Səbail – Araz-Naxçıvan 0:2 (0:1)
1. Hüseynəli Quliyev – 5,0
74. Yusif Nəbiyev (k) – 5,5
3. Dmitri Litvin – 4,5
18. Süleyman Əhmədov – 4,5
20. Mərt Çəlik – 5,0
11. Rüfət Abdullazadə - 5,0
19. Samir Abdullayev – 4,5
(77. Fərid Nəbiyev, 80) – qiymətsiz
8. Qorka Laruçça – 4,5
7. Madi Queta – 4,5
5. Gitay Sofir – 4,5
(83. Nihad Quliyev, 59) – 4,5
14. Suleyman Alluş – 4,5
Ehtiyat oyunçular
12. Əlirza Müştəbazadə
6. Cabir Əmirli
15. Vüsal Məsimov
16. Emin Rüstəmov
36. Azad Əsgərov
Baş məşqçi: Cavid Hüseynov
Komandanın ən yaxşısı: Yusif Nəbiyev
12. Kristian Avram – 5,5
5. Qara Qarayev – 5,5
(24. Mustafa Əhmədzadə, 74) – qiymətsiz
34. Urfan Abbasov (k) – 5,5
3. Bəxtiyar Həsənalızadə - 5,5
2. Slavik Alxasov – 5,5
(17. İssuf Paro, 80) – qiymətsiz
16. Ramon Maçado – 6,5
29. Vanderson Melo – 5,5
14. Miço Kuzmanoviç – 5,0
(23. Nuno Rodriges, 65) – 5,0
4. İqor Ribeyro – 5,5
97. Felipe Santos – 5,5
(7. Ülvi İsgəndərov, 80) – qiymətsiz
10. Bernardo Dias – 6,0
(21. Sezar Meza Kolli, 65) – qiymətsiz
Ehtiyat oyunçular
94. Tərlan Əhmədli
6. Vadim Abdullayev
26. Ömər Buludov
22. Elçin Mustafayev
20. Turan Vəlizadə
71. Sənan Ağalarov
57. Elcan Məmmədov
Baş məşqçi: Elmar Baxşıyev
Komandanın ən yaxşısı: Ramon Maçado

Qollar: R.Maçado, 45+2-p. (0:1). B.Dias, 56 (0:2, R.Maçado).
Vərəqələr: D.Litvin, 45 (qeyri-idman hərəkəti). N.Quliyev, 67 (qeyri-idman hərəkəti). M.Çəlik, 75 (qeyri-idman hərəkəti). R.Abdullazadə, 86 (qeyri-idman hərəkəti). U.Abbasov, 87 (qeyri-idman hərəkəti) – sarı.
Hakimlər: RƏŞAD ƏHMƏDOV (Mingəçevir), Rahil Ramazanov, Müslüm Əliyev, Elvin Bayramov (hamısı Bakı).
VAR hakimi: Rəvan Həmzəzadə (Şəki).
VAR hakiminin köməkçisi: İnqilab Məmmədov (Bakı).
Hakim-inspektor: Orxan Məmmədov (Bakı).
AFFA nümayəndəsi: Erkin Hüseynov (Bakı).
7 dekabr. Bakı. “ASCO Arena”. 500 tamaşaçı (3200 yerlik).
Birinci hissəyə 3, ikinci hissəyə 4 dəqiqə əlavə olunub.
Oyunun qiyməti: 5,5.

Sonuncu qələbəsini 9-cu turda “Şamaxı” üzərində qazanan “Səbail”in 3 xal həsrətinə “Araz Naxçıvan”la oyunda son qoyacağı heç də inandırıcı görünmürdü. Elmar Baxşıyevin çalışdırdığı komanda “Səbail”lə qarşılaşmaya qədər ardıcıl beş oyunda qələbə qazanmağı bacarmış, bu görüşlərdə qapısını da toxunulmaz saxlamışdı. Belədə “Səbail” üçün “Araz-Naxçıvan”ı büdrətmək heç də asan olmayacaqdı. Elə yekun nəticə də bu ehtimalları doğrultdu, “dənizçilər” bu görüşdə də xalsız qaldı. Bir daha isbat olundu ki, nə “Araz Naxçıvan”ın liderlər qrupunda yer alması təsadüfidi, nə də “dənizçilər”in zirzəmidə “lövbər salması”.

