Akademiyaya təyinatlar gerçəkləşdi
“Kapital Bank" ASC, "Paşa Həyat Sığorta" ASC-nin sponsorluğu, Təhsil Nazirliyi, Sumqayıt Şəhər İcra Hakimiyyəti, Sumqayıt Şəhər Təhsil Şöbəsi, "Azərikimya"nın dəstəyi və "Sumqayıt"ın təşkilatçılığı ilə Sumqayıt məktəbliləri üçün "Yay Futbol Düşərgəsi" layihəsinə start verilib. İyunun 20-də başlayan layihə 9 gün müddətində 3 qrup üzrə keçiriləcək. Ümumilikdə bu layihədə Sumqayıtda yerləşən 48 məktəb və liseyin tədris ilində fərqlənən 100-dən artıq oğlan və qız şagirdi iştirak edəcək.
Qeyd edək ki, ümumilikdə bu layihə 2014-cü ildən "Kapital Bank" və "Paşa Həyat Sığorta"nın sponsorluğu ilə keçirilir və bu müddət ərzində 400-dən çox məktəbli seminarın iştirakçısı olub.
Ötən saylarımızın birində “Sumqayıt”ın iyunun 25-də doğma şəhərdə bir araya gəlib təlim-məşq toplanışının ilk mərhələsinə başlayacağını xəbər vermişdik. Amma hazırlıq prosesi öncədən nəzərdə tutulduğu kimi “Mehdi Hüseynzadə”də baş tutmayacaq. Buna səbəb adı çəkilən arenanın ot örtüyünün bərbad vəziyyətdə olmasıdı. Bu üzdən komanda Bakıdakı stadionların birinə sığınmaq məcburiyyətində qalacaq.
Artıq hazırlığın sonunda “kimyaçılar”ın yoxlama görüşündə qarşılaşacağı rəqibin də adı məlumdu. Nazim Süleymanovun komandası elitanın debütantı “Sabah”la münasibətləri aydınlaşdıracaq. Matç iyulun 11-nə təyin olunub. Yeri gəlmişkən, onu da bildirək ki, 2 həftədən çoxdu “ağ-göylər”in baş məşqçisi təyin olunan Süleymanov hələ də köməkçilərinin adını açıqlamayıb.
Bu arada “gənclik şəhəri” təmsilçisinin Avstriyanın Şərq Regional Liqasında çıxış edən Vyana “Qarabağ”ının formasını geyən Elvin Bədəlovla danışıqlara başladığı haqda mətbuatda xəbərlər yayılıb. Yazılanlara inansaq, ötən yay “Neftçi”ni tərk edərək Avstriya təmsilçisinə üz tutan U-21-in sabiq üzvü yaxın günlərdə Azərbaycana qayıdaraq yeni klubu ilə müqavilə imzalayacaq. “Sumqayıt”ın mətbuat katibi Rəşad Məmmədov qəzetimizə açıqlamasında yazılanların doğru olmadığını, Bədəlovun “Sumqayıt”ın transfer siyahasında yer almadığını bildirdi.
Rəşad bəy bizimlə söhbətdə “Sumqayıt” Futbol Akademiyasının müxtəlif yaş qruplarına məşqçi təyinatının gerçəkləşdiyini də söylədi. Növbəti mövsümdə “kimyaçılar”ın U-19 komandasına Mehman Yunusov, U-17-yə Vüqar Quliyev, U-16-ya Zaur Hidayətov, U-15-ə Hikmət Hüseynov, U-14-ə Azad Mütəllimov, U-13-ə Zahir Əsgərzadə, U-10-a isə Elşad Eyvazov rəhbərlik edəcək. Mətbuat katibinin bizə verdiyi bilgiyə görə, U-11 və U-12 komandalarının çalışdırıcıları akademiyaya yeni qəbul ediləcək məşqçilərdən birinə tapşırılacaq. Onların kimliyinə isə yaxın günlərdə aydınlıq gələcək.
RƏŞAD