“Sumqayıt"ın qapıçıya ehtiyacı var, mənim də oynamağa”
“Keşlə”də Kamran Ağayevin kölgəsində qalan və heç cür “1 nömrə” ola bilməyən Orxan Sadıqlı azı qışa kimi karyerasını “Sumqayıt”da davam etdirəcək. Bir neçə gün idi ki, tərəflər qapıçının keçidini müzakirə edirdi. Nəhayət, dünən ortaq məxrəcə gəlinib. Düzdü, Sadıqlı “gənclik şəhəri” təmsilçisində icarə əsasında çıxış edəcək. Həm də bakılılar onun uzun müddətə yox, qışa qədər “Sumqayıt”da oynamasına razılıq verib. Orxan “Sumqayıt”da oynamağa, “Sumqayıt”ın da onun xidmətinə ehtiyacının olduğunu deyir: “Artıq “Sumqayıt”ın oyunçusuyam, sabahdan (bu gündən) yeni komandamda məşqlərə qatılacam. İlk növbədə "Keşlə" rəhbərliyinə keçidimə şərait yaratdıqlarına görə təşəkkürümü bildirirəm. Hələ mövsümün hazırlığına yeni başlayanda "Sumqayıt"dan mənə təklif gəlmişdi. Ancaq Avroliqaya hazırlaşırdıq, getməyim yaxşı qarşılanmazdı, ona görə "Keşlə"də qalmağa üstünlük verdim. Görürəm ki, "Sumqayıt"ın da qapıçıya ehtiyacı var, mənim də oynamağa. Oynamağım üçün ən yaxşı variant olduğuna görə dəyərləndirdim. "Sumqayıt" məni heyətində görməyi çox istədi, bizim rəhbərliklə danışdılar və ortaq məxrəcə gəldilər. Məni 6 aylığa icarəyə götürüblər. Yanvara qədər "Sumqayıt"da oynayacam. Bundan sonra ola bilsin, "Keşlə"yə qayıtdım. Hələ heç nə bilinmir. "Keşlə" ilə növbəti mövsümün sonuna qədər müqaviləm var.
"Keşlə" hədəfləri olan klubdu. Rəhbərlik də, baş məşqçi də qalmağımı, ikinci güclü qapıçıya ehtiyac duyduqlarını deyirdilər. Ancaq mən oynamaq istəyirəm. Kamran Ağayevi də başa düşürəm, millinin əsas qapıçısıdı, o da oynamalıdı. Burda Kamranla əsas heyətə düşmək uğrunda nə qədər mübarizə aparsaq da, nə qədər çalışsaq da, bilirdim ki, "Keşlə"də oynamaq şansım azdı. Çünki Kamran Ağayev millimizin "1 nömrə"sidi. Mənim üçün şans yaranıb ki, gedib özümü sübut edim. İnşallah, həm "Sumqayt", həm də mənim üçün xeyirlisi olar. Oynamalıyam ki, özümü inkişaf etdirim. "Sumqayıt"ın iki qapıçısı var. Mehdi Cənnətov ilk qarşılaşmada komandasına kömək etdi. Digəri Süleyman Süleymanovdu, çox gəncdi, 1999-cu il təvəllüdlüdü. Nazim Süleymanovu 2008-ci ildən tanıyıram. Onda "Bakı"nın əvəzedicilərdən ibarət komandasının baş məşqçisi idi. Onun rəhbərliyi altında qısa müddət də olsa, çalışmışam, təcrübəli mütəxəssisdi. İnanıram ki, işbirliyimiz uğurlu olacaq”.
MİRAĞA