Neftçi (Bakı) – Qarabağ (Ağdam) 0:3 (0:1)
93. Rza Cəfərov (k) – 5,0
3. Höccət Haqverdi – 4,5
90. Ramil Şeydayev – 6,0
13. Emil Səfərov – 5,0
14. Edvin Kuç – 5,0
(17. Rəhman Hacıyev, 60) – 5,0
6. Rafael Quzzo – 4,5
(10. Filip Ozobiç, 60) – 5,0
99. Ervin Koffi – 5,0
(88. Andrey Ştoqrin, 60) – 5,0
44. Yuri Matias – 4,0
23. Robert Bauer – 4,5
24. Mustafa Sek – 4,5
11. Kilan Lebon – 5,0
(47. Murad Məmmədov, 68) – 5,5
Ehtiyat oyunçular
1. Emil Balayev
30. Rusatam Samiqullin
7. Azər Əliyev
91. Ağadadaş Salyanski
4. Mark Tamaş
22. Dembo Darbo
20. Alfa Konte
77. Yeqor Boqomolski
Baş məşqçi: Samir Abasov
Komandanın ən yaxşısı: Ramil Şeydayev

97. Fabian Buntiç – 6,0
30. Abbas Hüseynov – 6,0
24. Aleksey İsayev – 6,0
44. Elvin Cəfərquliyev – 5,5
(27. Toral Bayramov, 46) – 5,5
22. Musa Qurbanlı – 6,5
(21. Aleksey Kaşuk, 71) – 5,0
90. Nəriman Axundzadə - 6,5
81. Kevin Medina (k) – 6,0
2. Mateus Silva – 6,5
6. Julio Romao – 5,0
(66. Patrik Andrade, 46) – 5,5
15. Leandro Andrade – 7,0
(7. Yassin Benzya, 71) – 5,0
11. Emmanuel Addai – 6,5
(19. Redon Cica, 85) – qiymətsiz
Ehtiyat oyunçular
1. Şahruddin Məhəmmədəliyev
99. Mateuş Koxalski
20. Riçard Almeyda
13. Bəhlul Mustafazadə
29. Marko Veşoviç
10. Abdulla Zubir
18. Olavio Juninyo
Baş məşqçi: Qurban Qurbanov

Qollar: L.Andrade, 27 (0:1). N.Axundzadə, 53 (0:2, L.Andrade). L.Andrade, 55 (0:3, M.Qurbanlı).
Vərəqələr: E.Kuç, 8 (qeyri-idman hərəkəti). L.Andrade, 28 (qeyri-idman hərəkəti). E.Cəfərquliyev, 34 (qeyri-idman hərəkəti). Y.Benzya, 72 (qeyri-idman hərəkəti). Y.Matias, 74 (qeyri-idman hərəkəti) – sarı.
Hakimlər: ƏLİYAR AĞAYEV, Zeynal Zeynalov, Akif Əmirli, Elçin Məsiyev (hamısı Bakı).
VAR hakimi: Kamal Umudlu (Bakı).
VAR hakiminin köməkçisi: Elşad Abdullayev (Bakı).
Hakim-inspektor: Asim Xudiyev (Bakı).
AFFA nümayəndəsi: Elçin Mehtiyev (Bakı).
1 dekabr. Bakı. “Neftçi Arena”. 7069 tamaşaçı (11000 yerlik).
Birinci hissəyə 2, ikinci hissəyə 3 dəqiqə əlavə olunub.
Oyunun qiyməti: 7,0.

Bu gedişlə Azərbaycan derbisi də dəbdən düşəcək. Axı vaxtilə “Neftçi” ilə “Qarabağ”ın bir-birini sınağa çəkdiyi oyunlar həm meydanda, həm də tribunalarda gərgin mübarizə ilə müşayiət olunurdu. İndi isə tribunalarda derbi, rəqabət ab-havası duyulursa, meydanda bunu görmürük. “İmarət Tayfa”, “Qarabağ Ordu”, “Forza Neftçi” canfəşanlıq edir, “Qarabağ” azarkeşlərinin dəstəyinə layiq olmağa çalışır. “Neftçi” isə…
Meydana eksperimental heyətlə çıxan, Benzya, Veşoviç, Zubir, Juninyo kimi liderlərini ehtiyatda saxlayan “Qarabağ” artıq 2-ci dəqiqədə hesabı aça bilərdi. Amma uzaqdan qapını nişan almaq istəyən Addai qeyri-dəqiq oynadı. Halbuki Emilin yöndəmsiz ötürməsi sayəsində topu ələ keçirən qanalı əla fürsət yaxalamışdı. Ardınca komandaların mərkəzdə davam edən mübarizəsini izlədik. Həm “ağ-qaralar”, həm də “köhlən atlar” hücuma keçməyə çalışır, rəqibin müqavimətiylə üzləşirdi. 16-cı dəqiqədə Şeydayev Bauerin uzun ötürməsindən sonra Buntiçlə təkbətək çıxmaq üzrə idi ki, Medina sürəti hesabına ona çatdı və cərimə meydançasının daxilində zərərsizləşdirdi. Amma sonda laysmanın ofsayd bayrağı havaya qalxdı.

