Çəlikəl: “Hər şey Qurban müəllimin istəyindən asılı olacaq”
Mövsüm sona yaxınlaşdıqca transfer xəbərlərinin gündəmə gəlməsinə alışmışıq. Ancaq budəfəki məlumat daha çox “Qarabağ” azarkeşlərini üzəcək. Söhbət Riçard Almeydanın Ağdam klubunu tərk etmək ehtimalından gedir. 2012-ci ilin yayında “köhlən atlar”la anlaşan 29 yaşlı yarımmüdafiəçinin mövsümün sonunda müqaviləsinin müddəti bitir. Lakin Almeyda ilə klub arasında yeni müqavilə imzalanmayıb, həmçinin şifahi razılıq da əldə olunmayıb. Yadınızdadısa, hələ qış fasiləsində bir neçə komandanın Riçardla maraqlandığı deyilmişdi. Bununla belə, yığma üzvü “Qarabağ”da qaldı. Amma mövsümün bitməsinə çox az vaxt qaldığı anda yeni anlaşmanın əldə olunmaması məsələnin ciddiliyindən xəbər verir. Çox güman, Almeydaya yenə də təkliflər var. Özü də “Qarabağ”da hazırda qazandığından daha sərfəli təkliflər. Ola bilər, Riçard maaşının artırılması qarşılığında Ağdam təmsilçisində qalmaq fikrindədi. Klub isə həmin məbləği ya vermək istəmir, ya da özünə uyğun həddə gətirmək niyyətindədi. Fakt isə budu ki, danışıqlarda irəliləyiş yoxdu və belə davam edərsə, Riçard gedəcək. Bu isə Çempionlar Liqasında mübarizə aparacaq komanda üçün heç də xoş ayrılıq olmayacaq.
Görəsən, klub Almeyda ilə yeni müqavilə haqda düşünür? Yoxsa “Qarabağ” ən uğurlu legionerlərindən olan Riçardla artıq sağollaşmaq fikrindədi? Sualları “köhlən atlar”ın direktoru Əmrah Çəlikələ ünvanladıq: “Nə qədər ki, çempionat bitməyib, bizim bu haqda danışmağımız düzgün olmaz. Yüz faiz nəsə olsa, açıqlayacağıq. Əlbəttə, hər şey Qurban müəllimin istəyindən asılı olacaq. Ancaq mövsüm bitmədiyi və konkret heç nə olmadığı üçün bu haqda danışmağımız faydasızdı. Müqaviləsinin müddəti başa çatan digər futbolçularla bağlı da eyni sözləri deyə bilərəm”.
Yeri gəlmişkən, “Qarabağ"da icarə əsasında çıxış edən Pedro Enrike Yunanıstan mətbuatına müsahibə verib. Braziliyalı Ağdam təmsilçisində qalıb-qalmayacağı ilə bağlı yekun qərarı tətildən sonra verəcəyini deyib: “İmkanım olsa, Yunanıstan kubokunun finalını izləmək istəyərdim. “Qarabağ”la hələ daha bir neçə matça çıxmalıyam, sonra isə ailəmlə birlikdə tətil üçün Braziliyaya getməyi planlaşdırıram. Həm PAOK-u, həm də azarkeşlərini çox sevirəm. Onların qəlbimdəki yeri başqadı. Tətildən sonra geri dönüb-dönməyəcəyimi dəqiq biləcəm. PAOK-la müqaviləm var, odu ki, yenidən bu komanda üçün oynamaq şansı əldə etmək gözəl olardı. Ancaq “Qarabağ”la ölkə çempionu olduğuma görə də çox xoşbəxtəm. Bu, mənim üçün çox önəmli idi. Çempionlar Liqasında oynamaq və təbii ki, titul qazanmaq üçün “Qarabağ”a keçmişdim. Komandam və komanda yoldaşlarım adına da çox sevinirəm. “Qarabağ” növbəti mövsümdə də Avropada – ÇL və ya AL olsun, fərq etmir - uğurlu çıxış etməyi hədəfləyir. “Qarabağ”ı seçməyim? Bu, səhv-düz məsələsi deyil. Bacarığıma, oynadığım futbola yaxşı bələdəm. PAOK-da qalsaydım da, ən yaxşı oyunumu ortaya qoyardım. PAOK Avroliqa ilə erkən vidalaşdı və “transfer pəncərəsi”nin son həftəsində “Qarabağ”dan təklif aldım. PAOK-da mənim vəziyyətimdə olan çoxlu oyunçu var idi. Hamısı üçün çətin idi. Nəticədə “Qarabağ”a keçmək qərarına gəldim. Hazırda bu iki klub arasında danışıqların gedib-getməməsi mənim işim deyil. Məsələ “Qarabağ”la PAOK arasındadı. Tətildən sonra Salonikiyə gedəcəm və PAOK-la birlikdə gələcəyimə dair nələr edə biləcəyimizi müzakirə edəcəyik. “Qarabağ”a hörmətim böyükdü, ancaq PAOK-la müqaviləm var”.
FARİZ