Araz-Naxçıvan - Səbail 0:0
12. Kristian Avram - 5,5
5. Qara Qarayev - 5,5
(8. Karlos Jatoba, 81) - qiymətsiz
34. Urfan Abbasov - 5,5
2. Slavik Alxasov - 5,5
6. Vadim Abdullayev (k) - 5,0
(24. Mustafa Əhmədzadə, 61) - 5,0
29. Vanderson Melo - 5,5
17. İssuf Paro - 5,5
23. Nuno Rodriges - 5,5
(21. Sezar Meza Kolli, 61) - 5,0
97. Felipe Santos - 6,0
10. Bernardo Dias - 5,5
9. Əyyub Allaş - 5,0
(7. Ülvi İsgəndərov, 75) - 4,5
Ehtiyat oyunçular
94. Tərlan Əhmədli
99. Raul Əhmədzadə
22. Elçin Mustafayev
20. Turan Vəlizadə
11. Bayraməli Qurbanov
71. Sənan Ağalarov
57. Elcan Məmmədov
Baş məşqçi: Elmar Baxşıyev
Komandanın ən yaxşısı: Felipe Santos

1. Hüseynəli Quliyev - 6,0
96. İlkin Muradov - 5,5
74. Yusif Nəbiyev (k) - 6,5
77. Fərid Nəbiyev - 5,5
(97. Oruc Məmmədov, 86) - qiymətsiz
20. Mərt Çəlik - 5,0
(18. Süleyman Əhmədov, 68) - 4,5
11. Rüfət Abdullazadə - 5,5
(10. David Qomis, 77) - qiymətsiz
16. Emin Rüstəmov - 5,0
3. Dmitri Litvin - 5,0
7. Madi Queta - 5,5
5. Gitay Sofir - 5,5
(83. Nihad Quliyev, 86) - qiymətsiz
14. Suleyman Alluş - 5,5
Ehtiyat oyunçular
12. Əlirza Müştəbazadə
25. Nicat Məmmədzadə
22. Mirabdulla Abbasov
19. Samir Abdullayev
88. Hacıəli Şirəliyev
99. İnnosent Nşuti
Baş məşqçi: Cavid Hüseynov
Komandanın ən yaxşısı: Yusif Nəbiyev

Vərəqələr: E.Rüstəmov, 4 (qeyri-idman hərəkəti). U.Abbasov, 18 (qeyri-idman hərəkəti). N.Rodriges, 27 (qeyri-idman hərəkəti). V.Melo, 34 (qeyri-idman hərəkəti). K.Avram, 63 (qeyri-idman hərəkəti) - sarı.
Hakimlər: FƏRİD HACIYEV, Müslüm Əliyev, Rəhman İmami, Elvin Bayramov (hamısı Bakı).
VAR hakimi: Nicat İsmayıllı (Bakı).
VAR hakiminin köməkçisi: Cəmil Quliyev (Bakı).
Hakim-inspektor: Rəhim Həsənov (Bakı).
AFFA nümayəndəsi: Asif Əliyev (Bakı).
22 fevral. Bakı, "Liv Bona Dea Arena". 70 tamaşaçı (6500 yerlik).
Birinci hissəyə 1, ikinci hissəyə 4 dəqiqə əlavə olunub.
Oyunun qiyməti: 5,5.

Son 7 matçda cəmi bir qələbə qazanan "Araz-Naxçıvan"ın bu dəfə tilsimi qıracağına, bununla həm də üç oyunluq qələbə həsrətinə son qoyacağına inananların sayı az deyildi.

Mövsümün birinci yarısında göstərdiyi performansdan uzaq düşən, son 7 görüşdə cəmi iki dəfə qol sevinci yaşayan Muxtar Respublika təmsilçisi "doğma divarlar" arasında autsayderlə qarşılaşdığı oyunda mütləq özünü yaxşı tərəfdən göstərməliydi. Lakin bu dəfə də işlər Elmar Baxşıyevin istədiyi kimi getmədi. Qış fasiləsindən sonra xal ehtiyatını artırmaq baxımından sürət yığan, son 5 matçda yalnız "Qarabağ"a uduzan "Səbail" "Sabah" və "Turan Tovuz" kimi avrokuboklara iddialı rəqiblərlə yanaşı, naxçıvanlılardan da xal qopardı. "Qırmızı-ağlar" yenə qol imkanlarını sağa-sola xərclədisə, Mərdəkana hazırlıqlı, qələbə dalınca gəldiyi hiss edilən "dənizçilər" istəyinə çatmaq üçün əlindən gələni əsirgəmədi.

