Cavidin “Proqres”lə oyunda iştirak edib-etməyəcəyi dəqiqləşməyib
Sloveniyada təlim-məşq toplanışında olan “Qəbələ” 12-ci günü bir məşqlə yekunlaşdırıb. Baş məşqçi Sənan Qurbanovun rəhbərliyi altında gerçəkləşən hazırlıq prosesi fiziki və toplu çalışmalardan ibarət olub. Ardınca isə futbolçular ikitərəfli oyun keçirib.
Zədəyə görə bir müddət kollektivdən ayrı düşən, iyunun 27-də komandaya qoşulan Cavid Hüseynov bərpa xarakterli məşqləri davam etdirir. Yarımmüdafiəçi topsuz, fərdi şəkildə fiziki çalışmaları yerinə yetirib.
Yeri gəlmişkən, “qırmızı-qaralar”ın kapitanı klubun rəsmi saytına açıqlama verib. Komandasının təlim-məşq toplanışını dəyərləndirən təcrübəli futbolçu əhval-ruhiyyənin yüksək olduğunu bildirib: “Zədəmlə bağlı komandaya bir az gec qoşuldum. Komandada əhval-ruhiyyə yüksək səviyyədədi. Futbolçular arasında mehriban ünsiyyət hiss olunur. Oyunçularla baş məşqçi arasında peşəkarlığa söykənən yaxın münasibətlər var. Bu da sevindirici haldı. Sənan Qurbanov daha əvvəl bir neçə oyunluq komandaya baş məşqçi kimi rəhbərlik edib. Bu dəfə onun fəaliyyətinin uzunmüddətli və “Qəbələ” üçün uğurlu olacağına inanıram. Məşq prosesi də yaxşı səviyyədə keçir. Bütün oyunçuların səylə məşq etdiyi, inkişafa çalışdığı hiss olunur. Qarşıda bizi Avropa Liqasının 1-ci təsnifat mərhələsi çərçivəsində keçirəcəyimiz oyunlar gözləyir. Bu turnirdə yaxşı nəticə qazanmaq istəyirik”.
Yarımmüdafiəçi Lüksemburq “Proqres”i ilə ilk qarşılaşmaya qədər hazır olmağa çalışdığını qeyd edib: “Əsas müalicə dönəmini arxada qoymuşam. İki-üç günə komanda ilə kollektiv çalışmalara qoşulacam. “Proqres”lə ilk görüşdə iştirak edib-etməyəcəyim hələ dəqiqləşməyib. Zədədən sonra tam sağalsam belə, meydana çıxmağımla bağlı qərarı baş məşqçi verəcək. Komandanın uğuru üçün hansı addım məqsədəuyğundusa, o addım da atılacaq”.
Cavid Hüseynov Lüksemburq təmsilçisiylə bağlı fikirlərini də bölüşüb: “Rəqib barədə əldə etdiyimiz məlumatlara əsasən onları təhlil etmişik. Yetərincə ciddi rəqib, yaxşı komandadı. Komandamız da qarşılaşmaya ciddi yanaşır. Bizim üçün ən vacib olan nəticədi. Bunu istəyiriksə, rəqibi özümüzdən üstün saymalı, buna uyğun hazırlıq keçməliyik”.
Bu arada isə “qırmızı-qaralar”ın sabiq çalışdırıcısı, hazırda “Astana”nın “sükanı arxasında” olan Roman Qriqorçuk “Qəbələ”ni yada salıb. Qazaxıstan çempionatının son turunda “Ordabası”nı 5:3 hesabı ilə məğlub etdikləri oyunu şərh edən ukraynalı mütəxəssis yerli jurnalistlərdən birinin “sabiq klubunuz “Qəbələ” ilə “Astana”nı müqayisə edə bilərsizmi” sualına bu cür cavab verib: “İşlədiyim bütün komandalar və futbolçular mənə çox əzizdilər, hər birini sevirəm. Onları o qədər sevirəm ki, heç kimlə müqayisə edə bilmərəm. Onlar mənim üçün ən yaxşı olaraq qalırlar. İndi mənim komandam “Astana”dı. Hansı ki, mən onu möhkəm sevdim və bu komanda üçün çox şeyi qurban verməyə hazıram”.
Sonda “Qəbələ”nin Avropa Liqasının birinci mərhələsindəki rəqibi “Proqres”lə bağlı xəbəri sizlərə çatdıraq. Lüksemburq təmsilçisi hazırlıq çərçivəsində ilk yoxlama oyununu keçirib. “Arılar” Almaniya regional liqasında çıxış edən “Rehlinq Felklinqen”lə üz-üə gəlib. Qarşılaşma “qırmızı-qaralar”ın rəqibinin böyükhesablı qələbəsi ilə başa çatıb – 4:0.
RƏŞAD
