Turan Tovuz - Sabah (Bakı) 2:1 (0:1)
41. Sergey Samok - 5,5 
17. Rəhim Sadıxov - 5,5 
(10. Xəyal Nəcəfov, 77) - qiymətsiz
88. Faiq Hacıyev - 5,5 
11. Ayxan Hüseynov -  6,0
(19. Orxan Əliyev, 77) - qiymətsiz
7. İsmayıl Zülfüqarlı - 5,5
(8. Tural Bayramlı, 90+4) - qiymətsiz
9. Kristian da Silva - 5,5
23. Alexandro Serrano - 5,5
15. Emmanuel Hakman (k) - 5,0
32. Hayderson Urtado - 5,5
40. Kauan Martins - 5,0
(90. Joarlem Santos, 46) - 5,5
21. Aleks Souza - 5,0
(6. Araş Qaderi, 83) - qiymətsiz
Ehtiyat oyunçular:
1. İvan Konovalov
71. Mehman Hacıyev
39. Sadiq Quliyev
33. Eltun Turabov
13. Fərid Yusifli
29. Anton Kraçkovski
Baş məşqçi: Kurban Berdiyev
Komandanın ən yaxşısı: Ayxan Hüseynov

92. Stas Pokatilov - 5,5
17. Tellur Mütəllimov - 5,0
9. Anatoli Nuriyev - 6,0
(99. Neqoş Kupusoviç, 67) - 5,5
5. Rəhman Daşdəmirov -  5,5
15. Seymur Məmmədov - 5,0
(6. Abdulax Xaybulayev, 77) - qiymətsiz
7. Boyan Letiç - 5,5
(11. Kahim Parris, 80) - qiymətsiz
4. Sofian Çakla - 5,0
18. Pavol Safranko (k) - 5,0
70. Cesse Sekidika - 5,5
(88. Xəyal Əliyev, 67) - 5,0
3. Con İrasabal - 5,0
33. Umarali Raxmonaliyev - 5,5
Ehtiyat oyunçular
1. Yusif İmanov
55. Nicat Mehbalıyev
8. Ayaz Quliyev
30. Mircamal Əlizadə
32. Elgün Dünyamalıyev
Baş məşqçi: Vasili Berezutski
Komandanın ən yaxşısı: Anatoli Nuriyev

Qollar: A.Nuriyev, 14 (0:1, P.Şafranko). A.Hüseynov, 56 (1:1, R.Sadıxov). J.Santos, 57 (2:1, A.Serrano). 
Vərəqələr: P.Safranko, 21 (qeyri-idman hərəkəti). C.Sekidika, 51 (qeyri-idman hərəkəti). R.Sadıxov, 63 (qeyri-idman hərəkəti). A.Hüseynov, 69 (qeyri-idman hərəkəti). H.Urtado, 82 (qeyri-idman hərəkəti) - sarı. P.Şafranko, 45+2 (qeyri-idman hərəkəti) - qırmızı (ikinci sarı). 
Hakimlər: ELÇİN MƏSİYEV, Elşad Abdullayev, Pərvin Talıbov, Kamranbəy Rəhimov (hamısı Bakı).
VAR hakimi: Cavid Cəlilov (Bakı).
VAR hakiminin köməkçisi: Akif Əmirəli (Bakı).
Hakim-inspektor: Ceyhun Haşımov (Bakı).
AFFA nümayəndəsi: Emin Cəfərov (Bakı).
Birinci hissəyə 2, ikinci hissəyə 4 dəqiqə əlavə olunub. 
Oyunun qiyməti: 5,5.

Bu qarşılaşma ən müxtəlif səbəblərdən prinsipiallıq daşıyırdı. Kurban Berdıyevlə Vasili Berezutski Rusiya futbol məktəbinin təmsilçisidi, deməli, “derbi” olacaqdı. Bundan başqa, kubokun cari mövsümündə məhz “Sabah”ın “Turan Tovuz”u mübarizədən kənarlaşdırması unudulmayıb.

Daha bir məqam: “Turan Tovuz” cari mövsümdə “Sabah”ı məğlub edə bilməmişdi. Bu komandaların duelində bakılıların bir qələbəsi və iki heç-heçə qeydə alınmışdı. Təbii ki, “Turan Tovuz” bu arzuolunmaz seriyaya son qoymaq istəyirdi. Bir qədər irəli gedib deyək ki, son qoydu da. “Sabah”ın niyyəti isə “Turan Tovuz”la aradakı xal fərqini “əritmək” idi. 

