“Sabah”ın yeni baş məşqçisinin adına aydınlıq gəldi. Xeyirli-uğurlu olsun! Rusiyalı Vasili Berezutskinin boşaltdığı posta litvalı mütəxəssis Valdas Dambrauskas əyləşdirildi.

Litvalı çalışdırıcı bu mənada zirək tərpənib, “Sabah”la sözləşməni üç il müddətinə bağlayıb. Bilir ki, “Sabah” rəhbərliyinin ipinin üzərinə odun yığmaq olmaz. Bir də gördün fikirlərini dəyişdilər, 3-4 aydan sonra onu da yola salmaq fikrinə düşdülər. Bir dünyanın işini bilmək olmaz, bir də “Sabah”ın rəhbərliyinin. Ona görə də Dambrauskas və onu “Sabah”la əlaqələndirən şəxslər reallığı düzgün qiymətləndiriblər.

Valdas Dambrauskasın keçmiş karyerasını vərəqləyəndə də görürük ki, üzü üzlər görmüş mütəxəssisdi. Qısa müddətdə xeyli klubda çalışmağa imkan tapıb. “Jalgiris”də üç il davam gətirə bilib. Amma bu da 11 il əvvələ təsadüf edib. Bir vaxtlar “Sabah”ın avrokuboklarda rəqibi olmuş RFŞ-in də yolu Dambrauskasla kəsişib. Amma bu iki komandanın real gücünü qiymətləndirəndə görürük ki, heç biri ciddi hədəfləri olan, böyük uğur qazanmış komanda sayıla bilməz.

Litva klubları bu gün Azərbaycanın hansı təmsilçisinə avrokuboklarda rəqib olsa, azarkeşlər bayram edər, turu keçilmiş sayarıq. Elə RFŞ ilə oyunlar da “Sabah”ın yaxın keçmişində əhəmiyyətli yer tutur. Murad Musayevin çalışdırdığı komandamız hər iki oyunda rəqibini məğlub etmiş, turu keçən tərəf olmuşdu.

Valdas Dambrauskasın çalışdırdığı klubların siyahısına baxanda nisbətən ciddilərlə son illərdə yollarının kəsişdiyini görürük. Söhbət “Hayduk”, “Ludoqorets” kimi adlardan gedir. Maraqlıdı ki, “Sabah”ın yeni baş məşqçisi bu komandaların heç birində uzun müddət duruş gətirə bilməyib. İşin içində olmadığımız üçün səbəblərin nə olmasından xəbərsizik. Ola bilsin, problem baş məşqçidə olmayıb, yaxud da ayrılıq qərarı Dambrauskasın uğursuz nəticələrindən sonra verilməyib. Rəhbərliklə baş məşqçi arasında heyət seçimi, yaxud da transferlərlə bağlı fikir ayrılıqlarının olması da mümkündü. Yəni belə hallar bizim futbolumuzda da tez-tez baş verir. Ona görə də birmənalı şəkildə fikir bildirməyə çətinlik çəkirəm. Amma fakt faktlığında qalır. Bizim səbəbləri bilməməyimiz belə həmin faktı dəyişmir ki, Valdas Dambrauskas qarşısına ciddi hədəflər qoyulan, strateji plan üzrə çalışan mütəxəssis deyil. Qısa desəm, litvalı mütəxəssis bir yerdə qərar tutmaqda çətinlik çəkir.

İndi durub “Sabah”ın rəhbərliyinə sorğu ünvanlayaq ki, Dambrauskası hansı keyfiyyətlərinə görə seçmisiz, onunla görüşdə məhz hansı xüsusiyyəti sizi cəlb edib ki, seçimi litvalının üzərində saxlamısız?! Heç şübhə etmirəm ki, bu suala səmimi və doğru cavab ala bilməyəcəyik. Maqsud Adıgözəlov müxtəlif manevrlər edəcək, ümumi sözlər söyləyəcək. Ona görə də vaxtımızı belə boş şeylərə sərf etməyək. Dəqiq olan bir məqam var ki, “Sabah”ın rəhbərliyi israrla azərbaycanlı məşqçilərdən üz çevirib, onlara etimad göstərmir. Rəhmətlik Arif Quliyev demişkən, “iti görüm, qurdu görüm, azərbaycanlı məşqçi görməyim”.

Onların yerli mütəxəssislərə münasibətdə belə davranış sərgiləməsinə təəssüflənirəm. Başa düşə bilmirəm ki, bu qədər ardıcıl şəkildə əcnəbilərə şans verib, onlara etimad göstərəndən və ciddi uğur qazanmayandan sonra nə üçün bircə dəfə də yerlilərə həmin şansdan vermək istəmirlər? Nə deyək, özləri bilsinlər. Bu inadkarlığın nə qədər davam edəcəyini demək də çətindi. Allah peşmançılıq verməsin.

AMAL