21-ci dəqiqədə Addai topu tora qovuşdursa da, tablodakı rəqəmlər dəyişmədi. Ona görə ki, Rzanın dəf etdiyi top Nərimanın qoluna dəyəndən sonra qapı xəttini keçdi. Bir qədər sonra “Neftçi” hesaba açmağa çox yaxın oldu. Belə ki, Ramil meydanı tərk etməkdə olan topu qapı önünə qaytardı, amma Quzzo ardıcıl iki dəfə topa zərbə vura bilmədi. Belə legionerin olmasından olmaması yaxşıdı! “Qarabağ” hesabı elə bu epizoddan sonra açdı. 27-ci dəqiqədə Matiasın olduqca kobud səhvindən sonra topu ələ keçirən Leandro onu və Rzanı arxada qoyaraq boş qapını “nişan aldı” – 0:1. “Ağ-qaralar”ın hesabı bərabərləşdirmək şansını 34-cü dəqiqədə Ramil boşa verdi. Hissənin sonunda Musa təkbətək çıxsa da, zərbə anını gecikdirdi və belədə Rza ilə mübarizədən məğlub ayrıldı.
Gözləmək olardı ki, Samir Abasov paltardəyişmə otağında yetirmələrini ruhlandıra, onlar da 2-ci hissədə oyunun axarını dəyişə biləcək.

Amma belə olmadı. Ağdamlılar ardıcıl qollar vurmaqla intriqanı öldürdü. 53-cü dəqiqədə Rza topu oyuna daxil edərkən səhvə yol verdi, Leandro cərimə meydançasına daxil oldu, Matiası aldadaraq qapı önünə dəqiq ötürmə verdi ki, Nərimanın fərqi artırması çətin olmadı. Rzanın diqqəti Leandroda olduğundan fürsət gözləyən gənc hücumçu nəzarətsiz qalmışdı. Bauer, Sek və Haqverdi isə bu epizodda tamaşaçı rolunda idi. Fərqi darmadağın həddinə çatdıran qol 55-ci dəqiqədə vuruldu. Düzdü, burda Matias ofsayd olduğunu düşünərək Musanın ötürməsinə, Leandronun qapıya zərbə vurmasına mane olmadı. Lakin hansısa qayda pozuntusundan söhbət gedə bilməz, Koffi ofsaydı pozurdu. Abasov dərhal üçlü dəyişikliyə əl atmaqla oyunun axarında dönüş yaratmağa çalışsa da, “Qatar artıq getmişdi”. Hər halda, Buntiç 69-cu dəqiqədə Ozobiçin, daha sonra Muradla Ramilin zərbələrini zərərsizləşdirdi.

Belədə hesab dəyişmədi ki, “Qarabağ” iki gün əvvəl “Araz-Naxçıvan”ın ələ keçirdiyi zirvəni yenidən özünə qaytardı. “Neftçi” isə hələ də autsayderlər sırasındadı. Paytaxt klubu Samir Abasovun rəhbərliyi altında meydana çıxdığı 6 matçın yalnız ikisində qələbə qazanıb!

Gözdən qaçmadı
* Olimpiya çempionu, “Neftçi” azarkeşi kimi tanınan cüdoçu Hidayət Heydərov və kinorejissor, “Araz-Naxçıvan”ın mətbuat xidmətinin sabiq rəhbəri Tahir Tahiroviç azarkeşlər arasındaydı.
*“Forza Neftçi” “Qarabağ, Ağdam”, “İmarət Tayfa” isə “Samir “Neftçi”ni çempion et” şüarları səsləndirdi. “Neftçi”nin azarkeşləri “Qarabağ”ı və Əliyar Ağayevi, “Qarabağ”ın azarkeşləri isə “Neftçi”ni təhqir etdi.
* “Qarabağ” azarkeşləri “Neftçi”nin loqosunun yer aldığı və üzərində “necə olacaq?” yazılan pankart açmışdı. Onlar əvvəlki oyunların hesablarını (4:1, 5:0, 4:0) da göstərmişdi. Nəyə işarə etdikləri aydın idi…

KƏNAN BAHADIR