycan: 1. Səlim Həşimov, 3. Rüfət Abbasov, 44. İbrahim Ramazanov, 5. Emin Rüstəmov (k), 15. Raul Məmmədov, 2. Eşqin Əhmədov (21. Sənan Muradlı, 66), 11. Xəyal Əliyev, 10. Şahin Şahniyarov, 8. Emil Süleymanov (16. Hikmət Cəbrayılzadə, 66), 18. Oruc Məmmədov (17. Nihad Əhmədzadə), 9. Ağadadaş Salyanski (19. Sadiq Şəfiyev).
Ehtiyat oyunçular: 22. Xəyal Fərzullayev, 6. Fəxri Məmmədli, 7. Murad Məmmədov, 13. Elgün Dünyamalıyev, 14. Nadir Orucov.
Məşqçi: Fərid Namazov.

Qollar: L.Maşek, 40 (1:0). L.Ambros, 55 (2:0). L.Maşek, 59 (3:0). L.Maşek, 75 (4:0). D.Planka, 84 (5:0).
L.Maşek 63-cü dəqiqədə penaltidən yararlana bilməyib (qapıçı).
Vərəqələr: E.Əhmədov, 12. S.Həşimov, 22. A.Kriçfaluşi, 72. İ.Ramazanov, 90 - sarı.
Hakimlər: YOVAN KAÇEVSKİ, Daniel Vasilevski, Aleksandar Corcyevski, Krumislav Corcyev (hamısı Şimali Makedoniya).
10 oktyabr. Karvina. Şəhər stadionu. 2812 tamaşaçı.

17 (8) qapıya ("çərçivə"yə) zərbə 4 (2)
6 künc zərbəsi 0
2 ofsayd 2
15 qayda pozuntusu 6
1 (0) sarı (qırmızı) vərəqə 3 (0)
58 topa sahibolma (faizlə) 42

U-21 millimiz Avropa çempionatının seçmə mərhələsində növbəti matçını keçirdi. Əvvəlki görüşlərdə səfərdə Portuqaliyaya uduzan (0:5), evdə Bolqarıstanla heç-heçə edən (1:1) yığma bu dəfə çexiyalı həmyaşıdlarının qonağı oldu.

Təbii ki, məqsəd azı "sülh"ə nail olmaqla xal ehtiyatını artırmaq idi. Sən demə, meydan sahibləri bizim üçün xoşagəlməz sürprizlər hazırlayıb. Söhbət rəqibin millimizin qapısından 5 cavabsız top keçirməsindən gedir ki, çexlər bunun mesajını hələ ilk dəqiqələrdən verdi. 9-cu dəqiqədə cərimə meydançasına daxil olan Maşek Ağadadaşı keçər-keçməz bəxtini sınadı. Qeyri-dəqiq zərbənin ruhdan salmadığı Çexiya 14-cü dəqiqədə daha bir hücum qurduı. Şinin zərbəsindən sonra Səlimdən yayınan topu Raul qapı xəttindən uzaqlaşdırdı. Təzyiqi davam etdirən meydan sahibləri 25-ci dəqiqədə də fərqlənməyə yaxın oldu. Xoşbəxtlikdən top Kriçfaluşinin başla zərbəsindən sonra qapıdan aralı keçdi. Çexlərin ardı-arası kəsilməyən hücumları 40-cı dəqiqədə fayda verdi: Ambrosun ötürməsini qəbul edən Maşek hesabı açdı. O başqa məsələ ki, Ambros topu Raul, İbrahim, Emil, Emin və Şahinin müdaxilə cəhdlərinə rəğmən, komanda yoldaşına çatdırdı. Millimiz birinci hissədə cəmi bir dəfə, daha doğrusu, 35-ci dəqiqədə qol vurmaq imkanı qazandı ki, Rüfət qeyri-dəqiq zərbə ilə yadda qaldı.

İkinci yarı millimiz üçün qorxulu yuxunu xatırlatdı. Fasilədən daha istəkli qayıdan çexlər 55-ci dəqiqədə Yelinekin məhsuldar ötürməsi, Ambrosun qolu sayəsində fərqi artırdı. Və təəssüf ki, meydan sahiblərinə hesabı darmadağın həddinə çatdırmaq üçün çox vaxt lazım olmadı. Buna 59-cu dəqiqədə Labikin çatdırdığı topu tora qovuşduran Maşek nail oldu. 63-cü dəqiqədə isə nəfəsimizi tutmağa məcbur qaldıq. Çünki Kaçevski Eşqinin Ambrosun qapı önünə çatdırmaq istədiyi topa əllə toxunduğunu gördüyündən "nöqtə"ni göstərdi. Hər halda, topun arxasına keçən Maşek Səlimlə bacarmadı. İş ondadı ki, bu da komandamızı növbəti qollardan xilas etmədi. 75-ci dəqiqədə Maşek Labikin, 84-də isə Planka Mikulenkanın ötürmələrini qolla tamamladı. Görünür, U-21-ə "ümid millisi" deməyə əsasımız yoxdu! Və bu yığma oktyabrın 14-də keçiriləcək növbəti matçda Bakıda Şotlandiyanı sınağa çəkəcək.

Qeyd edək ki, qrupun digər matçında Portuqaliya Bolqarıstanı evdə 3:0 hesabıyla məğlub edib.

1. Portuqaliya 4 3 1 0 10-0 10
2. Çexiya 3 3 0 0 9-1 9
3. Bolqarıstan 4 1 2 1 4-4 5
4. Şotlandiya 3 1 0 2 12-4 3
5. AZƏRBAYCAN 3 0 1 2 1-11 1
6. Cəbəllüttariq 3 0 0 3 1-17 0

KƏNAN BAHADIR