Sezarla Sohna hələ də komandaya qoşulmayıb
Avropa Liqasının 1-ci təsnifat mərhələsinin ilk oyununa hazırlıq çərçivəsində Bakı toplanışını başa vuran “Keşlə” artıq Türkiyədədi. Qızılcahamam vilayətinə üz tutan paytaxt təmsilçisi “Patalya” otelində məskunlaşıb. Komanda dünən səhər ilk məşqə çıxıb. Ancaq hələ ki məşqlər natamam heyətlə keçirilir. Belə ki, Ebriba Sohna ilə Sezar Meza Kolli hələ də komandaya qoşulmayıb. Sohnanın bu gün, Meza Kollinin isə bazar ertəsindən düşərgəyə təşrif buyuracağı bildirilir.
“Keşlə” iyulun 10-dək davam edəcək təlim-məşq toplanışı çərçivəsində üç yoxlama matçı keçirməyi planlaşdırır ki, ilk oyun sabah olacaq. Rəqib Bosniya və Hersoqovina təmsilçisi “Çelik”di. Tərəflər Boluda üz-üzə gələcək. Bosniyalılar orda qərarlaşdığından “Keşlə” səfərə çıxacaq. Qarşılaşma Bakı vaxtı ilə saat 17.00-da başlayacaq. İyulun 3-də baş tutacaq ikinci yoxlama matçında rəqib “Levadiya” olacaq. Estoniya təmsilçisiylə qarşılaşma da Bakı vaxtı ilə saat 17.00-da, bu dəfə Qızılcahamamda başlayacaq. Toplanış çərçivəsində son yoldaşlıq matçı iyulun 6-da keçiriləcək. Bu dəfə “Keşlə” Təbrizin “Traktorzasi” komandası ilə üz-üzə gələcək. Oyunun başlama vaxtı hələ dəqiqləşməyib. Bu haqda əlavə məlumat veriləcək. Yalnız o məlumdu ki, təbrizlilərlə duel də Qızılcahamamda baş tutacaq.
MİRAĞA