“Elşad Əhmədov ikinci divizion səviyyəsində məşqçidi”
“Sabah” Türkiyənin Bolu şəhərində təlim-məşq toplanışını davam etdirir. Elitanın debütantı dünən qardaş ölkədə ilk yoxlama oyununu keçirib. Paytaxtı klubu Türkiyənin birinci liqa təmsilçisi “Girəsunspor”la qarşılaşıb. “Göy-ağlar”ın məskunlaşdığı “Vonresort Abant” otelinin meydançasında keçirilən qarşılaşmada baş məşqçi Elşad Əhmədovun start “11-liy”i belə olub:
30. Saşa Stamenkoviç, 4. Tərzin Cahangirov, 5. Kərim Diniyev (k), 6. Vadim Abdullayev, 7. Vitali Kvaşuk, 11. Elgün Nəbiyev, 14. Tural Qürbətov, 19. Məqsəd İsayev, 21. Novruz Məmmədov, 27. Bəxtiyar Soltanov, 33. Eltun Turabov.
Mütəxəssis ikinci hissədə Ülvi İbazadə, Elvin Həsənəliyev, Cavid İmamverdiyev və Elvin Bədəlova da oynamaq fürsəti yaradıb. Hesabı paytaxt klubu açıb. Kvaşuk yeni komandasında ilk qolunu vurub. Ukraynalı futbolçu 55-ci dəqiqədə cərimə zərbəsini dəqiq yerinə yetirib. Ancaq türklər hesabı bərabərləşdirməyə müvəffəq olub. Matç 1:1 hesabıyla başa çatıb. “Sabah” növbəti yoxlama oyununu iyulun 21-də keçirəcək. Maraqlıdı ki, rəqibin kimliyi hələ də bilinmir.
“Sabah” paralel olaraq, heyəti formalaşdırmaqda davam edir. Bakılılar “Neftçi”nin daha bir sabiq futbolçusuyla ortaq məxrəcə gəlib. Vaxtilə flaqmanın Avroliqanın qrupuna yüksəlməsində pay sahibi olan Erik Ramos yenidən ölkəmizə qayıdacaq. 2012-16-cı illərdə ağ-qara formanı geyən paraqvaylı dayaq yarımmüdafiəçisi son iki mövsümü vətənində “Rubio Nyu”da keçirib. “Sabah” Ramosla birilliyə anlaşıb. Erik bu gün axşam saatlarında Boluda olacaq. Sabahdan isə tibbi müayinədən keçib, komandanın məşqlərinə qoşulacaq.
“Sabah” daha bir maraqlı addım atıb. Ramosla anlaşan debütant yenicə transfer etdiyi Yosip Braliçlə yolları ayırıb. Sportlife.az saytının iddiasına görə, xorvatiyalı dayaq yarımmüdafiəçisinin oyunu Əhmədovu razı salmayıb. Bu üzdən Elşad bəy onu yola salmağı rəhbərlikdən tələb edib. Futbolçu isə portala verdiyi müsahibədə çalışdırıcını günahlandırıb: “Gedişimi baş məşqçi istədi. Əvvəlcə 2 illik müqaviləyə qol çəkdim. İki həftədən sonra məşqçi məni istəmədi. Sonra xitam müqaviləsinə qol çəkdim. Səbəbini soruşdum. Baş məşqçi dedi ki, guya onun oyun üslubuna uyğun gəlmirəm. Bəyənmirdilərsə, onda niyə müqavilə bağlayırdılar? Amma mən buna inanmıram. Yəqin ki, başqa səbəbi var idi. Onun bu qərarını eşidən klub nümayəndələrinin hamısı şoka düşmüşdü. “Sabah” yaxşı klubdu, amma onun baş məşqçisi ikinci divizion səviyyəsindədi. Çünki o, nə məşqçi kimi, nə də insan kimi yaxşıdı. Üstəlik, təcrübəsizdi. Heç komandadakı legionerlərlə də normal münasibət qura bilmir. Müqavilənin pozulmasına görə kompensasiya almışam. Artıq vətənimdəyəm. Menecerim mənim üçün komanda axtarır. Ən yaxşı variantı seçəcəyik”.
SƏRXAN