AFFA azarkeşlərə sürpriz hazırlayıb
Ötən saylarımızdan birində Azərbaycan – Kosovo matçının biletlərinin bu həftə satışa çıxarılacağını xəbər vermişdik. Bu haqda məlumatı AFFA-nın bilet satışı üzrə meneceri Kamran Abasovdan almışdıq. O, satışın avqustun 11-15-i aralığında start götürəcəyini demişdi. Lakin hələ də bu qarşılaşmanın biletləri ilə bağlı gözlənilən elan verilməyib.
Qeyd edək ki, Kosovo ilə görüş yığmanın Millətlər Liqasında ilk oyunudu. Sentyabrın 7-də keçiriləcək oyun Bakı Olimpiya Stadionunda (BOS) gerçəkləşəcək və saat 20.00-da start götürəcək. Bu oyun təkcə 3-cü qrupun yox, ümumiyyətlə, D divizionun önəmli qarşılaşmalarından sayılır. Yığma hədəfini rellaşdırmaq istəyirsə, bu oyunda qalib gəlməlidi. Kosovonun heyətində Avropanın tanınmış klublarında top qovan oyunçuların kifayət qədər olduğunu da bilirik. Rəqib nəinki 3-cü qrupun, hətta D divizionunun favoritlərindən biridi. Bu üzdən yığmamızın bu rəqiblə dueli turnir perspektivi baxımından böyük önəm daşıyır. Özü də həmin oyunda yığma Qurban Qurbanovun rəhbərliyi altında ilk rəsmi matçına çıxacaq. Ancaq bu cür əhəmiyyətli qarşılaşmanın biletlərinin hələ də satışa çıxarılmaması sual doğurur. Çünki azarkeşlərin bilet əldə etmək üçün elə də çox vaxtı qalmayacaq.
Bunu nəzərə alaraq dünən Kamran Abasovla yenidən əlaqə saxladıq və məlum oldu ki, AFFA azarkeşlərə sürpriz hazırlayıb: “Çox güman, billet satışı gələn həftənin bazar ertəsi başlayacaq. Azarkeşlərin bilet əldə etməsi ilə bağlı problem yaranmayacaq. Çünki 9 satış məntəqəsi fəaliyyət göstərəcək. Yubanmanın səbəbi? Belə deyim, azarkeşlərə sürprizlər var. Qarşıdakı günlərdə bunun nə olduğu açıqlanacaq”.
FARİZ