Mayın 15-də AFFA-nın İntizam Komitəsinin növbəti iclası baş tutub. Komitə Topaz premyer-liqasında, əvəzedicilərin yarışında və birinci divizionda 27-ci turda yaşananları müzakirə edib, hüquqi qiymət verib.
“Neftçi” – “Səbail” matçının 43-cü dəqiqəsində qonaq komandanın baş məşqçisi Samir Əliyev hakimlər briqadasını təhqir etdiyinə görə sanksiyaya məruz qalıb. O, bu mövsümün son, növbəti mövsümün isə ilk 4 turunda texniki zonada ola bilməyəcək. Gənc mütəxəssisin davranışı kluba 4000 manata başa gəlib.
Premyer-liqanın son turu çərçivəsində keçirilən “Zirə” – “Kəpəz” matçında hər iki komanda cəza və cəriməyə məruz qalıb. 9-cu dəqiqədə aqressiv davranışa görə birbaşa qırmızı vərəqə alaraq meydandan kənarlaşdırılan Milan Duriç 4 oyunluq cəzalanıb, klubu 3200 manat cərimə olunub. Oyunun 80-ci dəqiqəsində ikinci xəbədarlıqdan sonra komandasını azlıqda qoyan “Kəpəz”li Kamran Abdullazadə isə 1 oyun və 200 manatla canını qurtara biləcək.
Əvəzedici komandaların çempionatında 27-ci turdakı 4 oyunun hamısında cəza və cəriməyə əsas verən nəsə baş verib. “Sumqayıt”la oyunun 82-ci dəqiqəsində “Qəbələ”ni azlıqda qoyan Faiq Hacıyev son turda meydanda görünməyəcək. Klubu onun “qırmızı”sını 100 manatla “yuyacaq”. “Səbail”dən Xaliq İbrahimov və “Zirə”dən Kənan Zülfiqarov da analoji cəza ilə üzləşib. “Keşlə” isə “Qarabağ”la matçdakı sarı vərəqələrin çoxluğuna görə 400 manat cərimə ödəyəcək.
Diviziona gəlincə, yalnız “Binə” “qarmağa ilişib”. MOİK-lə görüşdə 4 futbolçusu sarı vərəqə alan və buna görə 80 manat cərimələnən klub Renat Aşırova görə ikiqat ziyana düşüb. Oyunun 37-ci dəqiqəsində birbaşa qırmızı vərəqə alaraq meydandan kənarlaşdırılan futbolçu növbəti mövsümün ilk 2 turunu kənardan izləyəcək. Sıralarında olduğu klub onun 160 manat cəriməsini də ödəməlidi.
Beləliklə, İntizam Komitəsi son iclasında klubları 8340 manat cərimə edib. Nəticədə mövsümün əvvəlindən sərimə sanksiyaları üzrə nəzərdə tutulan məbləğ 127060 manata çatıb.