• Bayıl stadionunda quraşdırılmış süni ot örtüyü FİFA tərəfindən “Quality Pro” sertifikatına layiq görülüb. FIFA tərəfindən verilmiş bu keyfiyyət nişanı stadionunda beynəlxalq oyunların keçirilməsinə imkan verir.
• Xəbər verdiyimiz kimi, bu gün AFFA-nın təşkilatçılığı ilə 22 iyul – Milli Mətbuat günü ilə bağlı idman jurnalistləri üçün tədbir keçiriləcək. Artıq “Media futbol festivalı” adlı tədbirin proqramı da bəllidi. Saat 18.00 – 19.00 aralığlnda Bakı Olimpiya Stadionunda KİV nümayəndələrinin və AFFA əməkdaşlarının iştirakı ilə mini-turnir keçiriləcək. 4 komandanın mübarizə aparacağı turnir yarımfinal qarşılaşmalarından və final oyunundan ibarət olacaq. Saat 19.30-da isə şam yeməyi veriləcək. Futbol oynamaq üçün qeydiyyatdan keçmiş mətbuat nümayəndələri özü ilə idman geyimi gətirməlidi. Qalib komandaya AFFA-nın hədiyyələri təqdim olunacaq.
• 19 yaşadək futbolçulardan ibarət Azərbaycan yığması srağagün yoxlama oyunu keçirib. Bakı Olimpiya Stadionunun ehtiyat meydançasında “Qəbələ”nin əvəzedici komandası ilə qarşılaşan yığma 2:0 hesabıyla qalib gəlib. U-19-un heyətində Turan Vəlizadə dubl edib. Yığmanın baş məşqçisi Vüqar Məmməd oyunla bağlı fikirlərini affa.az saytına bildirib: “Qəbələ” bizim üçün çox güclü rəqib oldu. Bu oyunda futbolçuların xarakter göstərdiklərinin şahidi olduq. Təlim-məşq toplanışının uzunmüddətli olması taktiki baxımından faydalıdı. Komandanın hər oyun bu istiqamətdə inkişaf etdiyinin şahidi oluruq. Qələbə qazanmaq hər zaman xoşdu. Futbolçularımı təbrik edirəm. Məşqlərdə çox işləyərək, oyunumuzu daha da yaxşılaşdırmağa çalışacağıq”.
• AFFA-nın təşkilatçılığı ilə keçirilən Region Liqasının 2018/19 mövsümündə iştirak etmək istəyən komandalar üçün qeydiyyat prosesinə start veriləcək. Qeydiyyatdan keçmək istəyən komandalar iyulun 23-dən avqustun 25-dək AFFA-ya rəsmi məktubla müraciət edə bilərlər.
Əlaqə vasitəsi: regionliqa@affa.az