Elbrus Məmmədov: “Qorxuram ki, bəzi “işbazlar” gənclərə də təsir göstərə”
Dünən AFFA-da növbəti mövsüm üçün birinci divizionda çempionatın hansı formatda keçiriləcəyi ilə bağlı toplantı olub. Bu haqda bilgini qurumun Mətbuat və İctimaiyyətlə Əlaqələr Departamentinin rəhbəri Firuz Abdulladan aldıq: “İclasda həm premyer-liqada çıxış edən klubların nümayəndələri, həm də birinci divizionda çıxış edən bəzi klubların rəsmi şəxsləri iştirak etdi. Söhbət əsasən divizionla bağlı hazırlanacaq konsepsiyadan getdi. Əvvəlcə 2018/19 “futbol ili”ndə əvəzedcilərə tətbiq olunacaq limitlə bağlı məlumat verilib və klublara heyəti buna uyğun qurmaq tapşırılıb. Əsas heyətdə yaş limiti 4+6+1 kimi olacaq. Yəni 4 nəfər 1998-ci ilə qədər doğulan, 6 nəfər 1998, 1999, 2000-ci il təvəllüdlü olan, 1 nəfər isə 2001-ci il. Premyer-liqanın əsas komandasından əvəzedici heyətə göndərilən futbolçular çempionatda oynaya bilərlər. Birinci diviziona gəlincə, AFFA aşağı dəstə ilə bağlı yeni konsepsiya hazırlayıb. İcraiyyə Komitəsinin müzakirəsinə veriləcək sənəddə əvəzedicilərin yarışının ləğvi nəzərdə tutulub. Həmin komandalar elita klublarının ikinci heyəti kimi divizionda mübarizə aparmalıdı”.
Əvəzedici komandaların yeni mövsümdən aşağı dəstədə çıxış edəcəyi ilə bağlı söz-söhbət hələ mayda ortaya çıxmışdı. Lakin həmin vaxt əksər klublar bundan imtina etmişdi. Bəs görəsən, dünənki toplantıda hansısa elita təmsilçisinin rəsmisi “ikincilər”in divizonda çıxış etməsinə etirazını bildirdi? Firuz bəyin məsələyə reaksiyası belə oldu: “Heç bir klubun rəhbərliyi yeniliyə etirazını bildirmədi. Onu da qeyd edim ki, növbəti mövsümdə aşağı dəstədə 14 komandanın iştirak edəcəyi gözlənilir. Onlardan 8-i əvəzedici komanda, 6-sı isə birinci dəstənin təmsilçisi olacaq”.
Məsələ ilə bağlı əvəzedcilərin baş məşqçiləırinin də fikirlərini öyrənməyi lazım bildik. Görəsən, onlar “ikincilər”in divizonda çıxış etməsini necə dəyərlənirir? Öncə “Qəbələ”nin baş məşqçisi Emin İmaməliyevlə əlaqə saxladıq: “Məncə, yeni qərar gələcək üçün atılan addımdı. Gənclərin “bərkiməsi” və ustalıq səviyyəsini artırmaq yönündə divizionda çıxış etməsi müsbət haldı. Ziyanlı tərəfi ondan ibarətdi ki, bəzi yaşlı futbolçular kənarda qalmalı olacaq. Ancaq onlar üçün də oynamaq şansı var. Bildiyim qədər divizionun 4 və ya 6 komandası yeni mövsümdə də medallar uğrunda mübarizə aparacaq. Tətbiq olunacaq limit də futbolumuzun sabahı üşün nəzərdə tutulub”.
“Sumqayıt”ın əvəzedici komandasının baş məşqçisi Elbrus Məmmədov isə yeniliyin həm müsbət, həm də mənfi tərəflərini qeyd etdi: “Deyərdim ki, 8 əvəzinə 14 komandanın mübarizə aparacağı çempionat daha maraqlı olacaq. Gənclərin inkişafı üçün bu daha yaxşı layihədi. Ancaq bir məqam məni narahat edir ki, bu da “qara işlərlə” bağlıdı. Qorxuram ki, bəzi “işbazlar” gənclərə də təsir göstərə, oyunların nəticələrini əvvəlcədən müəyyənləşdirələr. Ancaq toplantıda deyildi ki, buna görə narahat olmağa dəyməz və hər xırda detala ciddi nəzarət olunacaq, kənar qüvvələr çempionata təsiri edə bilməyəcək. Belə olarsa, baxımlı və maraqlı çempionat izləyəcəyik”.
RƏŞAD
