“Rəşad Sadıqov mənə çox şey öyrədə bilər”
Mövsümün ikinci yarısını Hollandiyanın 1-ci divizionunda çıxış edən “Valveyk”də keçirən Ozancan Kökcü Türkiyə mətbuatına müsahibə verib. Müqavilə ilə “Bursaspor”a məxsus olan yığma üzvü bunları deyib: “Bursada öz hədəflərim vardı. Ancaq komandada rəqabət çox güclü idi. Heyət isə çox geniş idi. Yetərincə oynamaq imkanı əldə etmədim. Bir neçə klub məni heyətində görmək istəyirdi. Hollandiyaya qayıtmaq qərarına gəldim. Orda özümü rahat hiss edirdim. Mövsümün ikinci yarısı mənim üçün uğurlu alındı. “Bursaspor”un yeni baş məşqçisi Samet Aybabaya böyük hörmətim var. Bu insan futbolu sevir və gənc futbolçulara xüsusi yanaşır. Səbirsizliklə növbəti mövsümün startını gözləyirəm. Onunla işləmək şərəfinə nail olacam. Hollandiyada çempionat başa çatıb. İndi mən Azərbaycanın gənclərdən ibarət yığmasının tərkibindəyəm. Növbəti “futbol ili”ndə Samet Aybabanın rəhbərliyi altında nəyə qadir olduğumu göstərəcəm”.
Kökcü Türkiyə yığmasında oynamaq perspektivindən də danışıb: “Mən hələ bu haqda çox danışmaq istəmirəm. Tolunay Kafkasla görüşüm olub. Müəyyən səbəblərə görə Azərbaycanın U-21 yığmasından imtina etmişdim. Ancaq Rəşad Sadıqov baş məşqçi təyin olunduqdan sonra ondan yenidən dəvət aldım. O, əla insan və məşqçidi. Mənə çox şey öyrədə bilər. Türkiyə yığması haqda isə hələ danışmaq istəmirəm”.
SƏRXAN hazırladı