Rəşad Əhmədovun idarə etdiyi oyun sakit tempdə başladı. Hiss etmək çətin deyildi ki, “Araz-Naxçıvan” ehtiyatlı oynamaqla fürsət gözləyir. Meydan sahibləri isə qol vurmaq, “qara zolaqdan çıxmaq” həvəsindəydilər. Elə buna görə də ilk təhlükəli vəziyyəti “Səbail” yaratdı. 7-ci dəqiqəyə qədər naxçıvanlıların qapısı önündə iki təhlükəli vəziyyət yarandı. Birincidə Quetanın zərbəsi hədəfə düşmədi. İkincidə Rüfətin zərbəsi dəqiq olsa da, Avram yerində idi. Bu epizoddan dərhal sonra “Səbail” daha bir sürətli hücum qurdu. Hücum qapıya zərbəylə yekunlaşsa da, Avram yenə də etibarlı oynadı. Rəqibi “dişinə vuran” “Araz-Naxçıvan” tədricən təşəbbüsü ələ almağa başladı ki, belədə “Səbail”in də hücum cəhdləri azaldı. Əvəzində meydan sahiblərinin qapısı qarşısında təhlükəli vəziyyətlərin sayı artdı.

Maraqlıdı ki, “Araz-Naxçıvan” təzyiqi artırmağa başlayan kimi “dənizçilər” oyunun sürətini aşağı salmağa çalışırdılar. 28-ci dəqiqədə “Səbail”in qazandığı aut atışını yerinə yetirmək üçün Alluşa təxminən 100 saniyə lazım oldu. Bu da onun göstəricisi idi ki, meydan sahibləri sürətli oyundan çəkinir, “Araz Naxçıvan”ın hücumlarının qarşısını almaq üçün tempi aşağı salmağa çalışır. Amma bunu etmək mümkün olmadı və fasiləyə qədər hesab açıldı. 41-ci dəqiqədə Rəşad Əhmədov VAR-ın köməyinə ehtiyac duydu. Qonaqların hücumu zamanı topun cərimə meydançasında Mərtin əlinə dəyməsi şübhəsi yarandı. VAR-dan gələn siqnal penaltinin olmadığını bildirincə Əhmədov da oyunu davam etdirdi. Bununla belə növbəti epizodda “Səbail”in qapısına penalti təyin olundu. Özü də Əhmədov bu qərarı VAR-a baxandan sonra verdi. Litvinlə mübarizə zamanı Alxasov yerdə qaldı və hakimlər epizodu penalti kimi qiymətləndirdilər. “Araz-Naxçıvan”ın bombardiri Felipe Santos “nöqtə”yə yaxınlaşsa da, sonradan zərbə vurmaq hüququnu Maçadoya verdi. “16” nömrə bu etimadı doğrultdu və topu tora qovuşdurdu.

Beləliklə, komandalar fasiləyə naxçıvanlıların minimal üstünlüyü ilə yollandı.

Fasilədən sonra da üstünlük qonaqların tərəfindəydi. Topa və meydana inamla nəzarət edən “Araz-Naxçıvan” Bayıldan 3 xalla ayrılmaq üçün hesabı artırmaq həvəsiylə irəli atılırdı. Qonaqlar bu istəyinə 56-cı dəqiqədə çatdı. Bu dəfə Maçado assistent rolunu oynadı. Onun cərimə meydançasına doğru havalandırdığı topu Dias başıyla qapıdan keçirdi. O qədər də qüvvətli olmayan zərbəyə qapıçı Hüseynəli Quliyev müdaxilə edə bilmədi. VAR hakimləri ofsayd şübhəsi ilı təxminən dəqiqəyarım qolu incələdikdən sonra referi mərkəzi göstərdi.

Bundan sonra heç kim “Araz-Naxçıvan”ın qələbəsinə şühbə etmədi. Elmar Baxşıyevin komandasına qol vurmaq heç də asan məsələ deyil. “Səbail”in də bunu bacaracağı inandırıcı görünmürdü. Yeganə fürsət 83-cü dəqiqədə oldu ki, onda da Alluşun qüvvətli zərbəsi “çərçivə”dən aralı keçdi. Beləcə “Araz-Naxçıvan” 2:0 hesablı qələbəyə sevindi və yenidən 1-ci pilləyə yüksəldi.

AMAL