ölkə kuboku, 2-ci təsnifat mərhələsi
Turan Tovuz - Hypers Quba 7:2 (4:0)
Turan Tovuz: 41. Sergey Samok, 4. Şəhriyar Əliyev (k) (34. Hüseyn Hüseynov, 59), 39. Sadiq Quliyev, 10. Xəyal Nəcəfov (27. Murad Dadaşev, 59), 8. Tural Bayramlı, 11. Ayxan Quseynov (22. Nahid Əliyev, 59), 7. İsmayıl Zülfüqarlı, 13. Fərid Yusifli, 44. Rüfət Əhmədov, 6. Araş Qaderi (3. Raul Məmmədov, 35), 21. Aleks Souza (70. Məzahir Məmmədzadə, 46).
Ehtiyat oyunçular: 71. Mehman Hacıyev, 12. Ülvi Mədətov.
Baş məşqçi: Kurban Berdıyev.
Hypers Guba: 98. Elxan Qasımov, 10. Cavid İmamverdiyev (k), 5. Ramil Əhmədov, 19. Nurlan Novruzov, 14. İlqar Ələkbərov (49. Valeh Məmmədov, 87), 25. Baxşəli Baxşəliyev, (8. Hüseyn Mənəfli, 46), 9. Ravil Yusifli (11. Nicat Abbasov, 46), 7. Elşən Veysov (6. Denis Edilov, 64), 77. Nicat Oruclu, 99. Hakan Həsənov (17. Nail Təhməzli, 79), 57. Nihat Sarıyev.
Ehtiyat oyunçu: 35. Fərman Bayramov.
Baş məşqçi: Vüqar Nadirov.
Qollar: R.Əhmədov, 13-öz qapısına. (1:0). A.Quseynov, 16 (2:0). A.Quseynov, 25 (3:0). A.Souza, 38 (4:0). A.Souza, 39 (5:0). S.Quliyev, 55 (6:0). N.Əliyev, 60 (7:0). İ.Ələkbərov, 63 (7:1). İ.Ələkbərov, 68 (7:2).
Hakimlər: ƏKBƏR ƏHMƏDOV, Eyyub İbrahimov, Şirməmməd Məmmədov, Rəvan Həmzəzadə.
Hakim-inspektor: Gülağa Cabarov.
AFFA nümayəndəsi: Seymur Səlimli.
28 oktyabr. Tovuz. Şəhər stadionu. 1100 tamaşaçı.
Əlavə vaxta ehtiyac duyulmayıb.

Hər kəs kimin qalib gələcəyini bilirdi. Hər halda, "Turan Tovuz"un aşkar favorit olduğunu anlamaq üçün premyer-liqanın turnir cədvəlinə baxmaq kifayətdi. Sadəcə, 2-ci liqa klubunun mümkün dirənişi, səviyyə fərqinin hansı dərəcədə olduğu maraq doğururdu. Bəli, "Hypers Quba" əlindən gələnin ən yaxşısını etməyə çalışdı. Amma nə "bozqurd"un təzyqinə tab gətirə bildi, nə də böyük hesabla məğlubiyyətdən yaxa qurtardı. Qubalılar qapısını yalnız 12 dəqiqə toxunulmaz saxladı. Ayxanın qapıya zərbəsini Elxan qarşılasa da, meydanda qalan top Ramilin başla müdaxiləsindən sonra tora qovuşdu. Böyük ehtimalla, Souzanın təzyiqi onun qapıları səhv salmasına səbəb oldu. Ayxan qol istəyinə 17-ci dəqiqədə Xəyalın ötürməsi sayəsində çatdı.

Təzyiqi artıran meydan sahiblərinin üçüncü qolunu da Ayxan vurdu - bu dəfə Sadiqin uzaqdan göndərdiyi topu qapıdan keçirdi. Quseynov 22-ci dəqiqədə het-trik müəllifi ola bilərdi ki, Elxan onun ardıcıl iki zərbəsini zərərsizləşdirdi. Qolkiper burda çox bacarıqlı oyunla diqqəti çəkdisə, Souzanın zərbələrinin öhdəsindən gələ bilmədi. Belədə braziliyalı da dubl müəllifi oldu. O, 38-ci dəqiqədə hesabı darmadağın həddinə çatdırdı. Daha doğrusu, İsmayılın zərbəsini uzaqlaşdıran Elxanın yerdə, topun meydanda qalmasından yararlandı. Cəmi bir dəqiqə sonra isə Ayxanın ötürməsini qolla tamamladı. İkinci hissə "Hypers Quba" üçün birinci yarı qədər çətin keçmədi. 55-ci dəqiqədə Sadiq komandasının növbəti qolunu vurdu. "Bozqurd"un fərqi yeddiyə çatdırması isə Nahid sayəsində mümkün oldu. Meydana yenicə çıxan futbolçu Rüfətin qapıya paralel şəkildə ötürdüyü topu tora qovuşdurdu. Bundan sonra "Turan Tovuz"un daha bir neçə qol vuracağını proqnozlaşdırmaq olardı. Lakin fəallaşan qubalılar İlqarın dublu sayəsində fərqi azaltdı. Beləliklə, "Turan Tovuz" "Hypers Quba"nı mübarizədən kənarlaşdırmaqla 1/8 final mərhələsinə yüksəldi. Tovuzluların kubokdakı növbəti rəqibi "Sabah"dı.

Maraqlıdı…
* Aleks Souza bir neçə dəfə əla seyvlə yadda qalan Elxanın əlini sıxdı və təbrik etdi.
* "Ultras Turan" tribunada yer alsa da, "Hypers Quba" səfərdə dəstəksiz qalmışdı.

KƏNAN BAHADIR