Bəli, hokkey dünyasının böyük həvəslə izlədiyi rəqabətin lap son pərdələrinə gəlib çıxmışıq.

"Football-plus.az" xəbər verir ki, “Vaşinqton”un rusiyalı ulduzu Aleksandr Oveçkin Ueyn Qretskinin birvaxtlar əlçatmaz görünən rekorduna (894) addım-addım yaxınlaşır.

Ovi son 10 gündə daha dörd qol vurdu. O, “Filadelfiya” ilə oyunda (3:2) hesabı açdı, “Vinnipeq”lə oyunda (2:3 OT) bərabərlik qolunu vurdu, “Baffalo” ilə oyunda (5:8) da komandasının 4-cü qoluna imza atdı.

Dünən səhər saatlarında isə “Vaşinqton” səfərdə “Boston”a qalib gəldi. 3 oyunluq məğlubiyyət seriyasını qıran paytaxt klubunun qələbəsinə Oveçkin qol və məhsuldar ötürmə ilə töhfə verdi. Rusiyalının hesabında artıq 891 qol var.