Sumqayıt – Sabah 1:0 (0:0)
1. Mehdi Cənnətov – 5,5
6. Vüqar Mustafayev (k) – 5,0
(12. Georgi Karaişvili, 58) – 5,5
14. Elvin Bədəlov – 5,5
7. Rövlan Muradov – 5,5
17. Murad Xaçayev – 5,5
30. Kamran Quliyev – 5,5
(10. Rəhim Sadıxov, 66) – 5,0
8. Səbuhi Abdullazadə - 5,5
19. Roy Kehat – 6,5
95. Miloş Miloviç – 5,5
99. Silvanus Nimeli – 5,5
(2. Sərtan Taşkın, 81) – qiymətsiz
23. Cordan Rezabala – 5,0
(77. Cəsurbek Cəloliddinov, 81) – qiymətsiz
Ehtiyat oyunçular
94. Rəşad Əzizli
36. Xəyal Fərzullayev
20. Ayxan Süleymanlı
21. Nihad Əhmədzadə
24. Sənan Muradlı
11. Fernando Medeyros
9. Nikola Vuynoviç
5. Alan Dias
Baş məşqçi: Vaqif Cavadov
Komandanın ən yaxşısı: Roy Kehat

55. Nicat Mehbalıyev – 5,5
2. Amin Seydiyev (k) – 5,0
77. Şakir Seyidov – 5,0
6. Abdulax Xaybulaev – 5,0
(10. Namik Ələskərov, 74) – 5,0
7. Boyan Letiç – 5,5
20. Coy-Lens Mikels – 5,5
(88. Xəyal Əliyev, 74) – 5,5
18. Pavol Şafranko – 6,0
(99. Neqoş Kupusoviç, 85) – qiymətsiz
40. İqor Noqeyra – 5,0
70. Cesse Sekidika – 5,0
3. Con İrasabal – 5,0
11. Kahim Parris – 5,5
(9. Anatoli Nuriyev, 74) – 4,5
Ehtiyat oyunçular
1. Yusif İmanov
94. Rəvan Mirzəmmədov
4. Elvin Camalaov
17. Tellur Mütəllimov
5. Rəhman Daşdəmirov
22. Abdulla Rzayev
44. Sofyan Çakla
Baş məşqçi: Krunoslav Renduliç
Komandanın ən yaxşısı: Pavol Şafranko

Qol: R.Kehat, 90+4 (R.Muradov).
Vərəqələr: İ.Noqeyra, 9 (qeyri-idman hərəkəti). M.Miloviç, 10 (qeyri-idman hərəkəti). C-L.Mikels, 62 (qeyri-idman hərəkəti). A.Süleymanlı, 90+5 (qeyri-idman hərəkəti) – sarı.
Hakimlər: RƏVAN HƏMZƏZADƏ (Şəki), Cəmil Quliyev, Şirməmməd Məmmədov, Əkbər Əhmədov (hamısı Bakı).
VAR hakimi: İnqilab Məmmədov (Bakı).
VAR hakiminin köməkçisi: Namiq Hüseynov (Bakı).
Hakim-inspektor: Asim Xudiyev (Bakı).
AFFA nümayəndəsi: Erkin Hüseynov (Bakı).
3 noyabr. Sumqayıt. Mehdi Hüseynzadə adına şəhər stadionu. 1100 tamaşaçı (9502 yerlik).
Birinci hissəyə 1, ikinci hissəyə 5 dəqiqə əlavə olunub.
Oyunun qiyməti: 5,5.

Renduliç 11-ci turun “Sabah” – “Neftçi” matçının (1:1) oyunsonrası mətbuat konfransındakı çıxışına “paltardəyişmə otağında qəribə ab-hava var idi, sanki kimsə ölüb” sözləriylə başlayıb, “növbəti oyunda qələbə qazanacağıq” ifadələriylə davam etmişdi. Mənə elə gəlir ki, rəqib məhz “Sumqayıt” olduğundan 3 xala asanlıqla yiyələnəcəyini, belədə “günahını yuyacağını” düşünürdü. Yəqin ki, “kimyaçılar”ın ona xoşagəlməz sürpriz hazırladığını bilsə, belə deməzdi. Məncə, elə bu üzdən, növbəti turda “Kəpəz”lə qarşılaşacaqlarına baxmayaraq, bu dəfə iddialı danışmadı. Əksinə, günahını boynuna aldı. Futbolçularını da “problem komandayla bağlı deyil” sözləriylə “sığortaladı”. Bəs mütəxəssisi belə davranışa vadar edən nə oldu? Biabırçı məğlubiyyət... Qələbəsiz oyunlar seriyasının beşə çatması... Halbuki hadisələrin axarı “Sabah”ın səfərdən qalib qayıdacağını deməyə əsas verirdi. Axı ilk təhlükəli vəziyyəti də “bayquşlar” yaratdı. 12-ci dəqiqədə Mikels cərimə meydançasına ötürmə versə də, Mehdi topa vaxtında yiyələndi. Ardından Parrisin zərbəsi qeyri-dəqiq oldu. Təbii ki, tələsməsəydi, daha doğrusu, Şafrankonu vaxtında görsəydi, hesabı aça bilərdilər. 21-ci dəqiqədə Kahim yenidən həmin fürsəti əldə etdi. O, bu dəfə topu Pavola çatdırmağa qərar verdi. Lakin Mehdi mövqeyini tərk edib təhlükəni sovuşdurduğundan şans əldən çıxdı. Ardınca Letiçin uzaqdan qol vurmaq istəyi Cənnətovun müdaxiləsi üzündən reallaşmadı. 32-ci dəqiqədə Şafranko qeyri-dəqiq zərbə vurdu. Beləcə birinci hissə üçün xüsusi vurğulanası epizodlar tükəndi.

İkinci yarı “Sumqayıt”ın hesabı açmaq fürsətini dəyərləndirə bilməməsiylə başladı. Kehatın irəli ötürməsini Nicat qarşıladı ki, Kamran topa gecikdiyinə görə qolkiperlə təkbətək mübarizə ehtimalını sıfra endirdi. 59-cu dəqiqədə Noqeyra Letiçin küncdən zərbə vasitəsilə cərimə meydançasına göndərdiyi topu başla tora qovuşdurmaq istəsə də, Mehdi yerində idi. 66-cı dəqiqədə Sekidika Pavolun ötürməsini qeyri-dəqiqlik üzündən boşa verdi. Bir qədər sonra Aminin uzaqdan hesabı açmaq cəhdini Mehdi əngəllədi. 74-cü dəqiqədə isə bəxt “Sabah”dan yana oldu. Daha dəqiqi, Kehatın baş zərbəsindən sonra top tiri silkələdi. Oyundakı yeganə qol 90+4-cü dəqiqədə vuruldu. Kehat Rövlanın küncdən göndərdiyi topu başla tora qovuşdurdu. Beləliklə, qonaqlar üçün soyuq duş effekti verən qola şahidlik etdik. “Kimyaçılar”ın son saniyələrdə fərqlənməsi ardıcıl ikinci qələbəyə vəsilə oldu. “Sabah”ın isə hesabı bərabərləşdirmək üçün nə vaxtı, nə də gücü qalmışdı.

Gözdən qaçmadı
* “Soldati di Sabah”, “UltraSumqayıt” və “Kimyaçılar” fanklubları yerində idi.
* Mikels əvəzlənərkən birbaşa paltardəyişmə otağına yollandı. O, Renduliçlə görüşmədi.

KƏNAN BAHADIR