Dünən Heydər Əliyev Fondunun təşəbbüsü ilə “Bakı marafonu-2018” keçirilib. “Küləyə qalib gəl” şüarı altında təşkil olunan qaçış üçün 18 minədək şəxs qeydiyyatdan keçib. Marafona İtaliya, Fransa, Rusiya, Türkiyə, İran, Gürcüstan, Ukrayna, Belarus, Böyük Britaniya, BƏƏ, İraq, ABŞ, Çin, Malayziya, Hindistan, Yaponiya, Özbəkistan, Qazaxıstan, Türkmənistan, Kolumbiya, Litva, Latviya, Almaniya və Çexiyadan qatılanlar da olub. Elə Dövlət Bayrağı Meydanından start götürən və Bakı Olimpiya Stadionunda başa çatan 21 km-lik məsafəni hamıdan tez əcnəbilər qət edib. Ümumiyyətlə, nə kişilərin, nə də qadınların yarışında ilk “3-lük”də yerlilər olub.
Kişilər arasında ukraynalı İqor Olefirenko hamını qabaqlayıb. Onun ən yaxın izləyiciləri iranlı Məhəmməd Cəfər Muradi və türk Ömər Alkanoğlu olub. Qadınların yarışında türk Çelik Fadimə finişə birinci çatıb. Ukraynalı Valentina Poltavtika ikinci, rus Anastasiya Petrova isə üçüncü yeri tutub.
Rio Olimpiadasının marafon yarışında 155 atlet arasında 30-cu yeri tutan Olefirenko qələbəsini belə şərh edib: “Bakı marafonunun qalibi olduğuma görə çox xoşbəxtəm. Çətin olsa da, əzmkarlıq nümayiş etdirib birinci olmağı bacardım. İlk dəfə Azərbaycanda oluram. İnsanlar çox qonaqpərvər və mehribandı. Marafon yüksək səviyyədə təşkil olunub. Bakıya gələrkən qalib olacağıma inanmırdım. Ancaq yarış başlayandan liderlər qrupunda yer aldım. Daha öncə Londondakı marafona qatılmışdım. Növbəti illərdə də Bakıdakı yarışların iştirakçısı olacam”.
Qadınların çempionu da təəssüratını bölüşüb: “Çox şadam ki, qardaş ölkədə keçirilən marafonda birinci oldum. Bakı marafonunda ilk dəfə iştirak edirəm. Bu, qalib gəldiyim ilk marafondu. Külək əsdiyi üçün qaçmaq bir qədər çətin oldu. Həm də 15 gün əvvəl Düsseldorfdakı marafonda iştirak etmişəm. Həmin yarışda həm də Olimpiada dərəcəsini keçmişəm. 10 km məsafəyə qaçışda universitetlər arasında keçirilən dünya çempionatının qalibiyəm. Türkiyədə təşkil edilən Avrasiya marafonlarının ikisində 2-ci yeri tutmuşam. Bakı kimi küləkli şəhərdə mübarizə aparmaq çox həyəncanverici idi. Yorğun olmağıma baxmayaraq, marafonda qalib gəldim. Azərbaycanda qonaqpərvərlik və yarışın təşkilatçılığı yüksək səviyyədədi. Qələbə qazanmağımda marşrut boyunca insanların dəstəyi rol oynadı. Gələcəkdə paytaxtınızda yenə də marafon təşkil edilərsə, məmnuniyyətlə gəlib iştirak edəcəm”.
Qeyd edək ki, ilk “3-lük”də yer alanlar uyğun olaraq, 3000, 2000 və 1000 manat mükafat qazanıb. “Bakı Marafonu 2018”də toplanan vəsait Heydər Əliyev Fondunun valideyn himayəsindən məhrum olan uşaqlarla bağlı layihəsinə yönəldiləcək.