Nazim Babayevi medaldan 2 sm ayırdı
Almaniyanın paytaxtı Berlində atletika üzrə Avropa çempionatına yekun vurulub. Bazar günü 3 idmançımız finalda yarışıb. Anna Skidan çəkicatmada 72,10 metr nəticəylə ilk “5-liy”i qapayıb. Üçtəkanla tullanmada iki təmsilçimiz mübarizə aparıb. Nazim Babayev medalın biraddımlığında qalıb. Gənclər arasında Avropa çempionu 16,76 metrə tullanaraq 4-cü yeri tutub. Onu bürünc medaldan cəmi 2 sm ayırıb. Əvəzində kubalı legioner Aleksis Kopello 16,93 metr nəticəylə “gümüş”ü boynundan asıb. Bu medalla yığmamız komanda hesabında Bolqarıstan və Slovakiya ilə 21-23-cü yerləri bölüşüb.
Yeri gəlmişkən, bir neçə gün əvvəl 200 metr məsafəyə qaçışda Avropa çempionu olmaqla yanaşı, şəxsi rekordunu yeniləyən (19,76) Ramil Quliyev son yarış günündə də Türkiyənin medal qazanmasına töhfə verib. 400 metr məsafəyə estafet qaçışının finalında son 100 metri möhtəşəm keçən həmyerlimiz komanda yoldaşlarıyla birgə gümüş medalın sevincini yaşayıb ki, bu da qaçışın bu növündə qardaş ölkənin atletika tarixində ən böyük uğur olub.
SƏRXAN