Sizin reklam burada

Ukraynalılar Qəbələdə “sülh bağladı”

Baxış Sayı:2 330

Ukraynalılar Qəbələdə “sülh bağladı”
Maksimov: “8 komandalı çempionatda yeni nəsə kəşf etmək mümkün deyil”
102. Qəbələ - Keşlə 1:1 (1:1)

22. Dmitri Bezotosnı – 5,5
33. Təmkin Xəlilzadə - 5,0
(10. Ruslan Qurbanov, 77) – qiymətsiz
5. Rasim Ramaldanov – 5,0
15. Vitali Vernidub – 5,5
18. İlqar Qurbanov – 5,5
8. Qismət Alıyev – 5,5
14. Cavid Hüseynov (k) – 5,5
(4. Elvin Camalov, 88) – qiymətsiz
19. Filip Ozobiç – 6,0
28. Stiven Jozef-Monroz – 5,5
45. Famussa Kone – 5,5
9. Baqali Dabo – 5,5
Ehtiyat oyunçular
23. Aqil Məmmədov
35. Murad Popov
6. Elvin Məmmədov
11. Asif Məmmədov
16. Dion Malone
29. Hacıağa Hacıyev
32. Amin Seydiyev
74. Yusif Nəbiyev
Baş məşqçi: Roman Qriqorçuk
Komandanın ən yaxşısı: Filip Ozobiç

