"Səbail"in kapitanı Eltun Yaqublunun bazar ertəsi cərrahiyə əməliyyatı üçün Almaniyaya yollandığını xəbər vermişdik. Müdafiəçi artıq cərrah masasından qalxıb. Qeyd edək ki, “axil”ə yaxın arxa əzələsində cırıq olan 26 yaşlı Yaqulu digər azərbaycanlı futbolçular - Ruslan Abışov, Orxan Əliyev və Ehtiram Şahverdiyevin olduğu klinikada əməliyyat olunub. Münhen şəhərindəki klinikalardan birində baş tutan tibbi müdaxilə uğurlu alınıb. Komandanın baş məşqçisi Aftandil Hacıyevin verdiyi bilgiyə görə, həkimlər vaxtında müraciət olunduğunu deyiblər: "Alman həkimlər vaxtında cərrahi müdaxilə olduğunu bildiriblər. Hətta dediklərinə görə, bir qədər tez müraciət olsaydı, daha yaxşı olardı. Yəni əsas odu ki, gecikmə olmayıb və kapitanımız vaxtında əməliyyat olunub. Həkimlər Yaqublunun nə vaxt yaşıl meydana qayıda biləcəyi ilə bağlı hələ rəy verməyiblər. Bunu biləndən sonra Eltunun nə vaxt məşqlərə başlaya, oynaya biləcəyini deyə bilərik".
İlkin proqnoza görə, Eltun ən azı 3-4 ay yaşıl meydanlardan kənarda qalacaq.
“Səbail” baxışa gələn Edqar Paçeço ilə böyük ehtimalla münasibətlərini rəsmiləşdirəcək. Klub futbolçunun “chek-app”ını gözləyir. Qeyd edək ki, 28 yaşlı meksikalı yarımmüdafiəçinin sonuncu klubu Cənubi Kipr “Ermis”i olub. O, karyerası ərzində “Atlas”, “Uanl Tiqres”, “Leon”, “Mineros de Sakatekas”, “Keretaro”, “Kanvon”, “Əl-Nayma” kimi komandalarda çıxış edib. Paçeço Meksikanın əsas yığmasının heyətində 5 oyun keçirib və 1 qol vurmağı bacarıb.
MİRAĞA