Əvəzedicilər məhsuldar “sülh”ə razılaşdı
“Sumqayıt”ın ev oyunlarını keçirdiyi “Kapital Bank Arena”da təmir işləri davam edir. Yeni ot örtüyü salınacaq əsas meydanın suvarma sistemi tam hazır vəziyyətə gətirilib. Yaxın günlərdə əraziyə qum səpilməsinə start veriləcək. Arxa hissədə nəzərdə tutulan təbii örtüklü stadionda da eyni proseslər yerinə yetiriləcək. Standartlara cavab verən süni örtüklü meydana isə asfalt qatı döşənib, suvarma sistemi quraşdırılıb. Əldə etdiymiz məlumata görə, süni qazon döşənəcək meydan avqustun 20-nə kimi hazır olacaq və əvəzedici heyətin, akademiyanın müxtəlif yaş qruplarının ixtiyarına veriləcək.
Ötən sayımızda “Sumqayıt”ın düşərgəsində baxışda olan, ancaq həkim müayinəsindən üzüağ çıxa bilməyən Andrey Popoviçin yola salındığını xəbər vermişdik. “Neftçi” ilə oyun ərəfəsində Mehti Cənnətovun ümidinə qalan “kimyaçılar” hazırda qapıçı axtarışındadılar. Dünən əldə etdiymiz məlumata görə, bəzi yerli qolkiperlərlə maraqlanan “ağ-göylər”in rəhbərliyi sonda “Keşlə”nin “çərçivə qoruyucusu” Orxan Sadıqlının üzərində dayanıblar. Mənbəmizin sözlərinə görə, “Sumqayıt” “ağ-qaralar”la matça qədər onun keçidini rəsmiləşdirəcək.
Dünən isə “gənclik şəhəri”nin təmsilçisinin əvəzedici heyəti yoldaşlıq oyunu keçirib. Elbrus Məmmədovun komandası “Mehdi Hüseynzadə”də “Qaradağ Lökbatan”la qarşılaşıb. Matç 4:4 hesabı ilə başa çatıb.
RƏŞAD