15. Orxan Sadıqlı – 5,5
4. Slavik Alxasov – 6,0
3. Denis Silva – 5,0
27. Adrian Skarlatake – 5,5
33. Tərlan Quliyev – 5,5
39. Əlibəy Məmmədli – 5,0
40. Nemanya Stoyanoviç – 5,0
10. Sezar Meza Kolli – 6,5
90. Ebrima Sohna – 4,5
(24. Fuad Bayramov, 47) – 5,0
7. Vaqif Cavadov (k) – 5,5
14. Andre Klennon – 5,0
(9. Pərdis Fərcad-Azad, 76) – qiymətsiz
Ehtiyat oyunçular
1. Kamran Ağayev
19. Pablo Podio
21. Herve Tçami
22. Məqsəd İsayev
58. Sinan Akkoyun
80. Rafael Məhərrəmli
88. Məmməd Quliyev
Baş məşqçi: Yuri Maksimov
Komandanın ən yaxşısı: Sezar Meza Kolli
Qollar: S.Alxasov, 11 (0:1, S.Meza Kolli). S.Jozef-Monroz, 31 (1:1, F.Kone).
Vərəqələr: Ə.Məmmədli, 24 (qeyri-idman hərəkəti). R.Ramaldanov, 43 (qeyri-idman hərəkəti). V.Cavadov, 61 (qeyri-idman hərəkəti). F.Bayramov, 67 (qeyri-idman hərəkəti). T.Quliyev, 83 (qeyri-idman hərəkəti) - sarı.
Hakimlər: RƏVAN HƏMZƏZADƏ (Şəki), Elşən Acalov, Məmmədəli Kərimov, Ömər Paşayev (hamısı Bakı).
Hakim-inspektor: Şahin Cəfərov (Bakı).
AFFA nümayəndəsi: Əsgər Əmirəliyev (Abşeron).
5 may. Qəbələ. Şəhər stadionu. 800 tamaşaçı (4500 yerlik).
Birinci hissəyə 1, ikinci hissəyə 3 dəqiqə əlavə olunub.
Oyunun qiyməti: 6,0.
Ukraynalı mütəxəssislər bu dəfə Qəbələdə üz-üzə gəlirdi. 3-cü dövrədə Bakıda keçirilən oyunda tərəflər 1:1 hesablı heç-heçəyə razılaşmışdı. Bu görüş qonaqlar üçün prinsipial önəm daşımırdı. Avroliqaya vəsiqə qazanmaq şansı qalmayan “Keşlə”dən fərqli, “Qəbələ” qələbə fonunda minimum vəzifəni yerinə yetirmiş olacaqdı. Hərçənd həm Maksimovun, həm də Qriqorçukun mayın 28-də məhz bu məkanda baş tutacaq ölkə kubokunun finalını nəzərə alıb, “kartları tam açmayacağı” da ehtimallardan biri idi.
Oyunun əvvəlinə hakim damğa vurdu. Skarlatake uğursuz “sürüşmə” fəndi ilə Ozobiçi yerə sərsə də, referinin fiti susdu. 10-cu dəqiqədə Cavadovun uzaqdan zərbəsində dəqiqlik çatmadı. Cəmi 1 dəqiqə sonra qonaqlar hesabı açdı. Meza Kollinin gözəl ara ötürməsini Alxasov tora qovuşdurdu. “Qəbələ”nin ilk yaddaqalan hücumu 16-cı dəqiqəyə təsadüf etdi. Önünün boş olduğunu görən Qismət uzaqdan şansını yoxlamaq qərarına gəlsə də, top qapının üstündən keçdi. Az sonra Kone inanılmaz fürsəti qaçırdı. Filipin gözəl ötürməylə Orxanla duelə yolladığı Famussa bərbad zərbəylə yerli azarkeşləri məyus etdi. Denisin cavab vuruşu da təhlükəli alındı. Yarımsaatın tamamında Kone növbəti əlverişli imkandan yararlana bilmədi. Malili forvard bu dəfə Hüseynovun gözəl ötürməsini ram etməkdə çətinlik çəkdi. Ancaq Famussa heç bir dəqiqə keçməmiş məhsuldar ötürmə müəllifi olmaqla günahını yudu. Jozef-Monroz “status-kvo”nu bərpa etdi – 1:1.
“Qəbələ”nin təzyiqi davam edirdi. Xəlilzadənin yerlə cinah ötürməsini Ozobiç tamamlasa da, Sadıqlı komandasını qoldan xilas etdi. 37-ci dəqiqədə Cavidin korner asmasını Vitali başla tamamlasa da, top cüzi fərqlə qapıdan yan keçdi. Qonaqların müdafiə xətti nəfəs almağa imkan tapmırdı. Sadıqlı Qurbanovun iti bucaq altından, ardınca Konenin 1 metrdən zərbəsini dəf etdi. Daha sonra isə Ozobiçin cərimə zərbəsinin qarşısını aldı.
Bütün bunlara baxmayaraq, fasiləyə “Keşlə” öndə yollana bilərdi. Hakim Rasimin Vaqifə qarşı cərimə meydançasındakı kobudluğunun kənarda baş verdiyi qənaətinə gələrək penaltini “yedi”. Ancaq bu, bakılıları ruhdan salmadı. Ani əks-hücum yerli azarkeşlərin ürəyini ağzına gətirdi. Klennonun zərbəsi dirəkdən döndüsə, Cavadovun təkrar vuruşunu Bezotosnı kornerə çıxardı.
İkinci hissədə temp xeyli aşağı düşdü. Mübarizə əsasən meydanın mərkəzində gedirdi. Təsadüfi deyil ki, təxminən 20 dəqiqə qapılar qarşısında təhlükəli vəziyyət yaşanmadı. Susqunluğu Alxasov pozdu. Sol cinah müdafiəçisinin “mərmi”si dəqiq olmadı. 73-cü dəqiqədə Dabo yüzfaizlik qol imkanını qaçırdı. Çempionatın bombardirinin zərbəsi Sadıqlını keçsə də, Alxasov komandasını qoldan xilas etdi. Son dəqiqələrdə hərarət artmışdı. Komandalar çox yorulsalar da, qələbəyə can atırdılar. Ancaq bəzi futbolçuların fərdi ustalığı hesabı dəyişməyə kifayət etmədi. Beləliklə, Bakıdakı hesab Qəbələdə də təkrarlandı.
SƏRXAN, Qəbələ

Gözdən qaçmadı
* İkinci dəqiqədə Rəvan Həmzəzadənin ayağı sürüşdü və hakim yerə yıxıldı. Bu da bəzi tamaşaçıların gülüşünə səbəb oldu.
* “Keşlə”ni yalnız bir nəfər dəstəkləyirdi. O da bakılıların sadiq azarkeşi Elnur Yusifov idi.
* İkinci yarının ortalarında “Keşlə”nin futbolçularından biri yerdə qalsa da, qonaqlar topu meydandan çıxarmayaraq, hücuma keçdilər. Əvəzində həmləni dəf edən “Qəbələ”nin müdafiəçiləri topu kənara vurdu. Bu, isə Jozef-Monrozun kəskin narazılığına səbəb oldu. Stiven bu addıma görə az qala komanda yoldaşlarıyla dalaşacaqdı.
* Rəvan Həmzəzadə protokolu yazarkən səhvə yol verib. Hakim qolların 10 və 30-cu dəqiqələrdə vurulduğunu qeyd etsə də, əslində Alxasov 11-ci, Jozef-Monroz isə 31-ci dəqiqədə fərqlənib.

