Yığmanın baş məşqçisi Fernando Santuş Haiti ilə Sumqayıtda keçirilən oyunda bir neçə futbolçuya ilk dəfə milli forma geymək şansı tanıdı.

Səbuhi Abdullazadə ilə Xəyal Əliyev 66-cı, Rəhman Daşdəmirov isə 81-ci dəqiqədə oyuna qoşuldu. Mənə elə gəlir ki, Səbuhi ilə Xəyal Əliyev start heyətində başlasaydı, daha ürəkaçan oyun görə bilərdik. Xəyal çox rahat görünürdü. Topla rahat rəftar edirdi, bir neçə dəfə təhlükəli ötürmə ilə yadda qaldı. Rəhman Daşdəmirov da oyuna pis qoşulmadı. Amma rəqibin 3-cü qolunda bir aldadıcı hərəkətlə “bazara getdi”.

Səbuhinin əmisi oğlu Rüfət Abdullazadəyə, Şamaxıda yaxşı mövsüm keçirən Edqar Adilxanovla Rüfət Abbasova, “Neftçi”dən Murad Məmmədova növbəti oyunlarda şans vermək də pis olmazdı.

MÜZƏFFƏR QULUZADƏ