“Uypeşt” ölkəmizə gələcək ikinci Macarıstan klubu olacaq
Klublarımızın səbirsziliklə gözlədiyi an yetişdi. Çempionlar Liqasının və Avroliqaın ilk iki təsnifat mərhələsinin püşkü atıldı. “Qarabağ”ın ÇL-dəki rəqibi “Olimpiya” (Sloveniya) oldu. Avroliqadakı təmsilçilərimizə gəlincə, “Neftçi” “Uypeşt”lə (Macarıstan), “Keşlə” “Baltsan”la (Malta), “Qəbələ” isə “Proqres”lə (Lüksemburq) münasibətlərinə aydınlıq gətirəcək. Ötən sayımızda Sloveniya təmsilçisiləri ilə indiyəqədərki duelləri xatırlatmışdıq. İndi isə klublarımızın Macarıstan, Malta və Lüksemburq komandaları ilə qarşılaşmalarını yada salaq.
Lüksemburq
Maraqlıdı ki, Lüksemburq təmsilçiləri ilə 2016-cı ilədək qarşılaşmamışdıq. Lakin ardıcıl 3-cü mövsümdü püşk klubumuzu “cırtdanlar”la üz-üzə qoyur. Özü də ötən “futbol ili”ndə bu ölkənin iki komandası bizimkilərə rəqib oldu. Başqa sözlə, “Proqres” ölkəmizə gələcək 4-cü Lüksemburq təmsilçisi olacaq. “Cırtdanlar”la ilk duel Çempionlar Liqasına təsadüf edib. “Qarabağ” evdə məğlub etdiyi “Düdelanj”la səfərdə heç-heçə edib, mərhələ adladı. Yuxarıda qeyd etdiyimiz kimi, ötən yay Avroliqada iki duel baş tutdu. “Zirə” “Differdanj”ı hər iki oyunda məğlub etdisə, “İnter” (indiki “Keşlə”) uğurun davamını gətirə bilmədi. Paytaxt təmsilçisi “Fola”nı öz meydanında məğlub etsə də, səfərdə darmadağın oldu. Belə deyək, üç cəhddən ikisində bizimkilər, birində isə Lüksemburq təmsilçisi mərhələ adlayıb. Klublarımız 4, rəqib 1 qələbə qazanıb, 1 dəfə heç-heçə qeydə alınıb. Top fərqi də təmsilçilərimizin xeyrinədi – 9:6. Onu da bildirək ki, bzimkilər evdə bütün oyunlarda qalib gəlib, “doğma divarlar” arasında qol buraxmayıb.
2016. ÇL. Qarabağ – Düdelanj 2:0, 1:1
2017. AL. Zirə - Differdanj 2:0, 2:1
2017. AL. İnter - Fola 1:0, 1:4
Malta
Elə Malta təmsilçiləri ilə qarşılaşmalarımız da son illərə təsadüf edib. “Baltsan” isə bizə yetərincə tanış rəqibdi. Bu komanda 2-ci dəfə ölkəmizə səfər edəcək. “Cırtdan” ölkə təmsilçisi 2016-cı ilin yayında AL-in 1-ci təsnifat mərhələsində “Neftçi” ilə qarşılaşıb. Maraqlıdı ki, səfərdəki 2:0 hesablı qələbədən sonra “ağ-qaralar” evdə uduzdular. Lakin 1:2 hesablı məğlubiyyətə baxmayaraq, “Neftçi” mərhələ adlayan tərəf oldu. Bundan başqa, bizimkilərin Malta klubları ilə daha 2 dəfə yolu kəsişib. 2013-cü ildə “Xəzər Lənkəran” “Slima”nı, növbəti il “Qarabağ” “Valletta”nı mübarizədən kənarlaşdırıb. Ümumiyyətlə, indiyəqədərki duellərdə 4 qələbə qazanmışıq, 1 heç-heçə etmişik, 1 məğlubiyyət almışıq. Top fərqi də xeyrimizədi – 10:3.
2013. AL. Slima - Xəzər Lənkəran 1:1, 0:1
2014. ÇL. Valletta – Qarabağ 0:1, 0:4
2016. AL. Baltsan – Neftçi 0:2, 2:1
Macarıstan
Malta və Lüksemburqdan fərqli, indiyə qədər Macarıstan klublarından yalnız biri ilə üz-üzə gəlmişik. “Qəbələ” iki il öncə Avroliqada MTK ilə qarşılaşıb. “Qırmızı-qaralar” hər iki oyunda rəqibə qalib gəlməklə mərhələ adlayıb. Bu isə o deməkdi ki, “Uypeşt” ölkəmizə gələcək 2-ci Macarıstan klubu olacaq.
2016. AL. MTK – Qəbələ 1:2, 0:2
FARİZ