PFL hər komandaya 100 bilet ayırıb
“Keşlə" və "Qəbələ"nin iştirakı ilə keçiriləcək ölkə kubokunun final oyunu üçün biletlərin satışa çıxarılacağı tarix açıqlanıb. Bu haqda PFL-in saytında xəbər yerləşdirilib. Mövsümün son oyununa bilet əldə etmək istəyənlər mayın 26-dan Qəbələ şəhər stadionunun kassalarına üz tuta bilərlər. Qəbələnin müxtəlif nöqtələrində də final qarşılaşmasının biletləri satılacaq. Bileti Bakıda əldə etmək istəyənlər dünən və bu gün PFL-ə müraciət edə bilərlər. Biletlərin qiyməti 2, 3, 5 və 30 manatdı.
Bilet satışı ilə bağlı daha ətraflı bilgi əldə etmək üçün PFL-in Mətbuat və İctimaiyyətlə Əlaqələr Departamentinin rəhbəri Aslan Şahgəldiyevlə əlaqə saxladıq: “Bəziləri deyir ki, final qarşılaşmasının biletlərinin oyuna 3 gün qalmış satışa çıxarılması yanlışdı. Bunu daha tez etmək olardı. Ancaq 10 illik təcrübəmizə əsaslanaraq deyə bilərəm ki, bizdə azarkeşlər matçın startına saatlar qalmış bilet almaq istəyirlər. Əvvəlki illərdə bəzən elə olub ki, bilet satışına ən azı 10 gün öncədən başlamışıq. Ancaq heç kim həmin vaxt ərzində kassalara yaxınlaşıb, bilet almayıb. Dediyim kimi, ən yaxşı halda final görüşünə 3 gün qalmış bilet üçün müraciət olunub. Bütün bunları nəzərə alıb belə addım atmağı lazım bildik. Hər iki komandanın azarkeşlərinə 100 bilet ayrılıb. Bundan başqa klub rəhbərliyinə və üzvlərinə VİP lojada və “skay-box”da yerlər ayrılacaq. Qalan biletlər isə açıq satışa çıxarılacaq. Artıq sabahdan PFL-in iki qrupu final matçının anonsu ilə bağlı müxtəlif istiqamətlərdə yola çıxacaq. Birinci qrup əsasən Aran bölgələrinə, ikincisi isə Zaqatala, Şəki, Qax, Oğuz istiqamətində afişalar yerləşdirəcək. Həmin afişalarda bilet satışı ilə məşğul olacaq şəxsin nömrəsi də qeyd olunacaq. Bilet əldə etmək istəyənlər həmin nömrəyə zəng vurub sifariş verə bilərlər. Hətta lazım olsa, bilet ünvana da çatdırılacaq. Ötən dəfə sizə bildirdiyim kimi, Qəbələyə yaxın bölgələrdə olan otellərə də afişa vurmaq fikrimiz var. Final qarşılaşmasında stadionda anşlaq olacağını gözləyirik”.
Aslan bəy bizimlə söhbətdə finalı izləmək istəyənlərin artıq bilet üçün quruma müraciət etdiyini də bildirdi: “Bir neçə gündü ki, PFL-in “feysbuk” səhifəsinə yazıb bileti necə və hardan əldə etməyin yolunu soruşurlar. Bundan başqa, xeyli sayda zəng vuran da var. Ancaq milli-mənəvi dəyərlərimizə sadiq qalıb (bunu ironiya ilə deyir) mövsümün son qarşılaşmasına pulsuz bilet əldə etmək istəyənlərin də sayı çoxdu. Buna görə isə heç təəccüblənmirəm. Çünki Çempionlar Liqası kimi mötəbər turnirin qrup oyununa 1 manat (50 sent) verib bilet almayan, havayı bilet istəyənləri çox görmüşük. Paytaxtda bilet satışının təşkilinə gəlincə, bu məsələdə də təcrübəyə əsaslanmışıq. Bir neçə gün öncədən əlavə satış nöqtələri yaradıb bilet satışını təşkil etsəydik belə, heç kim ora yaxınlaşmayacaqdı. Bunu bilə-bilə nəyə görə əlavə pul itkisinə yol verib, izafi xərc etməliydik? Bakıda kim bilet istəsə, bizdən əldə edə bilər. Müəyyən səbəblərdən PFL-ə gəlmək imkanı olmayanlara isə bileti özümüz çatdıra bilərik”.
RƏŞAD
