Şəhriyar Əliyev uzun müddətdi zədədən əziyyət çəkir.

“Turan Tovuz”un hazırda İstanbulda olan kapitanı bir neçə sualımıza cavab verdi.

- Sağlıq durumun necədi? Bərpa prosesi necə gedir?
- Müalicəm davam edir, fərdi məşqlərə başlamışam. Yəqin ki, mövsüm mənim üçün bitib. Son qərarı həkimlər verəcək.

- “Feysbuk”da İstanbuldan paylaşımlar edirsən. Sirr deyilsə, səfərin məqsədini deyə bilərsən?
- Müalicə prosesi burda davam edir.

- “Turan Tovuz”un bu mövsüm avrokuboklara vəsiqə qazanmaq hədəfi nə dərəcə realdı (söhbət dünənki oyundan əvvəl olub – red.)? Şansınız nə qədərdi?
- Çempionatda gərgin mübarizə gedir. “Zirə”, “Araz-Naxçıvan”, biz, “Sabah”, “Neftçi” kimi komandalar avrokuboka vəsiqə uğrunda mübarizə aparır. Kubokda da “Neftçi” ilə “Sabah” arasında ciddi mübarizə gedir. Mövsümü 3-cü yerdə bitirmək istəyirik. Dördüncü yeri tutsaq, “Araz-Naxçıvan”la “Qarabağ”dan birinin kuboku qazanmasını arzulayacağıq.

- “Turan Tovuz”un son ev oyununuzda azarkeş sayı baxımından antirekord oldu. Bunun səbəbi nədi? Veysəl Rzayevin “Səbail”lə oyundan sonra azarkeşlərlə dalaşması onları küsdürmüş ola bilərmi?
- Düşünmürəm ki, azarkeşlərimiz küsüb. Onlar həmişə bizim yanımızdadı. Avrokuboklara vəsiqə qazanıb azarkeşlərlə birgə sevinmək istəyirik.

- Veysəldən söz düşmüşkən, komandanın kapitanı kimi ona nəsə dedinmi?
- Müalicəmə görə bir aydı Türkiyədəyəm. Onunla danışmışam. Kapitan, böyük qardaş kimi lazım olan sözləri demişəm, başa salmışam. Özü də hər şeyi çox yaxşı başa düşüb, azarkeşlərimizdən üzr istəyib. Hər kəsi başa düşmək lazımdı. Futbolçular da qələbə qazanmaq istəyir.

- Kurban Berdıyevin qırmızı vərəqə almasını necə dəyərləndirirsən? Nə dərəcədə düzgün qərar idi?
- Həm məşqçidə, həm futbolçularda emosionallıq olur. 90+4-də etiraza görə birbaşa qırmızı vərəqə, 4 oyunluq cəza almışam. Oyunları televiziyadan izləyirəm, nə başverdiyini bilmirəm. Ona görə də nəsə deyə bilməyəcəm.

- “Turan Tovuz” qışda Hayderson Urtado, Martins De Paula, Orxan Əliyev, Rəhim Sadıxov, Anton Kraçkovski, Joarlem Batista kimi futbolçular transfer etdi. Bu transferlər ümidləri nə dərədəcə doğrultdu?
- Hər kəs komandaya xeyir verməyə çalışır. Düzdü, uyğunlaşma prosesi çətin gedir. Onları da başa düşmək olar, sistemimiz başqa komandalarla müqayiəsədə çətindi.

MÜZƏFFƏR QULUZADƏ