Matçın ilk dəqiqələri qarşılıqlı hücumlar şəraitində keçdi. 13-cü dəqiqədə Ayxan Hüseynov cərimə zərbəsindən qapı qarşısına ötürmə versə də, Pokatilov yerində idi. Cəmi bir dəqiqə sonra qonaqlar hesabı açdı. Sekidika - Daşdəmirov – Şafranko - Nuriyev kombinasıyasını sonuncu dəqiq zərbə ilə tamamladı.

17-ci dəqiqədə meydan sahibləri təhlükəli hücum qurdu. Tellurdan topu “oğurlayan” İsmayıl Seymurdan sıyrılandan sonra qapı qarşısına ötürmə versə də, Serranonun zərbəsi qeyri-dəqiq oldu. 19-cu dəqiqədə Ayxanın çiyni ilə itələyərək Rəhmanı yerdə qoyduğu anı referi qayda pozuntusu kimi dəyərləndirdi. Bu qərardan narazı qalan Kurban Berdiyev sərt şəkildə etiraz etsə də, FiFA referisi qırmızı vərəqə ilə onu cəzalandırdı. Baş məşqçinin cəzalanması sanki meydan sahiblərini bir qədər də qıcıqlandırdı. 30-cu dəqiqədə Martinsdən yayınan Sekidika qapını “nişan alsa” da, Samok topu küncə çıxarmağı bacardı. 41-ci dəqiqədə Faiq Hacıyev künc zərbəsindən birbaşa qapıya zərbə vurdu. Pokatilov ilk cəhddə uğursuz olsa da, Serranonun zərbəsinin qarşısını ala bildi. İlk yarıya artırılan son dəqiqədə Şafranko qapı qarşısına ötürmə verəndən sonra Urtadonun ayağını əzdi. Referi əvvəlcə oyunu davam etdirsə də, VAR-dan gələn qərardan sonra Pavola ikinci “sarı”nı göstərdi. Öz aramızdı, deyəsən, Şafranko tovuzlulara xətər yetirmək üzrə ixtisaslaşıb. Onun ayağını qırdığı Marandiçi hələ də yaşıl meydana dönə bilmir.

“Bayquşlar” bütün 2-ci hissəni azlıqda keçirməliydi. Belədə meydan sahiblərinin hücumların sayını artıracağı şübhə doğurmurdu. 56-cı dəqiqədə Tellurdan topu alan Kristian Rəhimə ötürmə verdi. Sadıxovun ötürməsindən sonra Ayxan Hüseynov dəqiq zərbə ilə hesabı bərabərləşdirdi. Cəmi bir dəqiqə sonra Tovuz stadionunun tribunaları yenidən coşdu. İkinci hissədə oyuna qoşulan Batista komandasını hesabda önə keçirdi. Ayxan uzaqdan bəxtini sınasa da, Çaklaya dəyən top geri qayıtdı. Topu ələ keçirən Serrano qapı qarşısına ötürmə verdi. Batistanın ayaqla zərbə cəhdi uğursuz olsa da, başı ilə topu tora qovuşdurdu.

78-ci dəqiqədə Xəyaldan ötürmə alan Kupusoviç çevrilib zərbə endirsə də, top qapının üstündən keçdi. Son 12 dəqiqədə reallaşan qarşılıqlı hücumlar nəticəsiz qaldı. “Turan Tovuz” ilk “4-lük”dəki mövqeyini bir qədər də yaxşılaşdırdı. “Sabah” isə indi yalnız və yalnız kubokda “Neftçi”ni necə adlayacağını düşünməlidi. Çempionat “bayquşlar” üçün artıq bitib.

Gözdən qaçmadı
* Tovuzlu azarkeşlər Berdıyevin “qırmızı” almasına sərt reaksiya verdi. Stadiona yad əşyalar atmağa və hakimin ünvanına təhqirənamiz ifadələr işlətməyə başladılar.
* Berdıyevin “qırmızı” ilə cəzalandığı anda – 19-cu dəqiqədə köməkçisi Yunis Hüseynov da hakimin qərarına etiraz etdiyinə görə “sarı” aldı. 
* Oyundan öncə və sonra musiqili proqram təşkil olundu. 

ƏSƏD SEYİDOV