1/4 final, cavab oyunu
Neftçi (Bakı) - Kəpəz (Gəncə) 1:0 (1:0)
Neftçi: 93. Rza Cəfərov (k), 8. Emin Mahmudov (17. Rəhman Hacıyev, 84), 3. Höccət Haqverdi, 19. Azər Salahlı, 13. Emil Səfərov, 99. Ervin Koffi (7. Azər Əliyev, 71), 44. Yuri Matias (47. Murad Məmmədov, 89), 24. Mustafa Sek, 9. Bassala Sambu, 18. Rinosuke Ohori (14. Edvin Kuç, 71), 11. Aleks Fernandes (91. Ağadadaş Salyanski, 71).
Ehtiyat oyunçular: 1. Emil Balayev, 30. Rustam Samiqullin, 10. Filip Ozobiç, 4. Elvin Camalov, 90. Ramil Şeydayev, 22. Dembo Darbo, 20. Alfa Konte.
Baş məşqçi: Samir Abasov.

Kəpəz: 1. Rojerio Santos, 2. İlkin Qırtımov (k), 7. Ehtiram Şahverdiyev, 12. Turan Manafov, 8. Elmir Tağıyev (99. Əli Səmədov, 64), 9. Luis Paçu (19. Sadiq Şəfiyev, 75), 29. Dioqo Verdaska, 28. Rati Ardazişvili, 11. Trent Buhagyar, 10. Karim Lkoça, 88. Şevroni Mabatşoyev (21. Camal Cəfərov, 64).
Ehtiyat oyunçular: 22. Məmməd Hüseynov, 18. Elgün Bayramov, 70. Nicat Süleymanov, 6. Nemət Musayev, 17. Ümid Səmədov, 26. Valdemar Almeyda, 78. Yeqor Xvalko.
Baş məşqçi: Azər Bağırov.

Qol: B.Sambu, 27.
Vərəqələr: İ.Qırtımov, 30 (qeyri-idman hərəkəti). A.Əliyev, 90 (hakimin qərarına etiraz) - sarı. B.Sambu, 58 (ciddi qayda pozuntusu) - qırmızı.
Hakimlər: RƏŞAD ƏHMƏDOV (Mingəçevir), Vüsal Məmmədov, Teymur Teymurov, Tural Qurbanov (hamısı Bakı).
VAR hakimi: Rəvan Həmzəzadə (Şəki).
VAR hakiminin köməkçisi: Kamran Bayramov (Bakı).
Hakim-inspektor: Orxan Məmmədov (Bakı).
AFFA nümayəndəsi: Emin Cəfərov (Bakı).
28 fevral. Bakı. “Neftçi Arena”. 650 tamaşaçı (11000 yerlik).
Yalnız ikinci hissəyə 3 dəqiqə əlavə olunub.
İlk oyun - 2:0.

Qələbəyə daha çox ehtiyac duyan “Kəpəz” ilk təhlükəli vəziyyəti 7-ci dəqiqədə yaratdı.

Gəncəlilər Ardazişvilinin ardıcıl cəhdləri sayəsində fərqlənməyə yaxın idi. Gürcüstanlı əvvəl Höccətin, ardından Rzanın ayıq-sayığlına görə uğursuz oldu. 14-cü dəqiqədə Sambu ələ düşən "yağlı tikə"ni oyundankənar vəziyyətdə olduğuna görə Koffinin öhdəsinə buraxdı. Fransalının qapıçıyla təkbətək mübarizədə uduzması "ağ-qaralar"ı üzdü. Dəqiq desək, Santos mövqeyini vaxtında tərk etməklə "sarı-göylər"i qoldan qorudu. Hesab 27-ci dəqiqədə açıldı. Sambu növbəti dəfə Koffiyə ötürmə versə də, komanda yoldaşı yenə eyni aqibətlə üzləşdi. İş orasındadı ki, bu dəfə Santosun kobud səhvi Gəncə təmsilçisinin hesabda geri düşməsiylə nəticələndi. Qolkiper üstünə gələn topa yiyələnmək əvəzinə meydana qaytardı. Belədə irəli atılan Sambu dəqiq zərbəylə tablodakı rəqəmləri "Neftçi"nin xeyrinə dəyişdi.

Birinci hissənin qalan dəqiqələri komandaların bərabərsəviyyəli performansıyla keçdi. Hər halda, ümumi hesabda 3 qolluq üstünlüyə malik "Neftçi" risk etmək istəmir, premyer-liqada qalmaq uğrunda mübarizədə çətin vəziyyətə düşən "Kəpəz" isə taleyi ilə barışmış kimi görünürdü. Bununla belə, 2-ci hissə cansıxıcı keçmədi. Hətta 51-ci dəqiqədə hücuma keçən "Kəpəz" fərqi azaltmaqla ümid çırağı yandıra bilərdi. Amma Mabatşoyev Buhagyarın cərimə meydançasına göndərdiyi topu sinəsiylə qarşıladıqdan sonra yaxın məsafədən tora qovuşdurmağı bacarmadı.

57-ci dəqiqədə isə gözlənilməz hadisə yaşandı. Sambu Eminin ötürdüyü topu qarşıladıqdan sonra dubl müəllifi olmaq məqsədilə hücuma keçdiyi anda onu dayandırmağa çalışan Elmirin ayağını tapdaladı. Bu üzdən futbolçuya "sarı" göstərən Əhmədov epizodu VAR-da incələdi və qərarını dəyişdi - Sambunu meydandan qovdu!

Meydan sahiblərinin azlıqda qalması qonaqların fərqlənməsi üçün daha əlverişli şərait vəd etsə də, "sarı-göylər" bundan yararlana bilmədi. Dəqiq desək, 67-ci dəqiqədə Rza baxımlı seyvlə yadda qaldı. O, Paçunun uzaqdan göndərdiyi topu barmaqlarının ucuyla uzaqlaşdırdı. Ardından Camal qeyri-dəqiq zərbə ilə yadda qaldı. "Neftçi"nin qeyd olunası hücum cəhdinə isə əsas vaxta əlavə olunmuş dəqiqələrdə şahidlik etdik. Hər halda, həmin epizodlar da hesabın dəyişməsiylə nəticələnmədi. Daha doğrusu, Rəhmanın tora qovuşdurmaq istədiyi top tirin üstündən keçdi.

Beləliklə, "Neftçi" yarımfinala vəsiqə qazandı və “Sabah”a rəqib oldu. Bizi bu iki paytaxt klubu arasında ölüm-qalım savaşı gözləyir. Axı hər biri yalnız kubok yolu ilə avrokuboklara vəsiqə qazana bilər.

Gözdən qaçmadı
// Günorta saatlarından bəri yağan qar ot örtüyündən tam təmizlənməmişdi. Yalnız cərimə meydançaları və meydandakı xətlər təmiz görünürdü. Qar dayanmadığından 70-ci dəqiqədə stadionunun personalı xətləri yenidən təmizləməli oldu.
// "Forza Neftçi" və "Xəmsə" fanklubları stadionda idi. Maraqlıdı ki, "Neftçi" azarkeşləri kəskin hava şəraitinə rəğmən, köynəklərini soyunmuşdular.
// Samir Abasov 58-ci dəqiqədə hakimin qərarına etiraz etdiyinə görə sarı vərəqə aldı.

KƏNAN BAHADIR