Zaur İsmayılov: "Orta sahəyə legioner axtarırıq"
Premyer-liqa klublarından hətta "Sabah"ın da hazırlıq planı, keçirəcəyi oyunların təqvimi tam bəllidi. Amma "Keşlə"nin başı fiziki çalışmalara qarışıb, sanki Yuri Maksimov yoxlama görüşü keçirməli olduğunu unudub. Hər halda, dünənə kimi nə oyun günləri, nə də rəqiblərdən hansınınsa adı bilinirdi.
Əvəzində heyətlə bağlı problemlər sürətlə yoluna qoyulmaqdadı. Nenad Stoyanoviç və Pərdis Fərcad-Azadla yollarını ayıran, "Sumqayıt"dan Azər Salahlı ilə Amil Yunanovu isə transfer edən paytaxt təmsilçisi əsas problemini də yoluna qoyub. Heç şübhəsiz, azarkeşləri komandanın lideri Sezar Meza Kolli ilə bağlı qeyri-müəyyənlik narahat edirdi. Bu məsələni də bitmiş saymaq olar. Sezar "Keşlə"də qalır. Bu barədə məlumatı qəzetimizə Maksimovun köməkçisi Zaur İsmayılov verdi: "Sezarla anlaşmışıq. O da "Keşlə"də qalır. Yalnız xırda texniki məsələlər qalır ki, o da qısa müddətdə yoluna qoyulacaq. Sezarla bağlı məsələni bitmiş saymaq olar. İki-üç transferlə heyəti tam komplektləşdirə, gücləndirə bilərik. Bizə əsasən orta sahəyə oyunçu lazımdı. Axtardığımız mövqeyə legionerlər dəvət olunacaq. Türkiyədə onlara baxacağıq".
Çox güman, paraqvaylı yarımmüdafiəçi Sezar Meza Kolli də birbaşa Türkiyəyə gələcək. Çünki komanda artıq sabah səfərə çıxacaq. İyunun 27-dən etibarən hazırlığın ikinci mərhələsi qardaş ölkədə davam etdiriləcək. "Keşlə" səfərə birbaşa reyslə yollanacaq. Mövsümlə bağlı Bakıdan Ankaraya birbaşa təyyarə reysləri xidmət göstərir ki, bakılılar da bundan yararlanacaq. Axı, "Keşlə" Ankara yaxınlığındakı Kızılcahamamda hazırlıq keçəcək. Komandanın məskunlaşacağı məkana gəlincə, bu, "Patalya" otelidi.
Paytaxt təmsilçisi Türkiyədə olacağı iki həftə ərzində 3 sınaq matçı keçirəcək. Bunu da köməkçi-məşqçi Zaur İsmayılovdan öyrəndik: "Kızılcahamamda əvvəlcədən nəzərdə tutulmuş plana əsasən üç sınaq matçı keçirəcəyik. Rəqiblər hələ dəqiqləşməyib. Razılıq əldə olunmadığına görə ad açıqlamağım düzgün çıxmaz. Amma oyun günlərimiz bəllidi. İlk yoxlama matçı ayın 30-na təyin olunub. Qalan iki qarşılaşma isə gələn ayın ilk həftəsinə salınıb. İkinci görüş iyulun 3-də olacaq. Yoxlama oyunları 6-da tamamlanacaq. Beləliklə, "Baltsan"la qarşılaşmaya tam hazır olacağıq".
MİRAĞA