Heç birinin deməyə sözü olmadı
“Neftçi”də Tərlan Əhmədov erası başa çatandan sonra klubda müəyyən ixtisarlara ehtiyac duyuldu. Əhmədova yaxınlığı ilə seçilən bir çox məşqçi və klub rəsmilərinə qapı göstərildi. Və gedənlərin yerinə işə yeniləri cəlb olundu. Hazırda “ağ-qaralar”ın Avroliqaya, dolayı yolla növbəti çempionata hazırlaşdığını nəzərə alanda, bundan sonra “Neftçi”də hansısa ixtisarların, istefaların olacağını təsəvvür etmək olmazdı. Amma yox...
Bu yaxınlarda “Neftçi” rəhbərliyi daha iki mütəxəssislə yolların ayrılmasına qərar verib. Və hər ikisi vaxtilə futbolçu kimi ağ-qara formanı geyənlərdi. Biri futbol akademiyasında əlaqələndirici funksiyasını daşımış Kamal Quliyev, digəri U-16-ın baş məşqçisi olmuş Ruslan Qafitullin. Hər iki mütəxəssisə qapı göstərildiyindən, öz ərizələri ilə işdən azad olunublar.
Təbii, heç bir iş səbəbsiz olmur. Mütləq ki, qərarın arxasında duran bizə məlum olmayan nələrsə var. Əsl səbəbi üzə çıxarmaq üçün öncə Qafitullinlə danışmağı qərara aldıq. Dəstəyi götürən məşqçi danışmaqdan boyun qaçırdı: “Yas yerindəyəm, indi danışa bilmirəm. Başım bura qarışıb. İki-üç gün keçsin, ətraflı danışarıq”.
Qafitullinin ardınca Kamal Quliyevi aradıq. Şübhə etmirdik ki, daim açıq fikirli olması ilə seçilən, ağlındakıları heç kimdən çəkinmədən dilə gətirməyi bacaran Quliyev dəstəyi qaldırıb tutduğu vəzifədən uzaqlaşdırılmasının səbəbini deyəcək. Düzdü, dəstəyi qaldırdı. Sükan arxasında olduğunu, 30-40 dəqiqə sonra əlaqə saxlayacağını dedi. Həmin vaxt keçsə də, ondan səs çıxmadı. Məcbur olub yenidən əlaqə saxladıq. Lakin bu dəfə dəstəyi qaldırmadı. Başqa cür desək, danışmaqdan qorxdu, telefon arxasında gizləndi.
Belələrinə baxanda “Neftçi”dən kənarlaşdırıldıqlarına görə şükür etməli olursan. Cəsarətsiz, danışmaqdan qorxan adamların ölkənin ən köklü klubunda çalışması absurddu. Jurnalistlə ünsiyyət qurmağı bacarmayan, ağlındakı dilinə gətirməkdən qorxan mütəxəssislər uşaqlara nə öyrədəcək? Yaxud valideynlərlə nə danışacaq? Odu ki, “Neftçi” rəhbərliyinə “əhsən” düşür.
Kamal Quliyevin işində nöqsanı olmasaydı, sizi inandırım, mətbuata elə açıqlamalar verərdi ki, yer-göy titrəyərdi. Deməli, əyri əməlləri olub və bu səbəbdən danışmağa söz tapmır. Ruslan Qafitullin də onun kimi...
HƏBİB