Səbail - Sumqayıt 1:4 (1:1)
1. Hüseynəli Quliyev - 5,0
96. İlkin Muradov - 5,0
(83. Nihad Quliyev, 46) - 5,0
11. Rüfət Abdullazadə (k) - 6,0
(18. Süleyman Əhmədov, 73) - 5,0
19. Samir Abdullayev - 5,0
(21. Ayman Bouali, 63) - 5,0
16. Emin Rüstəmov - 5,0
67. Rəvan Abasov - 5,0
97. Oruc Məmmədov - 5,0
(8. Qorka Larusea, 73) - 5,0
88. Hacıəli Şirəliyev - 5,0
(89. Ömər Qurbanov, 63) - 5,0
44. Amir Bilali - 5,5
4. Marko Nikoliç - 5,5
14. Suleyman Alluş - 6,5
Ehtiyat oyunçular
12. Əlirza Müştəbazadə
25. Nicat Məmmədzadə
22. Mirabdulla Abbasov
20. Mərt Çəlik
3. Dmitri Litvin
5. Gitay Sofir
Baş məşqçi: Əbdülqəni Nurməmmədov
Komandanın ən yaxşısı: Suleyman Alluş

36. Xəyal Fərzullayev - 5,5
2. Sərtan Taşkın - 6,5
(14. Elvin Bədəlov, 60) - 5,5
17. Murad Xaçayev (k) - 5,5
8. Səbuhi Abdullazadə - 5,5
21. Nihat Əhmədzadə - 5,0
(23. Ronaldo Vaskes, 67) - 7,0
24. Sənan Muradlı - 6,0
75. Nadir Orucov - 5,0
(97. Vüsal Paşayev, 85) - qiymətsiz
12. Georgi Karaişvili - 6,5
99. Silvanus Nimeli - 5,5
(9. Bobir Abdixolikov, 67) - 6,0
5. Alan Dias - 5,5
77. Cəsurbek Cəloliddinov - 5,5
(19. Roy Kehat, 67) - 6,5
Ehtiyat oyunçular
1. Mehdi Cənnətov
56. Aftandil Arixov
7. Rövlan Muradov
30. Kamran Quliyev
20. Ayxan Süleymanlı
66. Ruslan Əliyev
11. Momo Yansane
Məşqçi: Şahin Abdullayev
Komandanın ən yaxşısı: Ronaldo Vaskes

Qollar: S.Alluş, 21 (1:0, R.Abdullazadə). S.Taşkın, 28 (1:1). G.Karaişvili, 58-p. (1:2). R.Vaskes, 79 (1:3, B.Abdixolikov). R.Kehat, 90+1 (1:4, S.Muradlı).
Vərəqələr: C.Cəloliddinov, 9 (qeyri-idman hərəkəti). İ.Muradov, 26 (qeyri-idman hərəkəti). N.Orucov, 48 (qeyri-idman hərəkəti). G.Karaişvili, 58 (qeyri-idman hərəkəti). M.Nikoliç, 83 (qeyri-idman hərəkəti) - sarı.
Hakimlər: RƏŞAD ƏHMƏDOV (Mingəçevir), Rahil Ramazanov, Sevda Nuriyeva, Elvin Bayramov (hamısı Bakı).
VAR hakimi: İnqilab Məmmədov (Bakı).
VAR hakiminin köməkçisi: Namiq Hüseynov (Bakı).
Hakim-inspektor: Vüsal Əliyev (Bakı).
AFFA nümayəndəsi: Zaur Hacıməhərrəmov (Bakı).
23 may. Bakı. “ASCO Arena”. 150 tamaşaçı (3200 yerlik).
Birinci hissəyə 1, ikinci hissəyə 2 dəqiqə əlavə olunub.
Oyunun qiyməti: 6,0.

Əslində hansısa ciddi turnir hədəfi qalmayan komandaların daha fərqli oyun tərzinə üstünlük verəcəyi gözlənilirdi. Ancaq "Sumqayıt"ın mövsümü 8-ci pillədə başa vurmaq ehtimalı, "Səbail"in "doğma divarlar" arasında premyer-liqa ilə vidalaşdığı qarşılaşmada layiqli oyun göstərmək istəyi hadisələrin axarına təsirsiz ötüşmədi.

