Gənc yarımmüdafiəçini yığmaya qazandırmaq lazımdı
Artıq Avropada əksər çempionatlar başa çatmaqdadı. Təbii, istənilən birincilikdə əsas məsələ qalibin kimliyidi. Ancaq elita ilə vidalaşan, eləcə də onların yerini tutanların adları da maraq doğurur. Güclülər dəstəsində mövqeyini qoruya bilməyən komandaların azarkeşləri üzülür, aşağıdan gələnlərin tərəfdarları isə əksinə, uğuru bayram edir. Bu baxımdan Rusiya çempionatında da elitaya yüksələn iki klubun adı bəllidi. “Orenburq” və “Krılya Sovetov” artıq adını güclülər dəstəsinə yazdırıb. Əslində şimal qonuşlarımızdakı vəziyyətə toxunmağımız boşuna deyil.
“Krılya Sovetov”un Rusiya premyer-liqasına vəsiqə qazanması bizim üçün də müəyyən qədər önəm daşıyır. Çünki Samara təmsilçisinin heyətində azərbaycanlı futbolçu top qovur. Söhbət 23 yaşlı Azər İlqar oğlu Əliyevdən gedir. Öncə onunla bağlı bəzi məlumatları diqqətinizə çatdıraq. Hücumameyilli yarımmüdafiəçi sabah doğum gününü qeyd edəcək. 168 sm boya malik olan Azərin sol ayağı işləkdi. O, 2012-17-ci illər ərzində Rusiyanın sayca 2-ci liqası sayılan Milli Futbol Liqasında (MFL) çıxış edən “Yenisey”in şərəfini qoruyub. Daha doğrusu, 2013/14 mövsümünün ilk yarısı istisna olmaqla. Həmin vaxt daha aşağı divizion təmsilçisi “Saxalin”ə icarəyə verilib. Bu komandanın heyətində 10 çempionat matçında meydana çıxan Əliyev ümumilikdə 800 dəqiqə meydanda olub, 6 qol vurub. Lakin mövsümün ikinci yarısında yenidən “Yenisey”ə qayıdıb.
2015/16 mövsümünə qədər əsas heyət üzvü sayılmasa da, daha sonra vəziyyət dəyişib. Həm qeyd etdiyimiz “futbol ili”ndə, həm də 2016/17 mövsümündə müntəzəm baş məşqçinin güvəndiyi futbolçulardan biri olub. Düzdü, məhsuldarlıq baxımından bu iki ildə o qədər də parlaq nəticələr göstərməyib və cəmi 5 dəfə fərqlənib. Ötən yay isə “Krılya Sovetov”un diqqətini cəlb edib və Samara təmsilçisinə transfer olunub. Azər cari mövsüm MFL-də 37 matçda şans qazanıb ki, bu da 2725 dəqiqə edib. “Sibir”, “Avanqard”, “Şinnik” və “Tümen”lə qarşılaşmalarda rəqib qapısına yol tapıb. Onun fərqləndiyi oyunlardan üçündə “Krılya Sovetov” qalib gəlib, birində heç-heçə edib. “Orenburq” və “Spartak-2” ilə matçlarda isə “sarı”yla “mükafatalandırılıb”. İntizamı ilə də diqqəti çəkən soydaşımız peşəkar karyerası ərzində qırmızı vərəqəylə cəzalanmayıb. Ölkə kubokunda isə 2 matçda əvəzlənmədən oynayıb, “Rubin”lə görüşdə fərqlənib.
Təbii, belə bir futbolçunun yığmamızda oynaması müsbət hal olar. Azərbaycana bağlılığı olmayan birini “milliləşdirməkdənsə”, elə özümüzkünü razı salmaq daha yaxşıdı. Əslində AFFA da bu yöndə çox cəhd edib. Bizdə olan məlumata görə, onun menecerliyini atası İlqar Əliyev edir. Yığmanın seleksiyaçıları Azərin millimizi seçməsini bir neçə dəfə təklif ediblər. Özü də deyəsən, ailəsi bunun əleyhinə deyil. Hətta 2 il öncə yığmanı çalışdıran Robert Prosineçki köməkçisi Elxan Abdullayevi də “Yenisey”in oyununa, Azərin çıxışını izləməyə göndərmişdi. Lakin irəli xətt oyunçusunun bu günə qədər AFFA-dan gələn təklifə “hə” deməməsinin səbəbi başqadı. Belə ki, o yığmamızı seçərsə, Rusiyada legioner sayılacaq. Bu da əsas heyətdə yerini itirməsinə gətirib çıxara bilər. Hər halda, cəmi 23 yaşı olan futbolçu milli həyəcananı yaşamaq istəyirsə, AFFA-nın istəyinə müsbət cavab verməlidi. Baxmayaraq ki, “Krılya Sovetov”la elitaya yüksəlib, Rusiya yığmasına dəvət olunması real deyil. Yox, yığmamızı seçməkdənsə, elə klubunda daim şans qazanmağı üstün tutarsa, bu başqa məsələ. Ancaq bir məqam da var ki, onun millimizdə olması bizim üçün müsbət haldı. Onsuz da futbolçularımızın legioner həyatı yaşaya bilməməsi yığmada mənfi hal kimi əksini tapır. Bu üzdən Rusiya premyer-liqasında top qovan soydaşımızın millimizi seçməsində AFFA daha çox maraqlı olmalıdı.
Azərin yığma perspektivi haqda millinin baş inzibatçısı İslam Abbasovun fikirlərini öyrənmək istədik. O, "xaricdəyəm, gələndə danışarıq" söylədisə, yığmanın mətbuat katibi Elman Himayətoğlu məsələ ilə bağlı məlumatsız olduğunu dedi.
FARİZ