Dünən Azərbaycan Futzal Federasiyasının (AFF) iclası keçirilib. Federasiyanın prezidenti Zaur Axundovun rəhbərliyi ilə baş tutan toplantıda son 10 il ərzində görülən işlərə, həm milli, həm də klub səviyyəsində qazanılan uğurlara toxunulub. Axundov AFFA rəhbərliyinin bu sahənin inkişafı üçün federasiyaya böyük dəstək verdiyini qeyd edib, millinin 2020-ci ildə keçiriləcək dünya çempionatı ilə bağlı hədəfini açıqlayıb. Qeyd edilib ki, mundiala ilk dəfə 2016-cı ildə vəsiqə qazanan yığmanın növbəti DÇ-nin iştirakçısı olması üçün də lazımi şərait yaradılacaq. Strategiyanın saxlanılması şərtilə gənc futzalçıların milliyə dəvət edilməsi üçün də işlərin görüləcəyi vurğulanıb. Başa çatmış futzal mövsümü haqda müzakirələr aparılıb, eyni zamanda liqalarda yeni mövsümün təşkili və görüləcək işlər barədə tapşırıq verilib.
Federasiyanın strukturunda da dəyişikliklər edilib. Vitse-prezident Rəşad Həsənov tutduğu vəzifədən və İcraiyyə Komitəsinin üzvlüyündən azad olunması barədə müraciət edib. Zaur Hacı-Məhərrəmov yarışların təşkili və keçirilməsi üzrə əlaqələndirici, Fərrux Hüseynzadə isə mütəxəssis vəzifəsinə təyin olunub. Mövsümün startı ərəfəsində federasiyanın İcraiyyə Komitəsinə seçkilər keçiriləcək. Ağarza Rzayev, Turqay Fərzəliyev və Mahmud Sadıqov İcraiyyə Komitəsinin üzvlüyünə, Rəmiş Malıyev isə vitse-prezident vəzifəsinə namizəddi. Axundov qısa zamanda yeni mövsümün Əsasnaməsinin hazırlanması, iştirakçı komandaların sayının dəqiqləşdirilməsi, federasiyanın rəsmi saytının yaradılması və istifadəyə verilməsi ilə bağlı tapşırıq verib.
Onu da qeyd edək ki, Futzal Federasiyası əməkdaşların iş şəraitinin yaxşılaşdırılması, gündəlik iş prosesində istifadə məqsədilə Bakı İdman Sarayının rəhbərliyinə müvafiq otaqların ayrılması üçün müraciət edib. Müraciət müsbət cavablandırılıb.
FARİZ