Renat Dadaşov debütdə penalti qaçırdı
“Trabzonspor”un qarşılıqlı razılıq əsasında müqaviləsinə xitam verdiyi Ramil Şeydayev özünə yeni komanda tapıb. “Krılya Sovetov”la adı yanaşı çəkilən hücumçu yay boyunca onun xidmətində maraqlı olan “Mattersburq”la anlaşıb. “Futbol11” saytının məlumatına görə, yığma üzvü artıq yeni klubunun düşərgəsinə qoşulub. Ancaq müqavilənin detalları məlum deyil. “Mattersburq” hazırda 3 xalla Avstriya çempionatında ilk “10-luğ”u qapayır. Bu komandanın Araz Abdullayevi də heyətinə qatmaq istədiyini xatırladaq.
Almaniyanın ikinci bundesliqasında 2-ci turun oyunları keçirilib. “Ertsgebirge” Auedə “Maqdeburq”un müqavimətini qıra bilməyib - 0:0. Dmitri Nazarov 58-ci dəqiqədə meydana çıxıb. 1 xalla 16-cı pillədə qərarlaşan “bənövşəyilər” növbəti turda “Köln”ün qonağı olacaq.
Türkiyənin 1-ci divizionunda yeni mövsümə ötən həftə start verilib. İlk turda “Girəsunspor” doğma meydanda “Əskişəhərspor”a qalib gəlib – 3:1. Ozancan Kökcü 69-cu dəqiqədə qazona ayaq basıb. “Boluspor” azarkeşləri önündə “Osmanlıspor”u üstələyib – 1:0. Ufuk Budak qələbəni ehtiyat oyunçular skamyasından izləyib. “Gənclərbirliyi” isə Ankarada eyni hesabla “Hatayspor”u məyus edib. Dəniz Yılmaz da sonadək ehtiyatda qalıb. İkinci turda “Girəsunspor” “Osmanlıspor”un, “Boluspor” “Elazığspor”un, “Gənclərbirliyi” isə “Altınordu”nun qonağı olacaq.
Portuqaliya sequndasında da yeni mövsüm başlayıb. “Kova Piedade” səfərdə “Gimaraynş”ın B komandasını məğlub edib – 1:0. Ancaq Dmitri Nağıyevin adı oyunun protokoluna salınmayıb. “Eştoril” isə azarkeşləri önündə “Portu”nun əvəzedicilərini darmadağın edib – 4:0. Renat Dadaşov 63-cü dəqiqədə meydana çıxıb. Rüfətin qardaşı yeni komandasında debüt oyununda qol vurmağa yaxın olub. Ancaq Dadaşov 85-ci dəqiqədə özünə qarşı kobudluğa görə təyin olunan penaltini dəqiq yerinə yetirə bilməyib. Rəqib qapıçı zərbənin istiqamətini tapıb. İkinci turda “Kova Piedade” Kovilya “Sportinq”ini qəbul edəcəksə, “Eştoril” səfərdə “Braqa”nın ikinci komandasını sınağa çəkəcək.
Ukrayna premier-liqasında 4-cü tur geridə qalıb. Mövsümə möhtəşəm başlayan “Aleksandriya” qələbə yürüşünü davam etdirir. Pavel Paşayevin komandası evdə Kiyev “Arsenal”ına da gücünü göstərib – 1:0. Yığma üzvü bu qarşılaşmanı da əvəzlənmədən keçirib. 12 xalla vahid lider olan “Aleksandriya” növbəti turda Kiyevdə “Dinamo” ilə üz-üzə gələcək.
Latviyanın 1-ci liqasında 13-cü turun oyunları keçirilib. “Dauqavpils” doğma meydanda “Qrobinas”ın daşını daş üstə qoymayıb - 9:0. Start heyətində yer alan Vüqar Əsgərov 57-ci dəqiqədə əvəzlənib. Həmyerlimiz 32-ci dəqiqədə penaltini dəqiq yerinə yetirib. Bununla da
millimizin sabiq forvardı qollarının sayını 13-ə çatdırıb. 28 xalla ilk “3-lüy”ü qapayan “Dauqavpils” növbəti turda “Auda” səfərinə yollanacaq.
Litva çempionatında isə təqvim bir qədər qarışıqdı. Belə ki, mövsümün sonuna hələ xeyli vaxt qalsa da, “Yonava” avqustun 12-də sonuncu – 28-ci turun matçına çıxıb. Bu komanda evdə “Trakay”la bacarmayıb – 1:3. “Kəpəz”in sabiq üzvü Tural Rzayev 90 dəqiqə oynayıb və 10-cu dəqiqədə sarı vərəqəylə cəzalanıb. Kamran Quliyev isə 76-cı dəqiqədə qazona ayaq basıb. 14 xalla sonuncu – 8-ci pillədə qərarlaşan “Yonava” ayın 18-də 22-ci tur çərçivəsində “Palanqa”nı qəbul edəcək.
SƏRXAN