Reaksiyalar
Yuri Maksimov: “Oyun bizim üçün o qədər də önəm kəsb etmirdi. Hər iki komandanın çempionatda hədəfləri fərqlidi. Bununla belə, hər dəfə meydana qalib gəlmək üçün çıxırıq. Futbolçularımız imicləri üçün döyüşdü. Müəyyən epizodlarda yaxşı oynadıq. Vacib görüşümüz kubokun final qarşılaşmasıdı. Bu matça hazırlaşacağıq. 8 komandalı çempionatda yeni nəsə kəşf etmək mümkün deyil. Çünki hamı bir-birinə yaxşı bələddi. Belədə kimisə təəccübləndirə bilməzsən. Kim özünü yaxşı göstərəcəksə, o da finalda oynayacaq. Bu gün Vaqifin oyunundan razı qaldım”.
Roman Qriqorçuk: “Oyun yaxşı keçdi. Gözlədiyim kimi oldu. Çoxlu qol imkanı yaxaladıq. Onları reallaşdırmalıydıq. Xüsusən də ilk hissədə. İmkanlardan yararlansaydıq, meydandan qələbəylə ayrıla bilərdik. Futbolçular hakimin icazə verdiyi qədər kobudluq edir. O qədər oyunlarımız olub ki, futbolçularım hakimliklə bağlı əsl şok yaşayıb. Bu gün də həmçinin. Azərbaycanda olduğum müddətdə onlarla belə halla üzləşmişəm. İndiyə kimi xatırlayıram, Aleksey Qay kimi təcrübəli futbolçu bərbad idarəçiliyə görə oyundan sonra məndən imdad diləyirdi. Əlimdən isə heç nə gəlmir. Oyunumuz yaxşılaşıb. Bu gün final haqda düşünmürdük. Finala qədər hələ oyunlarımız və məşqlərimiz var. Həmin görüşə ən yaxşı vəziyyətdə çatmalıyıq. Ancaq bütün oyunlarda hansısa detalları dəyişirik ki, rəqibimizi təəccübləndirə bilək”.
Rasim Ramaldanov: “Doğma meydanda oynadığımız üçün qələbə qazanmaq istəyirdik. Bilirdik ki, ağır oyun olacaq. Çünki rəqib yaxşı komandadı. Təhlükəli vəziyyətlərimiz olsa da, yararlana bilmədik. Buna baxmayaraq, yenə də heç-heçə etdik. Bacardığımızı ortaya qoyduq. Çalışacağıq bundan da yaxşı çıxış edək. Kubokun final matçına hələ çox vaxt var. Finalda da öz oyunumuzu göstərməyə çalışacağıq. Əlbəttə, “Keşlə” finala kimi irəliləyibsə, deməli, zəif komanda deyil. Kim güclü oynayacaqsa, o da qalib gələcək. Asan oyun olmayacaq. “Qəbələ” ilə müqaviləmin müddəti mövsümün sonunda başa çatacaq. Amma hələ ki bununla bağlı danışmamışıq. Mövsüm bitəndən sonra söhbət edəcəyik. “Qəbələ” Azərbaycanın ən güclü komandalarından biridi. Amma qismətimizdə nədisə, o da olacaq”.
Pərdis Fərcad-Azad: “Maraqlı oyun keçdi. İkinci yarıda daha yaxşı təsir bağışladıq. Əslində hər iki komanda qələbə qazana bilərdi. Həm “Qəbələ”nin, həm də bizim qol imkanlarımız oldu. Fikrimcə, heç-heçə ədalətli nəticədi. Əlbəttə, kubokun final oyunu bir az fərqli olacaq. Hər iki komanda meydana daha istəkli çıxacaq. Həlledici qarşılaşmanın Qəbələdə keçirilməsinin meydan sahibləri üçün üstünlük olduğunu düşünmürəm. Çünki stadion elə də böyük deyil ki, çoxlu azarkeş gəlsin. Bu üzdən şanları 50-nin 50-yə qiymətləndirirəm. İnşallah, biz qalib gələrik. “Keşlə” ilə müqaviləmin müddəti bitmək üzrədi. Bir neçə təklif var. Həm yerli, həm də xarici klublardan maraqlananlar olub. “Keşlə” ilə bu məsələni hələ ki müzakirə etməmişəm”.

Oxşar xəbərlər
SON XƏBƏRLƏR