Matçda ilk təhlükəli vəziyyət 5-ci dəqiqədə qeydə alındı. Cərimə zərbəsini yerinə yetirən Slavik qeyri-dəqiq oynadığından hesabı erkən açmaq fürsətini qaçırdı. Ardınca hücuma keçən Bayıl təmsilçisi Quetanın fərdi reydi sayəsində xeyli irəlilədi. Cərimə meydançasına daxil olan qvineyalı həlledici zərbə üçün Alluşa güvəndi ki, sonuncu dirəyi "nişan aldı". Bir qədər sonra Paro Alxasovun uğursuzluğunu təkrarladı. Qeyri-dəqiqlik üzündən topu yaxın məsafədən tora qovuşdurmağa nail ola bilməyən müdafiəçi komandasını məyus etdi.

"Səbail"in növbəti hesabı açmaq cəhdi də yetərincə təhlükəli alındı. Sofir - Fərid - Alluş kombinasiyası 21-ci dəqiqədə Avramın kritik müdaxiləsinə tuş gəldi. Meydanda qalan topu isə Alluşla hava mübarizəsindən qalib ayrılan Urfan uzaqlaşdırdı. Çox keçmədən Bayıl təmsilçisi daha bir uğursuz hücum həyata keçirdi. Burda Alluş qapı önünə "asan yem" göndərsə də, nə Emin, nə də Litvin topa toxuna bildi. Ardınca Allaş qeyri-dəqiq zərbəylə yadda qaldısa, Yusifin fərqlənmək cəhdinə Avram mane oldu.

Birinci hissənin növbəti təhlükəli epizodunu "Araz-Naxçıvan"ın ifasında izlədik. 44-cü dəqiqədə Dias adını tabloya yazdırmaq istədi ki, uzaq məsafədən göndərdiyi topu tir "dəf etdi". "Səbail"in buna oxşar hücum cəhdi isə qeyri-dəqiqlik üzündən fayda vermədi. Burda İlkin "çərçivə"ni nişan almaqda çətinlik çəkdi. Nəticədə komandalar fasiləyə "sülh"lə yollandı.

İkinci hissə "qırmızı-ağlar"ın önə atılmasıyla start götürdü. Əvvəl qapıçıyla üzbəüz qalan Santosun zərbəsi qapıdan aralı keçdi. Ardından Urfanın başla fərqlənmək arzusu çin olmadı. "Dənizçilər" ikinci yarı ərzində yalnız 61-ci dəqiqədə reallaşdırdığı hücumla yadda qaldı. Bu epizodda Sofirin tora qovuşdurmaq istədiyi top tirin üzərindən şütüdü. Ardınca daha da fəallaşan naxçıvanlılar Meza Kolli, Santos və Ülvi zərbələrinə də sevinə bilmədilər. Burda Felipenin başla zərbəsini xüsusi vurğulamağa dəyər. Ona görə ki, Hüseynəli yerə dəyib istiqamətini dəyişən topa sahib çıxmaqla komandasını yüzfaizlik qoldan xilas etdi.

Gözdən qaçmadı
* 21-ci dəqiqədə top Urfana toxunandan sonra meydanı tərk etsə də, Fərid Hacıyev "Araz-Naxçıvan"ın xeyrinə qapıdan zərbə təyin etdi.
* Elmar Baxşıyev 90+2-ci dəqiqədə hakimin qərarına etiraz etdiyinə görə "sarı" aldı. Mütəxəssis topa əllə toxunan Eminə ikinci "sarı"nın göstərilməsini tələb etsə də, ədalət təmsilçisi həmin epizoddan əvvəl qayda pozuntusunun qeydə alındığını bildirdi.
* Tribunalarda təxminən 40 nəfərdən ibarət "Dənizçilər" fanklubu və bir neçə sıravi azarkeş əyləşmişdi.

KƏNAN BAHADIR