Dünən "Neftçi" Türkiyə toplanışı çərçivəsində ilk yoxlama oyununu keçirdi. Roberto Bordinin çalışdırdığı “ağ-qaralar” Makedoniya "Şkupi”si ilə qarşılaşdı. Bakı vaxtı ilə saat 18.00-da başlayan oyun flaqmanın məskunlaşdığı “Topuk Yaylası Resort and Sport” otelinin meydanında baş tutdu. Bu, Bordinin paytaxt təmsilçisinin "sükanı arxasında" ilk sınağı idi. Onun debüt matçında hansı nəticənin qeydə alınacağı maraq doğururdu.
"Neftçi" bu heyətlə mübarizə aparıb: 1. Səlahət Ağayev (94. Rəşad Əzizli, 65), 5. Anton Krivostyuk (26. Ömər Buludov, 86), 7. Namiq Ələsgərov (77. Elvin Sərkərov, 80), 8. Emin Mahmudov (4. Rəşad Eyyubov, 62), 9. Baqali Dabo, 10. Dario Federiko (22. Mirabdulla Abbasov, 55), 15. Ruslan Abışov (28. Slavko Braliç, 66), 17. Rəhman Hacıyev (51. Elçin Əsədov, 88), 21. Məhəmməd Mirzəbəyov (18. Tural Axundov, 66), 25. Kiril Petrov, 93. Soni Mustivar (70. Əli Şirinov, 88).
Ehtiyat oyunçular: 73. Nail Alışov, 37. Vüsal Əsgərov, 36. Xəlil Bəşirov, 6. Qoran Paratski.
Göründüyü kimi, yeni transferlərdən Dabo ilə Federiko ilk "11-lik"də yer alıb. Rəşad, Slavko və Tural isə ikinci hissədə meydana çıxıb. "Neftçi"nin ən son transferi olan Qoran matçı ehtiyat oyunçular skamyasından izləyib.
Sınaq görüşünə gəlincə, klubun "feysbuk" səhifəsində yaddaqalan epizodlar qeyd olunub. Belə ki, 13-cü dəqiqədə tir "ağ-qaralar"ın köməyinə çatıb. Az sonra Eminin fərqlənməsinə rəqib qapıçı mane olub. 25-ci dəqiqədə Petrovun ötürməsindən sonra Federiko "çərçivə qoruyucusu" ilə üzbəüz qalsa da, fürsəti dəyərləndirə bilməyib. Yarım saatın tamamında isə "Şkupi" təmsilçimizi həyəcanlandıran hücum təşkil edib. Hissənin sonuna yaxın "Neftçi" xeyli fəallaşıb. Əvvəlcə Mustivarın, ardınca Darionun vuruşu dəqiq alınmayıb. 43-cü dəqiqədə isə Rəhmanın zərbəsi təhlükəli olub. Cəmi 1 dəqiqə sonra Federiko da fərqlənməyə yaxın imiş. Bununla belə, ilk yarı qolsuz bitib.
İkinci hissənin əvvəlində Dario yenə də qeyri-dəqiq vuruşla diqqət mərkəzinə düşüb. 55-ci dəqiqədə Bordin braziliyalını Mirabdulla ilə əvəzləyib. Bundan 7 dəqiqə sonra "Neftçi" hesabı açıb. Məhz Mirabdullanın ötürməsindən sonra Namiq makedoniyalıları məyus edib. İtaliyalı çalışdırıcı isə qoldan sonra bir neçə dəyişikliyə əl atıb. 71-ci dəqiqədə Rəhman, bundan 4 dəqiqə sonra isə Namiq fərqlənə bilərmiş. Hacıyevə qeyri-dəqiqlik, Ələsgərova qapıçı mane olub. "Ağ-qaralar" növbəti qolu 86-cı dəqiqədə vurub. Abbasov gözəl zərbəylə "Şkupi"nin qapısına yol tapıb. Təmsilçimizə qarşı rəqibin heyətində sabiq “Qarabağ”lı Muarem Muaremin oynadığını da qeyd edək.
Beləliklə, "Neftçi" Bordinin rəhbərliyi altında ilk oyunda qələbəyə sevinib. Bakılılar növbəti sınaq matçını iyunun 28-də "Dunarea Kalarası"ya (Rumıniya) qarşı keçirəcək.
"Şkupi" ilə oyundan sonra Rəhman Hacıyev klub saytına bunları deyib: "Bu matçda vahid komanda kimi oynadıq. Çalışdıq ki, məşqçinin bütün tapşırıqlarını yerinə yetirək. Qələbə sevindirir, amma ən əsası rəsmi oyunlara qədər hazır olmaqdı. İyulun 12-də bizi çox çətin oyun gözləyir, buna hazır olmalıyıq. Hələ çox işləməliyik".
FARİZ