1/4 final, cavab oyunu
Zirə (Bakı) – Araz-Naxçıvan 0:2 (0:2)
Zirə: 13. Aydın Bayramov, 7. Məqsəd İsayev (11. Rüstəm Əhmədzadə, 61), 32. Qismət Alıyev (k), 8. İsmayıl İbrahimli, 4. Ruan Renato, 23. Rafael Utziq (70. İssa Cibrila, 61), 3. Ange Mutsinzi, 15. Pyer Zebli (17. Ayron Qomis, 46), 18. Junior Martins (10. Georgi Papunaşvili, 46), 6. Eldar Quliyev (90. Davit Volkov, 46), 19. Salifu Suma.
Ehtiyat oyunçular: 41. Anar Nəzirov, 97. Tyaqo Silva, 21. Hacıağa Hacılı, 16. Fuad Bayramov, 14. Elçin Əlicanov, 5. Stefan Aka.
Baş məşqçi: Rəşad Sadıqov.

Araz-Naxçıvan: 12. Kristian Avram, 5. Qara Qarayev (6. Vadim Abdullayev, 69), 34. Urfan Abbasov (k), 2. Slavik Alxasov, 24. Mustafa Əhmədzadə (7. Ülvi İsgəndərov, 81), 29. Vanderson Melo, 17. İssuf Paro, 23. Nuno Rodriges (22. Elçin Mustafayev, 86), 4. İqor Ribeyro, 97. Felipe Santos (9. Əyyub Allaş, 69), 10. Bernardo Dias (8. Karlos Jatoba, 81).
Ehtiyat oyunçular: 94. Tərlan Əhmədli, 3. Bəxtiyar Həsənalızadə, 20. Turan Vəlizadə, 11. Bayraməli Qurbanov, 71. Sənan Ağalarov, 21. Sezar Meza Kolli.
Baş məşqçi: Elmar Baxşıyev.

Qollar: F.Santos, 3-p. (0:1). F.Santos, 45-p. (0:2).
Vərəqələr: Q.Alıyev, 35 (hakimin qərarına etiraz). M.İsayev, 44 (qeyri-idman hərəkəti). S.Suma, 56 (qeyri-idman hərəkəti). İ.Paro, 80 (qeyri-idman hərəkəti). G.Papunaşvili, 90+3 (qeyri-idman hərəkəti). V.Melo, 90+3 (qeyri-idman hərəkəti) – sarı.
Hakimlər: İNQİLAB MƏMMƏDOV, Namiq Hüseynov, Rahil Ramazanov, Kamal Umudlu (hamısı Bakı).
VAR hakimi: Əliyar Ağayev (Bakı).
VAR hakiminin köməkçisi: Akif Əmrəli (Bakı).
Hakim-inspektor: Rəhim Həsənov (Bakı).
AFFA nümayəndəsi: Elçin Mehtiyev (Bakı).
28 fevral. Zirə. İdman Kompleksinin stadionu. 200 tamaşaçı.
Hər hissəyə 3 dəqiqə əlavə olunub.
İlk oyun – 0:1.

Səfərdə minimal hesabla uduzan “Zirə”nin yarımfinala vəsiqəyə can atacağı məlum idi. Amma “qartallar” oyun başlayan kimi uğursuzluq yaşadı.

Hesab artıq 3-cü dəqiqədə açıldı. Mustafa Əhmədzadə bir rəqibdən sıyrılıb Felipe Santosa doğru ötürmə versə də, Ruan topu ələ keçirdi. Renatodan topu almaq istəyən Santos ayağını irəliyə doğru atdı və rəqibin zərbəsi topa yox, Felipenin ayağına tuş gəldi. Referi dərhal “nöqtə”ni göstərdi. Topun arxasına keçən Felipe dəqiq zərbə ilə hesabı açdı. 20-ci dəqiqəsində Zeblinin Utziqə doğru ötürməsinin qarşısını alan Melo komandasının yeni hücumuna başladı. Amma Dias onun ötürməsinə çata bilmədi. 26-cı dəqiqədə Ruan – Martins - Suma kombinasiyasını sonuncu qeyri-dəqiq zərbə ilə bitirdi.

Qarşılıqlı hücumlar şəraitində davam edən oyunda naxçıvanlılar hissənin sonunda daha bir penalti qazandı. Bernardo zünc zərbəsindən qapı qarşısına ötürmə versə də, Məqsəd İsayev Urfan Abbasovun boynundan yapışaraq zərbə endirməsinə mane oldu. Daha sonra referi VAR-da epizoda baxdı və “nöqtə”ni göstərdi. Topun arxasına keçən Santos bu dəfə də Aydın Bayramovu məyus etməyi bacardı. Təbii ki, belə nəticədən sonra “Zirə”nin geridönüş etməsi möcüzə olardı. “Qartallar” artıq üç top vurmalıydı. Amma Rəşad Sadıqov təslim olmaq niyyətində deyildi. O, oyunun axarından kəskin narazı olduğunu 2-ci hissə başlayan kimi Qomis, Papunaşvili və Volkovu meydana buraxmaqla göstərdi.

“Zirə” 2-ci hissəyə fəal başladı. 52-ci dəqiqədə Alıyevin zərbəsini Avram dəf etdi. 57-ci dəqiqədə də meydan sahibləri fərqi azaltmağa yaxın oldu. Qismət qapı qarşısına ötürmə versə də, Utziqin zərbəsi az fərqlə qapıdan aralı keçdi. 65-ci dəqiqədə Papunaşvili uzaqdan bəxtini sınasa da, Avram yenə yerində idi. Cəmi bir dəqiqə sonra Sumanın zərbəsi qapıdan aralı keçdi. 79-cu dəqiqədə “qartallar”, nəhayət, rəqib qapısına yol tapmağı bacardı. Ancaq Volkov Papunaşviliyə ötürmə verərkən top meydanı tərk etmişdi ki, bu üzdən qol sayılmadı.

Bununla da “Zirə” kubok uğrunda mübarizədən çəkildi. “Araz-Naxçıvan” isə hər iki turnirdə yola davam edir, bəlkə də “Qarabağ”dan sonra avrokuboklara qatılmağa ən iddialı namizəddi.

Gözdən qaçmadı
* Felpe Santos qol sevincini qarın üstünə tullanmaqla qeyd etdi.
* Rəşad Sadıqov hakimin qərarına etiraz etdiyinə görə hələ 36-cı dəqiqədə sarı vərəqə aldı.

ƏSƏD SEYİDOV