Lixteynşteyndə atletika üzrə kiçik ölkələrin Avropa çempionatı keçirilib. Ötən ay Bakı çempionatında 100 metr məsafəni 11,69 saniyəyə qət etməklə özünə məxsus ölkə rekordunu yeniləyən Zəkiyyə Həsənova bu nəticəni bir qədər də yaxşılaşdırıb. Həmyerlimiz bu dəfə finişə 11,61 saniyəyə çatıb. Ancaq bu nəticəylə “cırtdan” ölkədə gümüş medal qazana bilib. Çempion isə Cənubi Kipr təmsilçisi Oliviya Fotopulo (11,49) olub. Bu yerdə nəzərinizə çatdıraq ki, Həsənova avqusta qədər çıxış edəcəyi yarışlarda nəticəsini 11,50 saniyənin altına salına bilsə, Almaniyanın paytaxtı Berlində keçiriləcək əsas Avropa çempionatına vəsiqə qazanacaq. Zəkiyyə 200 metr məsafəyə qaçışda 23,56 saniyə nəticəylə isə bütün rəqiblərini qabaqlayıb. Rahib Məmmədov da uğur qazanıb. Həmyerlimiz 110 metr məsafəyə sədlərlə qaçışda finişə 14,06 saniyəyə çatmaqla fəxri kürsünün ən yüksək pilləsinə qalxıb. Uzunluğa tullanma üzrə kişilərin yarışında Orxan Aslanov (7,31 metr) və qadınların mübarizəsində Yelena Pextireva (5,58) 6-cı yeri tutub.