Odu ki, mövsümün son turunun ilk matçının gözləniləndən maraqlı keçdiyini etiraf edə bilərik. Əlbəttə, bunda "dənizçilər"in yetərincə istəkli çıxışının böyük payı oldu. Əslində hələ 6-cı dəqiqədə hesab açıla bilərdi. Ancaq Alluşun uzaq məsafədən endirdiyi zərbədə dəqiqlik çatmadı. Lakin niderlandlı yarımmüdafiəçi çox keçmədən "günahını yudu". Daha dəqiqi, 21-ci dəqiqədə Rüfətin sağ cinahdan göndərdiyi topu ustalıqla qəbul edəndən sonra Sərtan, Nadir və Diasın arasından sıyrılaraq qapıya yol tapdı. Amma “dənizçilər”in hesabda üstünlüyü o qədər uzun sürmədi. "Sumqayıt" cəmi 7 dəqiqə sonra hesaba tarazlıq gətirməklə böyükhesablı qələbə üçün zəmin hazırladı - Cəsurbekin yerinə yetirdiyi cərimə zərbəsi Hüseynəliyə tuş gəlsə də, Sərtan topun meydanda qalmasından yararlanıb rəqibi cəzalandırdı.

Birinci hissə üçün qeyd olunası epizodların bununla tükəndiyini deməliyik. Ona görə ki, komandalar qalan vaxtda nəinki "dişə vurulası" hücum qurdu, heç rəqibin cərimə meydançasında görünməkdə də istək nümayiş etdirmədi.

İkinci hissədə bəxt "kimyaçılar"ın üzünə güldü. Çünki Cəsurbeklə üz-üzə qalan Hüseynəli çıxış yolunu rəqibi yerə sərməkdə gördü. Belədə Rəşad Əhmədov dərhal "nöqtə"ni göstərsə də, Sevda Nuriyevanın sözügedən epizodda ofsayd olduğunu düşündüyündən bayrağı havaya qaldırması ədalət təmsilçisinin VAR-a yollanmasıyla nəticələndi. Hər halda, penalti qərarı dəyişmədi və topun arxasına keçən Karaişvili 59-cu dəqiqədə "Panenka" zərbəsi ilə komandasını irəli çıxardı. "Gənclik şəhəri"n təmsilçisinin növbəti iki hücum cəhdi uğurlu alınmadı. Daha doğrusu, Səbuhinin fərqlənməsina dirək mane oldusa, Karaişvili qeyri-dəqiqlik üzündən dubla imza ata bilmədi. Odu ki, qonaqlar fərqi artırmaq üçün bir qədər gözləməyə məcbur oldu.

Nəhayət, 79-cu dəqiqədə Ronaldo Bobirin ötürməsindən maksimum faydalandı. Oyunda nöqtə ikinci hissəyə əlavə edilmiş vaxtda qoyuldu. 90+1-ci dəqiqədə cərimə meydançasına daxil olan Sənan çarəni topu Kehata çatdırmaqda gördü. İsrailli futbolçu komanda yoldaşının inamını doğrultdu - hesabı darmadağın həddinə çatdırdı.

Beləliklə, "Səbail" premyer-liqadan darmadağınla getdi, "Sumqayıt" isə 8-ci pilləyə yüksəldi. Ancaq "kimyaçılar"ın mövsümü burda başa vurub-vurmayacağı sabah keçiriləcək "Turan Tovuz" - "Kəpəz" matçının nəticəsindən asılıdı.

Gözdən qaçmadı
// Matçdan əvvəl "Misli" ilə PFL-in birgə keçirdiyi "Ayın qolu" layihəsi çərçivəsində aprelin ən yaxşı qolunun müəllifi olan David Qomis mükafatlandırıldı. Futbolçuya mükafatı PFL-in Media və marketinq direktoru Sənan Abdullayev təqdim etdi.
// "Kimyaçılar" və "Dənizçilər" fanklubu tribunalarda idi. Bayıllı azarkeşlər "gedirik ki, gələk, şəhər sizə əmanət, qonşular" sözlərinin yazıldığı pankart açmışdı.
// “Səbail”in mövsümdəki son ev oyununda cəmi 150 azarkeş var idi. Yeri gəlmişkən, martın 3-də keçirilən “Səbail” – “Şamaxı”, aprelin 27-də keçirilən “Səbail” – “Araz-Naxçıvan” oyunlarını da bu qədər adam izləmişdi.

KƏNAN BAHADIR