Topaz premyer-liqasının 3-cü turu arxada qaldı və çempionatda 20 günlük “pəncərə” yarandı. Sözsüz ki, hər kəs millinin oyunlarına görə yaranan uzun fasiləyə yaxşı əhval-ruhiyyədə yollanmaq istəyirdi. Meydan sahiblərinin ovqatı daha çox korlandı. Hər halda, evdə oynayan komandalardan heç biri qələbə qazana bilmədi.
Turun açılış matçında “Qəbələ” ilə “Sumqayıt” üz-üzə gəldi ki, ötən tur “Sabah”ı darmadağın edən “gənclik şəhəri” təmsilçisində özünəinam artmışdı. Təsadüfi deyil ki, hesabda geri düşməsi və üstəlik, azlıqda qalması da Nazim Süleymanovun yetirmələrinin mübarizə əzminə təsir etmədi. Ancaq səfərdə əldə olunan 1 xalı baş məşqçinin ayağına yazmaq lazımdı. Onun sona yaxın müdafiəçini forvardla (Ülvi İsgəndərov “Qəbələ”nin yetirməsidi) əvəzləməsi gedişatı dəyişdi və beləliklə, “qırmızı-qaralar” “sapı özündən olan balta” (bərabərlik qolunun müəllifi Yusif Nəbiyev də bölgə təmsilçisinin “şinel”indən çıxıb) ilə vuruldu. Çətin rəqibdən səfərdə qoparılan xalın “Sumqayıt”ın düşərgəsində atmosferə yaxşı mənada təsir edəcəyi şübhəsizdi. Həm də nəzərə alsaq ki, 4-cü turdakı rəqib “Qarabağ” olacaq.
Şənbə günü baş tutan digər matçda isə “Zirə” və “Sabah” münasibətlərinə aydınlıq gətirdi. Debütant açılış turunda olduğu kimi, yenə hər kəsi təəccübləndirdi. Əslində heyətində Marko Deviç kimi qolçu olan komandanın bərabərsəviyyəli rəqib üzərində qələbəsi sürpriz sayılmamalıdı. Bu dəfə dublla yadda qalan ukraynalı meydana çıxdığı üçüncü oyunda da fərqləndi və bombardirlərin yarışında mövqeyini möhkəmləndirdi. Ötən qış fasiləsindən sonra “relsdən çıxan” “Zirə” isə deyəsən, özünə yeni baş məşqçi axtarışına başlayacaq. Hər halda, Ayxan Abbasov komandanı yeni mövsümə də hazırlaya bilməyib. Mümkündü ki, rəhbərlik uzun fasiləni fürsət bilib yeni məşqçi gətirsin.
Bazar günü baş tutan qarşılaşmalar da maraqlı nəticələrlə yadda qaldı. Günün ilk oyununda “Səbail” “Keşlə”nin qonağı oldu. Çempionata çox pis başlayan, ilk turda “Qəbələ” səfərində darmadağın olan, ikinci turda “Qarabağ” önündə heç nə edə bilməyən Bayıl təmsilçisi qolsuz və xalsız qalmışdı. Bu uğursuz gedişat davam edəcəyi halda, Aftandil Hacıyevin postu əməlli-başlı laxlayacaqdı. “Keşlə” ilə matça böyük təzyiq altında çıxan “Səbail” nəhayət ki, uğursuzluğa son qoya bildi. Kevin Kubembanın dublu sayəsində rəqibini üstələyən “Səbail” böhranı arxada qoydu. Belə desək, Kevin bu dublu ilə eyni zamanda Aftandil Hacıyevi də xilas etdi. İndi Hacıyev rahat şəkildə milliyə görə yarananş fasilədən istifadə edib, durumu düzəltməyə çalışacaq.
Turun mərkəzi oyunu isə “Azərsun Arena”da baş tutdu. Tərəddüdsüz deyə bilərik ki, ilk 3 turun ən baxımlı oyunu məhz “Qarabağ” – “Neftçi” qarşılaşmasıdı. Sürət, çoxsaylı qol vəziyyətləri, azarkeş fəallığı, gərginlik pik səviyyədə idi. Qələbəni sona 20 dəqiqə qalmış əldən verməsinə rəğmən, 1 xalı “Neftçi”nin hesabına yazmaq gərəkir. Roberto Bordinin Azərbaycanda ilk derbisindəki səfər xalı sayəsində “Neftçi” son 4 il ərzində çempionata ən uğurlu startla yadda qaldı. 2014/15 mövsümünə 9 xalla başlayan “ağ-qaralar” 2015/16-nın ilk üç oyununda 4, 2016/17-də 3 xal toplamışdı. 2017/18-in ilk üç matçında isə, ümumiyyətlə, xal qazanmayan “Neftçi” ilk dövrəni məğlubiyyətsiz oyunlar seriyası ilə başa vura bilər.
Topaz premyer-liqası
1-ci dövrə, 3-cü tur
25 avqust
Qəbələ - Sumqayıt 1:1
Zirə - Sabah 0:2
26 avqust
Keşlə - Səbail 1:2
Qarabağ – Neftçi 1:1
1. Neftçi 3 2 1 0 5-2 7
2. Sabah 3 2 0 1 4-4 6
3. Qəbələ 3 1 1 1 5-3 4
4. Sumqayıt 3 1 1 1 5-4 4
5. Qarabağ 2 1 1 0 3-1 4
6. Səbail 3 1 0 2 2-6 3
7. Keşlə 3 0 1 2 3-5 1
8. Zirə 2 0 1 1 2-4 1
Bombardirlər: Marko Deviç (Sabah) – 4, Mahir Mədətov (Qarabağ), Kevin Kubemba (Səbail) – 2.
Növbəti turun oyunları: 15 sentyabr – Sumqayıt – Qarabağ, Səbail – Zirə; 16 sentyabr – Sabah – Qəbələ, Neftçi – Keşlə.